൫. വചീഭേദകഥാവണ്ണനാ

൩൨൬. സോതി പഠമമഗ്ഗട്ഠോ. തസ്മാതി യസ്മാ ‘‘വിരജം വീതമലം ധമ്മചക്ഖും ഉദപാദി ‘യം കിഞ്ചി സമുദയധമ്മം, സബ്ബം തം നിരോധധമ്മ’’’ന്തി സുത്തസ്സ അത്ഥം അഞ്ഞഥാ ഗഹേത്വാ ഉദയബ്ബയാനുപസ്സനാനിസ്സന്ദേന മഗ്ഗക്ഖണേപി ദുക്ഖന്തി വിപസ്സനാ ഉപട്ഠാതി, തസ്മാ ‘‘സോ ദുക്ഖമിച്ചേവ വാചം ഭാസതീ’’തി വദന്തി.

൩൨൮. ഇച്ഛിതേതി പരവാദിനാ സമ്പടിച്ഛിതേ. ആരോപിതേതി യുത്തിനിദ്ധാരണേന തസ്മിം അത്ഥേ പതിട്ഠാപിതേ യുജ്ജതി, വചീസമുട്ഠാപനക്ഖണതോ പന പച്ഛാ തം സദ്ദം സുണാതീതി ഇച്ഛിതേ ന യുജ്ജതി സോതവിഞ്ഞാണസ്സ പച്ചുപ്പന്നാരമ്മണത്താതി അധിപ്പായോ. യസ്മാ പന അത്തനാ നിച്ഛാരിതം സദ്ദം അത്തനാപി സുണാതി, തസ്മാ സോതവിഞ്ഞാണം ‘‘യേന തം സദ്ദം സുണാതീ’’തി അട്ഠകഥായം വുത്തന്തി ദട്ഠബ്ബം.

൩൩൨. ലോകുത്തരമഗ്ഗക്ഖണേതി പഠമജ്ഝാനികസ്സ പഠമമഗ്ഗസ്സ ഖണേ. അഭിഭൂസുത്താഹരണേ അധിപ്പായോ വത്തബ്ബോതി ഏതേന തദാഹരണസ്സ അസമ്ബന്ധതം ദസ്സേതി. തേനാഹ ‘‘തസ്മാ അസാധക’’ന്തി.

വചീഭേദകഥാവണ്ണനാ നിട്ഠിതാ.