൧൦. ദസമസിക്ഖാപദം

൧൧൧൫. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഥുല്ലനന്ദാ ഭിക്ഖുനീ സഹജീവിനിം വുട്ഠാപേത്വാ നേവ വൂപകാസേതി ന വൂപകാസാപേതി. സാമികോ അഗ്ഗഹേസി. യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അയ്യാ ഥുല്ലനന്ദാ സഹജീവിനിം വുട്ഠാപേത്വാ നേവ വൂപകാസേസ്സതി ന വൂപകാസാപേസ്സതി, സാമികോ അഗ്ഗഹേസി! സചായം ഭിക്ഖുനീ പക്കന്താ അസ്സ, ന ച സാമികോ ഗണ്ഹേയ്യാ’’തി…പേ… സച്ചം കിര, ഭിക്ഖവേ, ഥുല്ലനന്ദാ ഭിക്ഖുനീ സഹജീവിനിം വുട്ഠാപേത്വാ നേവ വൂപകാസേതി ന വൂപകാസാപേതി […സി (ക.)], സാമികോ അഗ്ഗഹേസീതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഥുല്ലനന്ദാ ഭിക്ഖുനീ സഹജീവിനിം വുട്ഠാപേത്വാ നേവ വൂപകാസേസ്സതി ന വൂപകാസാപേസ്സതി, സാമികോ അഗ്ഗഹേസി! നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൧൧൧൬. ‘‘യാ പന ഭിക്ഖുനീ സഹജീവിനിം വുട്ഠാപേത്വാ നേവ വൂപകാസേയ്യ ന വൂപകാസാപേയ്യ അന്തമസോ ഛപ്പഞ്ചയോജനാനിപി, പാചിത്തിയ’’ന്തി.

൧൧൧൭. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

സഹജീവിനീ നാമ സദ്ധിവിഹാരിനീ വുച്ചതി. വുട്ഠാപേത്വാതി ഉപസമ്പാദേത്വാ. നേവ വൂപകാസേയ്യാതി ന സയം വൂപകാസേയ്യ. ന വൂപകാസാപേയ്യാതി ന അഞ്ഞം ആണാപേയ്യ. ‘‘നേവ വൂപകാസേസ്സാമി ന വൂപകാസാപേസ്സാമി അന്തമസോ ഛപ്പഞ്ചയോജനാനിപീ’’തി ധുരം നിക്ഖിത്തമത്തേ ആപത്തി പാചിത്തിയസ്സ.

൧൧൧൮. അനാപത്തി സതി അന്തരായേ, പരിയേസിത്വാ ദുതിയികം ഭിക്ഖുനിം ന ലഭതി, ഗിലാനായ, ആപദാസു, ഉമ്മത്തികായ, ആദികമ്മികായാതി.

ദസമസിക്ഖാപദം നിട്ഠിതം.

ഗബ്ഭിനിവഗ്ഗോ സത്തമോ.