൨. സംസന്ദനബ്രഹ്മചരിയകഥാവണ്ണനാ

൨൭൩. രൂപാവചരമഗ്ഗേനാതി രൂപാവചരജ്ഝാനേന. തഞ്ഹി രൂപഭവൂപപത്തിയാ ഉപായഭാവതോ മഗ്ഗോതി വുത്തോ. യഥാഹ ‘‘രൂപുപപത്തിയാ മഗ്ഗം ഭാവേതീ’’തി (ധ. സ. ൧൬൦). ഇദന്തി ഇദം രൂപാവചരജ്ഝാനം. ‘‘ഇധവിഹായനിട്ഠഹേതുഭൂതോ രൂപാവചരമഗ്ഗോ’’തിആദികം ദീപേന്തം വചനം അനാഗാമിമഗ്ഗസ്സ തബ്ഭാവദീപകേന ‘‘ഇധ ഭാവിതമഗ്ഗോ’’തിആദികേന കഥം സമേതീതി ചോദേത്വാ യഥാ സമേതി, തം ദസ്സേതും ‘‘പുബ്ബേ പനാ’’തിആദി വുത്തം. തത്ഥ ‘‘പുബ്ബേ’’തി ഇമിനാ ‘‘ഇധ ഭാവിതമഗ്ഗോ’’തിആദികം വദന്തി, ഇധാപി പന ‘‘രൂപാവചരമഗ്ഗേനാ’’തിആദികം. തത്ഥ അനാഗാമീ ഏവാതി അനാഗാമിഫലട്ഠോ ഏവ. ഝാനാനാഗാമീതി അസമുച്ഛിന്നജ്ഝത്തസംയോജനോപി രൂപഭവേ ഉപ്പജ്ജിത്വാ അനാവത്തിധമ്മമഗ്ഗം ഭാവേത്വാ തത്ഥേവ പരിനിബ്ബായനതോ. അധിപ്പായോതി യഥാവുത്തോ ദ്വിന്നം അട്ഠകഥാവചനാനം അവിരോധദീപകോ അധിപ്പായോ.

ഇധാതി കാമലോകേ. തത്ഥാതി ബ്രഹ്മലോകേ. ഏത്ഥ ച പരവാദീ ഏവം പുച്ഛിതബ്ബോ ‘‘തീഹി, ഭിക്ഖവേ, ഠാനേഹീ’’തി സുത്തം കിം യഥാരുതവസേന ഗഹേതബ്ബത്ഥം, ഉദാഹു സന്ധായഭാസിതന്തി? തത്ഥ ജാനമാനോ സന്ധായഭാസിതന്തി വദേയ്യ. അഞ്ഞഥാ ‘‘പരനിമ്മിതവസവത്തിദേവേ ഉപാദായാ’’തിആദി വത്തും ന സക്കാ ‘‘ദേവേ ച താവതിംസേ’’തി വുത്തത്താ. യഥാ ഹി തസ്സ ‘‘സേയ്യഥാപി ദേവേഹി താവതിംസേഹി സദ്ധിം മന്തേത്വാ’’തിആദീസു വിയ സക്കം ദേവരാജാനം ഉപാദായ കാമാവചരദേവേസു താവതിംസദേവാ പാകടാ പഞ്ഞാതാതി തേസം ഗഹണം, ന തേയേവ അധിപ്പേതാതി സുത്തപദസ്സ സന്ധായഭാസിതത്ഥം സമ്പടിച്ഛിതബ്ബം, ഏവം ‘‘ഇധ ബ്രഹ്മചരിയവാസോ’’തി ഏത്ഥാപി അനവജ്ജസുഖഅബ്യാസേകസുഖനേക്ഖമ്മസുഖാദിസന്നിസ്സയഭാവേന മഹാനിസംസതായ സാസനേ പബ്ബജ്ജാ ‘‘ഇധ ബ്രഹ്മചരിയവാസോ’’തി ഇമസ്മിം സുത്തേ അധിപ്പേതാ. സാ ഹി ഉത്തരകുരുകാനം ദേവാനഞ്ച അനോകാസഭാവതോ ദുക്കരാ ദുല്ലഭാ ച. തത്ഥ സൂരിയപരിവത്താദീഹിപി ദേവേസു മഗ്ഗപടിലാഭായ അത്ഥിതാ വിഭാവേതബ്ബാ, ഉത്തരകുരുകാനം പന വിസേസാനധിഗമഭാവോ ഉഭിന്നമ്പി ഇച്ഛിതോ ഏവാതി.

സംസന്ദനബ്രഹ്മചരിയകഥാവണ്ണനാ നിട്ഠിതാ.

ബ്രഹ്മചരിയകഥാവണ്ണനാ നിട്ഠിതാ.