൯. ജന്താഘരവത്തകഥാ

൩൭൧. തേന ഖോ പന സമയേന ഛബ്ബഗ്ഗിയാ ഭിക്ഖൂ ജന്താഘരേ ഥേരേഹി ഭിക്ഖൂഹി നിവാരിയമാനാ അനാദരിയം പടിച്ച പഹൂതം കട്ഠം ആരോപേത്വാ അഗ്ഗിം ദത്വാ ദ്വാരം ഥകേത്വാ ദ്വാരേ നിസീദന്തി. ഭിക്ഖൂ [ഥേരാ ച ഭിക്ഖൂ (സ്യാ. കം.)] ഉണ്ഹാഭിതത്താ ദ്വാരം അലഭമാനാ മുച്ഛിതാ പപതന്തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ ജന്താഘരേ ഥേരേഹി ഭിക്ഖൂഹി നിവാരിയമാനാ അനാദരിയം പടിച്ച പഹൂതം കട്ഠം ആരോപേത്വാ അഗ്ഗിം ദത്വാ ദ്വാരം ഥകേത്വാ ദ്വാരേ നിസീദിസ്സന്തി! ഭിക്ഖൂ ഉണ്ഹാഭിതത്താ ദ്വാരം അലഭമാനാ മുച്ഛിതാ പപതന്തീ’’തി. അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും…പേ… ‘‘സച്ചം കിര, ഭിക്ഖവേ, ഛബ്ബഗ്ഗിയാ ഭിക്ഖൂ ജന്താഘരേ ഥേരേഹി ഭിക്ഖൂഹി നിവാരിയമാനാ അനാദരിയം പടിച്ച പഹൂതം കട്ഠം ആരോപേത്വാ അഗ്ഗിം ദത്വാ ദ്വാരം ഥകേത്വാ ദ്വാരേ നിസീദന്തി; ഭിക്ഖൂ ഉണ്ഹാഭിതത്താ ദ്വാരം അലഭമാനാ മുച്ഛിതാ പപതന്തീ’’തി? ‘‘സച്ചം ഭഗവാ’’തി…പേ… വിഗരഹിത്വാ…പേ… ധമ്മിം കഥം കത്വാ ഭിക്ഖൂ ആമന്തേസി – ‘‘ന, ഭിക്ഖവേ, ജന്താഘരേ ഥേരേന ഭിക്ഖുനാ നിവാരിയമാനേന അനാദരിയം പടിച്ച പഹൂതം കട്ഠം ആരോപേത്വാ അഗ്ഗി ദാതബ്ബോ. യോ ദദേയ്യ, ആപത്തി ദുക്കടസ്സ. ന, ഭിക്ഖവേ, ദ്വാരം ഥകേത്വാ ദ്വാരേ നിസീദിതബ്ബം. യോ നിസീദേയ്യ, ആപത്തി ദുക്കടസ്സ.

൩൭൨. ‘‘തേന ഹി, ഭിക്ഖവേ, ഭിക്ഖൂനം ജന്താഘരവത്തം പഞ്ഞപേസ്സാമി യഥാ ഭിക്ഖൂഹി ജന്താഘരേ സമ്മാ വത്തിതബ്ബം. യോ പഠമം ജന്താഘരം ഗച്ഛതി, സചേ ഛാരികാ ഉസ്സന്നാ ഹോതി, ഛാരികാ ഛഡ്ഡേതബ്ബാ. സചേ ജന്താഘരം ഉക്ലാപം ഹോതി, ജന്താഘരം സമ്മജ്ജിതബ്ബം. സചേ പരിഭണ്ഡം ഉക്ലാപം ഹോതി, പരിഭണ്ഡം സമ്മജ്ജിതബ്ബം. സചേ പരിവേണം ഉക്ലാപം ഹോതി, പരിവേണം സമ്മജ്ജിതബ്ബം. സചേ കോട്ഠകോ ഉക്ലാപോ ഹോതി, കോട്ഠകോ സമ്മജ്ജിതബ്ബോ. സചേ ജന്താഘരസാലാ ഉക്ലാപാ ഹോതി, ജന്താഘരസാലാ സമ്മജ്ജിതബ്ബാ.

‘‘ചുണ്ണം സന്നേതബ്ബം, മത്തികാ തേമേതബ്ബാ, ഉദകദോണികായ ഉദകം ആസിഞ്ചിതബ്ബം. ജന്താഘരം പവിസന്തേന മത്തികായ മുഖം മക്ഖേത്വാ പുരതോ ച പച്ഛതോ ച പടിച്ഛാദേത്വാ ജന്താഘരം പവിസിതബ്ബം. ന ഥേരേ ഭിക്ഖൂ അനുപഖജ്ജ നിസീദിതബ്ബം. ന നവാ ഭിക്ഖൂ ആസനേന പടിബാഹിതബ്ബാ. സചേ ഉസ്സഹതി, ജന്താഘരേ ഥേരാനം ഭിക്ഖൂനം പരികമ്മം കാതബ്ബം. ജന്താഘരാ നിക്ഖമന്തേന ജന്താഘരപീഠം ആദായ പുരതോ ച പച്ഛതോ ച പടിച്ഛാദേത്വാ ജന്താഘരാ നിക്ഖമിതബ്ബം. സചേ ഉസ്സഹതി, ഉദകേപി ഥേരാനം ഭിക്ഖൂനം പരികമ്മം കാതബ്ബം. ന ഥേരാനം ഭിക്ഖൂനം പുരതോപി നഹായിതബ്ബം, ന ഉപരിതോപി നഹായിതബ്ബം. നഹാതേന ഉത്തരന്തേന ഓതരന്താനം മഗ്ഗോ ദാതബ്ബോ. യോ പച്ഛാ ജന്താഘരാ നിക്ഖമതി, സചേ ജന്താഘരം ചിക്ഖല്ലം ഹോതി, ധോവിതബ്ബം. മത്തികാദോണികം ധോവിത്വാ ജന്താഘരപീഠം പടിസാമേത്വാ അഗ്ഗിം വിജ്ഝാപേത്വാ ദ്വാരം ഥകേത്വാ പക്കമിതബ്ബം. ഇദം ഖോ, ഭിക്ഖവേ, ഭിക്ഖൂനം ജന്താഘരവത്തം യഥാ ഭിക്ഖൂഹി ജന്താഘരേ സമ്മാ വത്തിതബ്ബ’’ന്തി.