൧൪. അന്തേവാസികവത്തകഥാ

൩൮൧. തേന ഖോ പന സമയേന ആചരിയാ അന്തേവാസികേസു ന സമ്മാ വത്തന്തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ആചരിയാ അന്തേവാസികേസു ന സമ്മാ വത്തിസ്സന്തീ’’തി! അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ഭിക്ഖൂ പടിപുച്ഛി – ‘‘സച്ചം കിര, ഭിക്ഖവേ, ആചരിയാ അന്തേവാസികേസു ന സമ്മാ വത്തന്തീ’’തി? ‘‘സച്ചം ഭഗവാ’’തി…പേ… വിഗരഹിത്വാ…പേ… ധമ്മിം കഥം കത്വാ ഭിക്ഖൂ ആമന്തേസി –

൩൮൨. ‘‘തേന ഹി, ഭിക്ഖവേ, ആചരിയാനം അന്തേവാസികേസു വത്തം പഞ്ഞപേസ്സാമി യഥാ ആചരിയേഹി അന്തേവാസികേസു സമ്മാ വത്തിതബ്ബം. [മഹാവ. ൭൯] ആചരിയേന, ഭിക്ഖവേ, അന്തേവാസികമ്ഹി സമ്മാ വത്തിതബ്ബം. തത്രായം സമ്മാവത്തനാ –

‘‘ആചരിയേന, ഭിക്ഖവേ, അന്തേവാസികോ സങ്ഗഹേതബ്ബോ അനുഗ്ഗഹേതബ്ബോ ഉദ്ദേസേന പരിപുച്ഛായ ഓവാദേന അനുസാസനിയാ. സചേ ആചരിയസ്സ പത്തോ ഹോതി, അന്തേവാസികസ്സ പത്തോ ന ഹോതി, ആചരിയേന അന്തേവാസികസ്സ പത്തോ ദാതബ്ബോ, ഉസ്സുക്കം വാ കാതബ്ബം – കിന്തി നു ഖോ അന്തേവാസികസ്സ പത്തോ ഉപ്പജ്ജിയേഥാതി. സചേ ആചരിയസ്സ ചീവരം ഹോതി, അന്തേവാസികസ്സ ചീവരം ന ഹോതി, ആചരിയേന അന്തേവാസികസ്സ ചീവരം ദാതബ്ബം, ഉസ്സുക്കം വാ കാതബ്ബം – കിന്തി നു ഖോ അന്തേവാസികസ്സ ചീവരം ഉപ്പജ്ജിയേഥാതി. സചേ ആചരിയസ്സ പരിക്ഖാരോ ഹോതി, അന്തേവാസികസ്സ പരിക്ഖാരോ ന ഹോതി, ആചരിയേന അന്തേവാസികസ്സ പരിക്ഖാരോ ദാതബ്ബോ, ഉസ്സുക്കം വാ കാതബ്ബം – കിന്തി നു ഖോ അന്തേവാസികസ്സ പരിക്ഖാരോ ഉപ്പജ്ജിയേഥാതി.

‘‘സചേ അന്തേവാസികോ ഗിലാനോ ഹോതി, കാലസ്സേവ ഉട്ഠായ ദന്തകട്ഠം ദാതബ്ബം, മുഖോദകം ദാതബ്ബം, ആസനം പഞ്ഞപേതബ്ബം. സചേ യാഗു ഹോതി, ഭാജനം ധോവിത്വാ യാഗു ഉപനാമേതബ്ബാ. യാഗും പീതസ്സ ഉദകം ദത്വാ ഭാജനം പടിഗ്ഗഹേത്വാ നീചം കത്വാ സാധുകം അപ്പടിഘംസന്തേന ധോവിത്വാ പടിസാമേതബ്ബം. അന്തേവാസികമ്ഹി വുട്ഠിതേ ആസനം ഉദ്ധരിതബ്ബം. സചേ സോ ദേസോ ഉക്ലാപോ ഹോതി, സോ ദേസോ സമ്മജ്ജിതബ്ബോ.

‘‘സചേ അന്തേവാസികോ ഗാമം പവിസിതുകാമോ ഹോതി, നിവാസനം ദാതബ്ബം, പടിനിവാസനം പടിഗ്ഗഹേതബ്ബം, കായബന്ധനം ദാതബ്ബം, സഗുണം കത്വാ സങ്ഘാടിയോ ദാതബ്ബാ, ധോവിത്വാ പത്തോ സോദകോ ദാതബ്ബോ.

‘‘ഏത്താവതാ നിവത്തിസ്സതീതി ആസനം പഞ്ഞപേതബ്ബം, പാദോദകം പാദപീഠം പാദകഥലികം ഉപനിക്ഖിപിതബ്ബം, പച്ചുഗ്ഗന്ത്വാ പത്തചീവരം പടിഗ്ഗഹേതബ്ബം, പടിനിവാസനം ദാതബ്ബം, നിവാസനം പടിഗ്ഗഹേതബ്ബം. സചേ ചീവരം സിന്നം ഹോതി, മുഹുത്തം ഉണ്ഹേ ഓതാപേതബ്ബം, ന ച ഉണ്ഹേ ചീവരം നിദഹിതബ്ബം. ചീവരം സങ്ഘരിതബ്ബം. ചീവരം സങ്ഘരന്തേന ചതുരങ്ഗുലം കണ്ണം ഉസ്സാരേത്വാ ചീവരം സങ്ഘരിതബ്ബം – മാ മജ്ഝേ ഭങ്ഗോ അഹോസീതി. ഓഭോഗേ കായബന്ധനം കാതബ്ബം.

‘‘സചേ പിണ്ഡപാതോ ഹോതി, അന്തേവാസികോ ച ഭുഞ്ജിതുകാമോ ഹോതി, ഉദകം ദത്വാ പിണ്ഡപാതോ ഉപനാമേതബ്ബോ. അന്തേവാസികോ പാനീയേന പുച്ഛിതബ്ബോ. ഭുത്താവിസ്സ ഉദകം ദത്വാ പത്തം പടിഗ്ഗഹേത്വാ നീചം കത്വാ സാധുകം അപ്പടിഘംസന്തേന ധോവിത്വാ വോദകം കത്വാ മുഹുത്തം ഉണ്ഹേ ഓതാപേതബ്ബോ, ന ച ഉണ്ഹേ പത്തോ നിദഹിതബ്ബോ. പത്തചീവരം നിക്ഖിപിതബ്ബം. പത്തം നിക്ഖിപന്തേന…പേ… ചീവരം നിക്ഖിപന്തേന…പേ… പാരതോ അന്തം ഓരതോ ഭോഗം കത്വാ ചീവരം നിക്ഖിപിതബ്ബം. അന്തേവാസികമ്ഹി ഉട്ഠിതേ ആസനം ഉദ്ധരിതബ്ബം, പാദോദകം പാദപീഠം പാദകഥലികം പടിസാമേതബ്ബം. സചേ സോ ദേസോ ഉക്ലാപോ ഹോതി, സോ ദേസോ സമ്മജ്ജിതബ്ബോ.

‘‘സചേ അന്തേവാസികോ നഹായിതുകാമോ ഹോതി, നഹാനം പടിയാദേതബ്ബം. സചേ സീതേന അത്ഥോ ഹോതി, സീതം പടിയാദേതബ്ബം. സചേ ഉണ്ഹേന അത്ഥോ ഹോതി, ഉണ്ഹം പടിയാദേതബ്ബം.

‘‘സചേ അന്തേവാസികോ ജന്താഘരം പവിസിതുകാമോ ഹോതി, ചുണ്ണം സന്നേതബ്ബം, മത്തികാ തേമേതബ്ബാ, ജന്താഘരപീഠം ആദായ [ആദായ അന്തേവാസികസ്സ പിട്ഠിതോ പിട്ഠിതോ (ക.)] ഗന്ത്വാ ജന്താഘരപീഠം ദത്വാ ചീവരം പടിഗ്ഗഹേത്വാ ഏകമന്തം നിക്ഖിപിതബ്ബം, ചുണ്ണം ദാതബ്ബം, മത്തികാ ദാതബ്ബാ. സചേ ഉസ്സഹതി ജന്താഘരം പവിസിതബ്ബം. ജന്താഘരം പവിസന്തേന മത്തികായ മുഖം മക്ഖേത്വാ പുരതോ ച പച്ഛതോ ച പടിച്ഛാദേത്വാ ജന്താഘരം പവിസിതബ്ബം. ന ഥേരേ ഭിക്ഖൂ അനുപഖജ്ജ നിസീദിതബ്ബം. ന നവാ ഭിക്ഖൂ ആസനേന പടിബാഹിതബ്ബാ. ജന്താഘരേ അന്തേവാസികസ്സ പരികമ്മം കാതബ്ബം. ജന്താഘരാ നിക്ഖമന്തേന ജന്താഘരപീഠം ആദായ പുരതോ ച പച്ഛതോ ച പടിച്ഛാദേത്വാ ജന്താഘരാ നിക്ഖമിതബ്ബം.

‘‘ഉദകേപി അന്തേവാസികസ്സ പരികമ്മം കാതബ്ബം. നഹാതേന പഠമതരം ഉത്തരിത്വാ അത്തനോ ഗത്തം വോദകം കത്വാ നിവാസേത്വാ അന്തേവാസികസ്സ ഗത്തതോ ഉദകം പമജ്ജിതബ്ബം, നിവാസനം ദാതബ്ബം, സങ്ഘാടി ദാതബ്ബാ, ജന്താഘരപീഠം ആദായ പഠമതരം ആഗന്ത്വാ ആസനം പഞ്ഞപേതബ്ബം, പാദോദകം പാദപീഠം പാദകഥലികം ഉപനിക്ഖിപിതബ്ബം, അന്തേവാസികോ പാനീയേന പുച്ഛിതബ്ബോ.

‘‘യസ്മിം വിഹാരേ അന്തേവാസികോ വിഹരതി, സചേ സോ വിഹാരോ ഉക്ലാപോ ഹോതി, സചേ ഉസ്സഹതി, സോധേതബ്ബോ. വിഹാരം സോധേന്തേന പഠമം പത്തചീവരം നീഹരിത്വാ ഏകമന്തം നിക്ഖിപിതബ്ബം…പേ… ആചമനകുമ്ഭിയാ ഉദകം ന ഹോതി, ആചമനകുമ്ഭിയാ ഉദകം ആസിഞ്ചിതബ്ബം.

‘‘സചേ അന്തേവാസികസ്സ അനഭിരതി ഉപ്പന്നാ ഹോതി, ആചരിയേന വൂപകാസേതബ്ബോ, വൂപകാസാപേതബ്ബോ, ധമ്മകഥാ വാസ്സ കാതബ്ബാ. സചേ അന്തേവാസികസ്സ കുക്കുച്ചം ഉപ്പന്നം ഹോതി, ആചരിയേന വിനോദേതബ്ബം, വിനോദാപേതബ്ബം, ധമ്മകഥാ വാസ്സ കാതബ്ബാ. സചേ അന്തേവാസികസ്സ ദിട്ഠിഗതം ഉപ്പന്നം ഹോതി, ആചരിയേന വിവേചേതബ്ബം, വിവേചാപേതബ്ബം, ധമ്മകഥാ വാസ്സ കാതബ്ബാ. സചേ അന്തേവാസികോ ഗരുധമ്മം അജ്ഝാപന്നോ ഹോതി, പരിവാസാരഹോ, ആചരിയേന ഉസ്സുക്കം കാതബ്ബം – കിന്തി നു ഖോ സങ്ഘോ അന്തേവാസികസ്സ പരിവാസം ദദേയ്യാതി. സചേ അന്തേവാസികോ മൂലായപടികസ്സനാരഹോ ഹോതി, ആചരിയേന ഉസ്സുക്കം കാതബ്ബം – കിന്തി നു ഖോ സങ്ഘോ അന്തേവാസികം മൂലായ പടികസ്സേയ്യാതി. സചേ അന്തേവാസികോ മാനത്താരഹോ ഹോതി, ആചരിയേന ഉസ്സുക്കം കാതബ്ബം – കിന്തി നു ഖോ സങ്ഘോ അന്തേവാസികസ്സ മാനത്തം ദദേയ്യാതി. സചേ അന്തേവാസികോ അബ്ഭാനാരഹോ ഹോതി, ആചരിയേന ഉസ്സുക്കം കാതബ്ബം – കിന്തി നു ഖോ സങ്ഘോ അന്തേവാസികം അബ്ഭേയ്യാതി. സചേ സങ്ഘോ അന്തേവാസികസ്സ കമ്മം കത്തുകാമോ ഹോതി, തജ്ജനീയം വാ നിയസ്സം വാ പബ്ബാജനീയം വാ പടിസാരണീയം വാ ഉക്ഖേപനീയം വാ, ആചരിയേന ഉസ്സുക്കം കാതബ്ബം – കിന്തി നു ഖോ സങ്ഘോ അന്തേവാസികസ്സ കമ്മം ന കരേയ്യ, ലഹുകായ വാ പരിണാമേയ്യാതി. കതം വാ പനസ്സ ഹോതി, സങ്ഘേന കമ്മം, തജ്ജനീയം വാ നിയസ്സം വാ പബ്ബാജനീയം വാ പടിസാരണീയം വാ ഉക്ഖേപനീയം വാ, ആചരിയേന ഉസ്സുക്കം കാതബ്ബം – കിന്തി നു ഖോ അന്തേവാസികോ സമ്മാ വത്തേയ്യ, ലോമം പാതേയ്യ, നേത്ഥാരം വത്തേയ്യ, സങ്ഘോ തം കമ്മം പടിപ്പസ്സമ്ഭേയ്യാതി.

‘‘സചേ അന്തേവാസികസ്സ ചീവരം ധോവിതബ്ബം ഹോതി, ആചരിയേന ആചിക്ഖിതബ്ബം – ഏവം ധോവേയ്യാസീതി, ഉസ്സുക്കം വാ കാതബ്ബം – കിന്തി നു ഖോ അന്തേവാസികസ്സ ചീവരം ധോവിയേഥാതി. സചേ അന്തേവാസികസ്സ ചീവരം കാതബ്ബം ഹോതി, ആചരിയേന ആചിക്ഖിതബ്ബം – ഏവം കരേയ്യാസീതി, ഉസ്സുക്കം വാ കാതബ്ബം – കിന്തി നു ഖോ അന്തേവാസികസ്സ ചീവരം കരിയേഥാതി. സചേ അന്തേവാസികസ്സ രജനം പചിതബ്ബം ഹോതി, ആചരിയേന ആചിക്ഖിതബ്ബം – ഏവം പചേയ്യാസീതി, ഉസ്സുക്കം വാ കാതബ്ബം – കിന്തി നു ഖോ അന്തേവാസികസ്സ രജനം പചിയേഥാതി. സചേ അന്തേവാസികസ്സ ചീവരം രജിതബ്ബം ഹോതി, ആചരിയേന ആചിക്ഖിതബ്ബം – ഏവം രജേയ്യാസീതി, ഉസ്സുക്കം വാ കാതബ്ബം – കിന്തി നു ഖോ അന്തേവാസികസ്സ ചീവരം രജിയേഥാതി. ചീവരം രജന്തേന സാധുകം സമ്പരിവത്തകം സമ്പരിവത്തകം രജിതബ്ബം. ന ച അച്ഛിന്നേ ഥേവേ പക്കമിതബ്ബം. സചേ അന്തേവാസികോ ഗിലാനോ ഹോതി, യാവജീവം ഉപട്ഠാതബ്ബോ, വുട്ഠാനമസ്സ ആഗമേതബ്ബം. ഇദം ഖോ, ഭിക്ഖവേ, ആചരിയാനം അന്തേവാസികേസു വത്തം യഥാ ആചരിയേഹി അന്തേവാസികേസു സമ്മാ വത്തിതബ്ബ’’ന്തി.

വത്തക്ഖന്ധകോ അട്ഠമോ.

ഇമമ്ഹി ഖന്ധകേ വത്ഥൂ ഏകൂനവീസതി, വത്താ ചുദ്ദസ.

തസ്സുദ്ദാനം –

സഉപാഹനാ ഛത്താ ച, ഓഗുണ്ഠി സീസം പാനീയം;

നാഭിവാദേ ന പുച്ഛന്തി, അഹി ഉജ്ഝന്തി പേസലാ.

ഓമുഞ്ചി ഛത്തം ഖന്ധേ ച, അതരഞ്ച പടിക്കമം;

പത്തചീവരം നിക്ഖിപാ, പതിരൂപഞ്ച പുച്ഛിതാ.

ആസിഞ്ചേയ്യ ധോവിതേന, സുക്ഖേനല്ലേനുപാഹനാ;

വുഡ്ഢോ നവകോ പുച്ഛേയ്യ, അജ്ഝാവുട്ഠഞ്ച ഗോചരാ.

സേക്ഖാ വച്ചാ പാനീ പരി, കത്തരം കതികം തതോ;

കാലം മുഹുത്തം ഉക്ലാപോ, ഭൂമത്ഥരണം നീഹരേ.

പടിപാദോ ഭിസിബിബ്ബോ, മഞ്ചപീഠഞ്ച മല്ലകം;

അപസ്സേനുല്ലോകകണ്ണാ, ഗേരുകാ കാള അകതാ.

സങ്കാരഞ്ച ഭൂമത്ഥരണം, പടിപാദകം മഞ്ചപീഠം;

ഭിസി നിസീദനമ്പി, മല്ലകം അപസ്സേന ച.

പത്തചീവരം ഭൂമി ച, പാരന്തം ഓരതോ ഭോഗം;

പുരത്ഥിമാ പച്ഛിമാ ച, ഉത്തരാ അഥ ദക്ഖിണാ.

സീതുണ്ഹേ ച ദിവാരത്തിം, പരിവേണഞ്ച കോട്ഠകോ;

ഉപട്ഠാനഗ്ഗി സാലാ ച, വത്തം വച്ചകുടീസു ച.

പാനീ പരിഭോജനിയാ, കുമ്ഭി ആചമനേസു ച;

അനോപമേന പഞ്ഞത്തം, വത്തം ആഗന്തുകേഹിമേ [വേ (ക. ഏവമുപരിപി)].

നേവാസനം ന ഉദകം, ന പച്ചു ന ച പാനിയം;

നാഭിവാദേ നപഞ്ഞപേ, ഉജ്ഝായന്തി ച പേസലാ.

വുഡ്ഢാസനഞ്ച ഉദകം, പച്ചുഗ്ഗന്ത്വാ ച പാനിയം;

ഉപാഹനേ ഏകമന്തം, അഭിവാദേ ച പഞ്ഞപേ.

വുത്ഥം ഗോചരസേക്ഖോ ച, ഠാനം പാനിയഭോജനം;

കത്തരം കതികം കാലം, നവകസ്സ നിസിന്നകേ.

അഭിവാദയേ ആചിക്ഖേ, യഥാ ഹേട്ഠാ തഥാ നയേ;

നിദ്ദിട്ഠം സത്ഥവാഹേന വത്തം ആവാസികേഹിമേ.

ഗമികാ ദാരുമത്തി ച, വിവരിത്വാ ന പുച്ഛിയ;

നസ്സന്തി ച അഗുത്തഞ്ച, ഉജ്ഝായന്തി ച പേസലാ.

പടിസാമേത്വാ ഥകേത്വാ, ആപുച്ഛിത്വാവ പക്കമേ;

ഭിക്ഖു വാ സാമണേരോ വാ, ആരാമികോ ഉപാസകോ.

പാസാണകേസു ച പുഞ്ജം, പടിസാമേ ഥകേയ്യ ച;

സചേ ഉസ്സഹതി ഉസ്സുക്കം, അനോവസ്സേ തഥേവ ച.

സബ്ബോ ഓവസ്സതി ഗാമം, അജ്ഝോകാസേ തഥേവ ച;

അപ്പേവങ്ഗാനി സേസേയ്യും, വത്തം ഗമികഭിക്ഖുനാ.

നാനുമോദന്തി ഥേരേന, ഓഹായ ചതുപഞ്ചഹി;

വച്ചിതോ മുച്ഛിതോ ആസി, വത്താനുമോദനേസുമേ.

ഛബ്ബഗ്ഗിയാ ദുന്നിവത്ഥാ, അഥോപി ച ദുപ്പാരുതാ;

അനാകപ്പാ ച വോക്കമ്മ, ഥേരേ അനുപഖജ്ജനേ.

നവേ ഭിക്ഖൂ ച സങ്ഘാടി, ഉജ്ഝായന്തി ച പേസലാ;

തിമണ്ഡലം നിവാസേത്വാ, കായസഗുണഗണ്ഠികാ.

ന വോക്കമ്മ പടിച്ഛന്നം, സുസംവുതോക്ഖിത്തചക്ഖു;

ഉക്ഖിത്തോജ്ജഗ്ഘികാസദ്ദോ, തയോ ചേവ പചാലനാ.

ഖമ്ഭോഗുണ്ഠിഉക്കുടികാ, പടിച്ഛന്നം സുസംവുതോ;

ഓക്ഖിത്തുക്ഖിത്തഉജ്ജഗ്ഘി, അപ്പസദ്ദോ തയോ ചലാ.

ഖമ്ഭോഗുണ്ഠിപല്ലത്ഥി ച, അനുപഖജ്ജ നാസനേ;

ഓത്ഥരിത്വാന ഉദകേ, നീചം കത്വാന സിഞ്ചിയാ.

പടി സാമന്താ സങ്ഘാടി, ഓദനേ ച പടിഗ്ഗഹേ;

സൂപം ഉത്തരിഭങ്ഗേന, സബ്ബേസം സമതിത്ഥി ച.

സക്കച്ചം പത്തസഞ്ഞീ ച, സപദാനഞ്ച സൂപകം;

ന ഥൂപതോ പടിച്ഛാദേ, വിഞ്ഞത്തുജ്ഝാനസഞ്ഞിനാ.

മഹന്തമണ്ഡലദ്വാരം, സബ്ബഹത്ഥോ ന ബ്യാഹരേ;

ഉക്ഖേപോ ഛേദനാഗണ്ഡ, ധുനം സിത്ഥാവകാരകം.

ജിവ്ഹാനിച്ഛാരകഞ്ചേവ, ചപുചപു സുരുസുരു;

ഹത്ഥപത്തോട്ഠനില്ലേഹം, സാമിസേന പടിഗ്ഗഹേ.

യാവ ന സബ്ബേ ഉദകേ, നീചം കത്വാന സിഞ്ചിയം;

പടി സാമന്താ സങ്ഘാടി, നീചം കത്വാ ഛമായ ച.

സസിത്ഥകം നിവത്തന്തേ, സുപ്പടിച്ഛന്നമുക്കുടി;

ധമ്മരാജേന പഞ്ഞത്തം, ഇദം ഭത്തഗ്ഗവത്തനം.

ദുന്നിവത്ഥാ അനാകപ്പാ, അസല്ലേക്ഖേത്വാ ച സഹസാ;

ദൂരേ അച്ച ചിരം ലഹും, തഥേവ പിണ്ഡചാരികോ.

പടിച്ഛന്നോവ ഗച്ഛേയ്യ, സുംസവുതോക്ഖിത്തചക്ഖു;

ഉക്ഖിത്തോജ്ജഗ്ഘികാസദ്ദോ, തയോ ചേവ പചാലനാ.

ഖമ്ഭോഗുണ്ഠിഉക്കുടികാ, സല്ലക്ഖേത്വാ ച സഹസാ;

ദൂരേ അച്ച ചിരം ലഹും, ആസനകം കടച്ഛുകാ.

ഭാജനം വാ ഠപേതി ച, ഉച്ചാരേത്വാ പണാമേത്വാ;

പടിഗ്ഗഹേ ന ഉല്ലോകേ, സൂപേസുപി തഥേവ തം.

ഭിക്ഖു സങ്ഘാടിയാ ഛാദേ, പടിച്ഛന്നേവ ഗച്ഛിയം;

സംവുതോക്ഖിത്തചക്ഖു ച, ഉക്ഖിത്തോജ്ജഗ്ഘികായ ച;

അപ്പസദ്ദോ തയോ ചാലാ, ഖമ്ഭോഗുണ്ഠികഉക്കുടി.

പഠമാസനവക്കാര, പാനിയം പരിഭോജനീ;

പച്ഛാകങ്ഖതി ഭുഞ്ജേയ്യ, ഓപിലാപേയ്യ ഉദ്ധരേ.

പടിസാമേയ്യ സമ്മജ്ജേ, രിത്തം തുച്ഛം ഉപട്ഠപേ;

ഹത്ഥവികാരേ ഭിന്ദേയ്യ, വത്തിദം പിണ്ഡചാരികേ.

പാനീ പരി അഗ്ഗിരണി, നക്ഖത്തദിസചോരാ ച;

സബ്ബം നത്ഥീതി കോട്ടേത്വാ, പത്തംസേ ചീവരം തതോ.

ഇദാനി അംസേ ലഗ്ഗേത്വാ, തിമണ്ഡലം പരിമണ്ഡലം;

യഥാ പിണ്ഡചാരിവത്തം, നയേ ആരഞ്ഞകേസുപി.

പത്തംസേ ചീവരം സീസേ, ആരോഹിത്വാ ച പാനിയം;

പരിഭോജനിയം അഗ്ഗി, അരണീ ചാപി കത്തരം.

നക്ഖത്തം സപ്പദേസം വാ, ദിസാപി കുസലോ ഭവേ;

സത്തുത്തമേന പഞ്ഞത്തം, വത്തം ആരഞ്ഞകേസുമേ.

അജ്ഝോകാസേ ഓകിരിംസു, ഉജ്ഝായന്തി ച പേസലാ;

സചേ വിഹാരോ ഉക്ലാപോ, പഠമം പത്തചീവരം.

ഭിസിബിബ്ബോഹനം മഞ്ചം, പീഠഞ്ച ഖേളമല്ലകം;

അപസ്സേനുല്ലോകകണ്ണാ, ഗേരുകാ കാള അകതാ.

സങ്കാരം ഭിക്ഖുസാമന്താ, സേനാവിഹാരപാനിയം;

പരിഭോജനസാമന്താ, പടിവാതേ ച അങ്ഗണേ.

അധോവാതേ അത്ഥരണം, പടിപാദകമഞ്ചോ ച;

പീഠം ഭിസി നിസീദനം, മല്ലകം അപസ്സേന ച.

പത്തചീവരം ഭൂമി ച, പാരന്തം ഓരതോ ഭോഗം;

പുരത്ഥിമാ ച പച്ഛിമാ, ഉത്തരാ അഥ ദക്ഖിണാ.

സീതുണ്ഹേ ച ദിവാ രത്തിം, പരിവേണഞ്ച കോട്ഠകോ;

ഉപട്ഠാനഗ്ഗിസാലാ ച, വച്ചകുടീ ച പാനിയം.

ആചമനകുമ്ഭി വുഡ്ഢേ ച, ഉദ്ദേസപുച്ഛനാ സജ്ഝാ;

ധമ്മോ പദീപം വിജ്ഝാപേ, ന വിവരേ നപി ഥകേ.

യേന വുഡ്ഢോ പരിവത്തി, കണ്ണേനപി ന ഘട്ടയേ;

പഞ്ഞപേസി മഹാവീരോ, വത്തം സേനാസനേസു തം.

നിവാരിയമാനാ ദ്വാരം, മുച്ഛിതുജ്ഝന്തി പേസലാ;

ഛാരികം ഛഡ്ഡയേ ജന്താ, പരിഭണ്ഡം തഥേവ ച.

പരിവേണം കോട്ഠകോ സാലാ, ചുണ്ണമത്തികദോണികാ;

മുഖം പുരതോ ന ഥേരേ, ന നവേ ഉസ്സഹതി സചേ.

പുരതോ ഉപരിമഗ്ഗോ, ചിക്ഖല്ലം മത്തി പീഠകം;

വിജ്ഝാപേത്വാ ഥകേത്വാ ച, വത്തം ജന്താഘരേസുമേ.

നാചമേതി യഥാവുഡ്ഢം, പടിപാടി ച സഹസാ;

ഉബ്ഭജി നിത്ഥുനോ കട്ഠം, വച്ചം പസ്സാവ ഖേളകം.

ഫരുസാ കൂപ സഹസാ, ഉബ്ഭജി ചപു സേസേന;

ബഹി അന്തോ ച ഉക്കാസേ, രജ്ജു അതരമാനഞ്ച.

സഹസാ ഉബ്ഭജി ഠിതേ, നിത്ഥുനേ കട്ഠ വച്ചഞ്ച;

പസ്സാവ ഖേള ഫരുസാ, കൂപഞ്ച വച്ചപാദുകേ.

നാതിസഹസാ ഉബ്ഭജി, പാദുകായ ചപുചപു;

ന സേസയേ പടിച്ഛാദേ, ഉഹതപിധരേന ച.

വച്ചകുടീ പരിഭണ്ഡം, പരിവേണഞ്ച കോട്ഠകോ;

ആചമനേ ച ഉദകം, വത്തം വച്ചകുടീസുമേ.

ഉപാഹനാ ദന്തകട്ഠം, മുഖോദകഞ്ച ആസനം;

യാഗു ഉദകം ധോവിത്വാ, ഉദ്ധാരുക്ലാപ ഗാമ ച.

നിവാസനാ കായബന്ധാ, സഗുണം പത്തസോദകം;

പച്ഛാ തിമണ്ഡലോ ചേവ, പരിമണ്ഡല ബന്ധനം.

സഗുണം ധോവിത്വാ പച്ഛാ, നാതിദൂരേ പടിഗ്ഗഹേ;

ഭണമാനസ്സ ആപത്തി, പഠമാഗന്ത്വാന ആസനം.

ഉദകം പീഠകഥലി, പച്ചുഗ്ഗന്ത്വാ നിവാസനം;

ഓതാപേ നിദഹി ഭങ്ഗോ, ഓഭോഗേ ഭുഞ്ജിതു നമേ.

പാനീയം ഉദകം നീചം, മുഹുത്തം ന ച നിദഹേ;

പത്തചീവരം ഭൂമി ച, പാരന്തം ഓരതോ ഭോഗം.

ഉദ്ധരേ പടിസാമേ ച, ഉക്ലാപോ ച നഹായിതും;

സീതം ഉണ്ഹം ജന്താഘരം, ചുണ്ണം മത്തിക പിട്ഠിതോ.

പീഠഞ്ച ചീവരം ചുണ്ണം, മത്തികുസ്സഹതി മുഖം;

പുരതോ ഥേരേ നവേ ച, പരികമ്മഞ്ച നിക്ഖമേ.

പുരതോ ഉദകേ ന്ഹാതേ, നിവാസേത്വാ ഉപജ്ഝായം;

നിവാസനഞ്ച സങ്ഘാടി, പീഠകം ആസനേന ച.

പാദോ പീഠം കഥലിഞ്ച, പാനീയുദ്ദേസപുച്ഛനാ;

ഉക്ലാപം സുസോധേയ്യ, പഠമം പത്തചീവരം.

നിസീദനപച്ചത്ഥരണം, ഭിസി ബിബ്ബോഹനാനി ച;

മഞ്ചോ പീഠം പടിപാദം, മല്ലകം അപസ്സേന ച.