൬. പിണ്ഡചാരികവത്തകഥാ

൩൬൫. തേന ഖോ പന സമയേന പിണ്ഡചാരികാ ഭിക്ഖൂ ദുന്നിവത്ഥാ ദുപ്പാരുതാ അനാകപ്പസമ്പന്നാ പിണ്ഡായ ചരന്തി, അസല്ലക്ഖേത്വാപി നിവേസനം പവിസന്തി, അസല്ലക്ഖേത്വാപി നിക്ഖമന്തി, അതിസഹസാപി പവിസന്തി, അതിസഹസാപി നിക്ഖമന്തി, അതിദൂരേപി തിട്ഠന്തി, അച്ചാസന്നേപി തിട്ഠന്തി, അതിചിരമ്പി തിട്ഠന്തി, അതിലഹുമ്പി നിവത്തന്തി. അഞ്ഞതരോപി പിണ്ഡചാരികോ ഭിക്ഖു അസല്ലക്ഖേത്വാ നിവേസനം പാവിസി. സോ ച ദ്വാരം മഞ്ഞമാനോ അഞ്ഞതരം ഓവരകം പാവിസി. തസ്മിമ്പി ഓവരകേ ഇത്ഥീ നഗ്ഗാ ഉത്താനാ നിപന്നാ ഹോതി. അദ്ദസാ ഖോ സോ ഭിക്ഖു തം ഇത്ഥിം നഗ്ഗം ഉത്താനം നിപന്നം. ദിസ്വാന – ‘‘നയിദം ദ്വാരം, ഓവരകം ഇദ’’ന്തി തമ്ഹാ ഓവരകാ നിക്ഖമി. അദ്ദസാ ഖോ തസ്സാ ഇത്ഥിയാ സാമികോ തം ഇത്ഥിം നഗ്ഗം ഉത്താനം നിപന്നം. ദിസ്വാന – ‘‘ഇമിനാ മേ ഭിക്ഖുനാ പജാപതീ ദൂസിതാ’’തി തം ഭിക്ഖും ഗഹേത്വാ ആകോടേസി. അഥ ഖോ സാ ഇത്ഥീ തേന സദ്ദേന പടിബുജ്ഝിത്വാ തം പുരിസം ഏതദവോച – ‘‘കിസ്സ ത്വം, അയ്യ, ഇമം ഭിക്ഖും ആകോടേസീ’’തി? ‘‘ഇമിനാസി ത്വം ഭിക്ഖുനാ ദൂസിതാ’’തി? ‘‘നാഹം, അയ്യ, ഇമിനാ ഭിക്ഖുനാ ദൂസിതാ; അകാരകോ സോ ഭിക്ഖൂ’’തി തം ഭിക്ഖും മുഞ്ചാപേസി. അഥ ഖോ സോ ഭിക്ഖു ആരാമം ഗന്ത്വാ ഭിക്ഖൂനം ഏതമത്ഥം ആരോചേസി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ പിണ്ഡചാരികാ ഭിക്ഖൂ ദുന്നിവത്ഥാ ദുപ്പാരുതാ അനാകപ്പസമ്പന്നാ പിണ്ഡായ ചരിസ്സന്തി, അസല്ലക്ഖേത്വാപി നിവേസനം പവിസിസ്സന്തി, അസല്ലക്ഖേത്വാപി നിക്ഖമിസ്സന്തി, അതിസഹസാപി പവിസിസ്സന്തി, അതിസഹസാപി നിക്ഖമിസ്സന്തി, അതിദൂരേപി തിട്ഠിസ്സന്തി, അച്ചാസന്നേപി തിട്ഠിസ്സന്തി, അതിചിരമ്പി തിട്ഠിസ്സന്തി, അതിലഹുമ്പി നിവത്തിസ്സന്തീ’’തി! അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും…പേ… സച്ചം കിര, ഭിക്ഖവേ…പേ… സച്ചം ഭഗവാതി…പേ… വിഗരഹിത്വാ…പേ… ധമ്മിം കഥം കത്വാ ഭിക്ഖൂ ആമന്തേസി –

൩൬൬. ‘‘തേന ഹി, ഭിക്ഖവേ, പിണ്ഡചാരികാനം ഭിക്ഖൂനം വത്തം പഞ്ഞാപേസ്സാമി യഥാ പിണ്ഡചാരികേഹി ഭിക്ഖൂഹി സമ്മാ വത്തിതബ്ബം. പിണ്ഡചാരികേന, ഭിക്ഖവേ, ഭിക്ഖുനാ – ‘ഇദാനി ഗാമം പവിസിസ്സാമീ’തി തിമണ്ഡലം പടിച്ഛാദേന്തേന പരിമണ്ഡലം നിവാസേത്വാ കായബന്ധനം ബന്ധിത്വാ സഗുണം കത്വാ സങ്ഘാടിയോ പാരുപിത്വാ ഗണ്ഠികം പടിമുഞ്ചിത്വാ ധോവിത്വാ പത്തം ഗഹേത്വാ സാധുകം അതരമാനേന ഗാമോ പവിസിതബ്ബോ.

‘‘സുപ്പടിച്ഛന്നേന അന്തരഘരേ ഗന്തബ്ബം. സുസംവുതേന അന്തരഘരേ ഗന്തബ്ബം. ഓക്ഖിത്തചക്ഖുനാ അന്തരഘരേ ഗന്തബ്ബം. ന ഉക്ഖിത്തകായ അന്തരഘരേ ഗന്തബ്ബം. ന ഉജ്ജഗ്ഘികായ അന്തരഘരേ ഗന്തബ്ബം. അപ്പസദ്ദേന അന്തരഘരേ ഗന്തബ്ബം. ന കായപ്പചാലകം അന്തരഘരേ ഗന്തബ്ബം. ന ബാഹുപ്പചാലകം അന്തരഘരേ ഗന്തബ്ബം. ന സീസപ്പചാലകം അന്തരഘരേ ഗന്തബ്ബം. ന ഖമ്ഭകതേന അന്തരഘരേ ഗന്തബ്ബം. ന ഓഗുണ്ഠിതേന അന്തരഘരേ ഗന്തബ്ബം. ന ഉക്കുടികായ അന്തരഘരേ ഗന്തബ്ബം.

‘‘നിവേസനം പവിസന്തേന സല്ലക്ഖേതബ്ബം – ‘ഇമിനാ പവിസിസ്സാമി, ഇമിനാ നിക്ഖമിസ്സാമീ’തി. നാതിസഹസാ പവിസിതബ്ബം. നാതിസഹസാ നിക്ഖമിതബ്ബം. നാതിദൂരേ ഠാതബ്ബം. നാച്ചാസന്നേ ഠാതബ്ബം. നാതിചിരം ഠാതബ്ബം. നാതിലഹും നിവത്തിതബ്ബം. ഠിതകേന സല്ലക്ഖേതബ്ബം – ‘ഭിക്ഖം ദാതുകാമാ വാ അദാതുകാമാ വാ’തി. സചേ കമ്മം വാ നിക്ഖിപതി, ആസനാ വാ വുട്ഠാതി, കടച്ഛും വാ പരാമസതി, ഭാജനം വാ പരാമസതി, ഠപേതി [ഠാപേതി (ക.)] വാ – ദാതുകാമസ്സാതി [ദാതുകാമിയാതി (സ്യാ.), ദാതുകാമാ വിയാതി (സീ.)] ഠാതബ്ബം. ഭിക്ഖായ ദിയ്യമാനായ വാമേന ഹത്ഥേന സങ്ഘാടിം ഉച്ചാരേത്വാ ദക്ഖിണേന ഹത്ഥേന പത്തം പണാമേത്വാ ഉഭോഹി ഹത്ഥേഹി പത്തം പടിഗ്ഗഹേത്വാ ഭിക്ഖാ പടിഗ്ഗഹേതബ്ബാ. ന ച ഭിക്ഖാദായികായ മുഖം ഉല്ലോകേതബ്ബം [ഓലോകേതബ്ബം (സ്യാ.)]. സല്ലക്ഖേതബ്ബം – ‘സൂപം ദാതുകാമാ വാ അദാതുകാമാ വാ’തി. സചേ കടച്ഛും വാ പരാമസതി, ഭാജനം വാ പരാമസതി, ഠപേതി വാ – ദാതുകാമസ്സാതി ഠാതബ്ബം. ഭിക്ഖായ ദിന്നായ സങ്ഘാടിയാ പത്തം പടിച്ഛാദേത്വാ സാധുകം അതരമാനേന നിവത്തിതബ്ബം.

‘‘സുപ്പടിച്ഛന്നേന അന്തരഘരേ ഗന്തബ്ബം. സുസംവുതേന അന്തരഘരേ ഗന്തബ്ബം. ഓക്ഖിത്തചക്ഖുനാ അന്തരഘരേ ഗന്തബ്ബം. ന ഉക്ഖിത്തകായ അന്തരഘരേ ഗന്തബ്ബം. ന ഉജ്ജഗ്ഘികായ അന്തരഘരേ ഗന്തബ്ബം. അപ്പസദ്ദേന അന്തരഘരേ ഗന്തബ്ബം. ന കായപ്പചാലകം അന്തരഘരേ ഗന്തബ്ബം. ന ബാഹുപ്പചാലകം അന്തരഘരേ ഗന്തബ്ബം. ന സീസപ്പചാലകം അന്തരഘരേ ഗന്തബ്ബം. ന ഖമ്ഭകതേന അന്തരഘരേ ഗന്തബ്ബം. ന ഓഗുണ്ഠിതേന അന്തരഘരേ ഗന്തബ്ബം. ന ഉക്കുടികായ അന്തരഘരേ ഗന്തബ്ബം. യോ പഠമം ഗാമതോ പിണ്ഡായ പടിക്കമതി, തേന ആസനം പഞ്ഞപേതബ്ബം, പാദോദകം പാദപീഠം പാദകഥലികം ഉപനിക്ഖിപിതബ്ബം, അവക്കാരപാതി ധോവിത്വാ ഉപട്ഠാപേതബ്ബാ, പാനീയം പരിഭോജനീയം ഉപട്ഠാപേതബ്ബം. യോ പച്ഛാ ഗാമതോ പിണ്ഡായ പടിക്കമതി, സചേ ഹോതി ഭുത്താവസേസോ, സചേ ആകങ്ഖതി, ഭുഞ്ജിതബ്ബം. നോ ചേ ആകങ്ഖതി, അപ്പഹരിതേ വാ ഛഡ്ഡേതബ്ബം, അപ്പാണകേ വാ ഉദകേ ഓപിലാപേതബ്ബം. തേന ആസനം ഉദ്ധരിതബ്ബം, പാദോദകം പാദപീഠം പാദകഥലികം പടിസാമേതബ്ബം, അവക്കാരപാതി ധോവിത്വാ പടിസാമേതബ്ബാ, പാനീയം പരിഭോജനീയം പടിസാമേതബ്ബം, ഭത്തഗ്ഗം സമ്മജ്ജിതബ്ബം. യോ പസ്സതി പാനീയഘടം വാ പരിഭോജനീയഘടം വാ വച്ചഘടം വാ രിത്തം തുച്ഛം തേന ഉപട്ഠാപേതബ്ബം. സചസ്സ ഹോതി അവിസയ്ഹം, ഹത്ഥവികാരേന ദുതിയം ആമന്തേത്വാ ഹത്ഥവിലങ്ഘകേന ഉപട്ഠാപേതബ്ബം, ന ച തപ്പച്ചയാ വാചാ ഭിന്ദിതബ്ബാ. ഇദം ഖോ, ഭിക്ഖവേ, പിണ്ഡചാരികാനം ഭിക്ഖൂനം വത്തം യഥാ പിണ്ഡചാരികേഹി ഭിക്ഖൂഹി സമ്മാ വത്തിതബ്ബ’’ന്തി.