൧൨. ഉപാദാപഞ്ഞത്താനുയോഗവണ്ണനാ

൯൭. നീലഗുണയോഗതോ നീലോ, നീലോ ഏവ നീലകോ, തസ്സ, അയം പനസ്സ നീലപഞ്ഞത്തി നീലരൂപുപാദാനാതി ആഹ ‘‘നീലം…പേ… പഞ്ഞത്തീ’’തി. ഏവം പന പാഠേ ഠിതേ നീലം ഉപാദായ നീലോതി കഥമയം പദുദ്ധാരോതി ആഹ ‘‘നീലം രൂപം…പേ… ഏത്ഥ യോ പുട്ഠോ നീലം ഉപാദായ നീലോ’’തി. ഏത്ഥാതി ഏതസ്മിം വചനേ. തദാദീസൂതി ‘‘പീതം രൂപം ഉപാദായാ’’തിആദികം അട്ഠകഥായം ആദി-സദ്ദേന ഗഹിതമേവ തദത്ഥദസ്സനവസേന ഗണ്ഹാതി.

൯൮. വുത്തന്തി ‘‘മഗ്ഗകുസലോ’’തിആദീസു ഛേകട്ഠം സന്ധായ വുത്തം. കുസലപഞ്ഞത്തിം കുസലവോഹാരം.

൧൧൨. പുബ്ബപക്ഖം ദസ്സേത്വാ ഉത്തരമാഹാതി പരവാദീ പുബ്ബപക്ഖം ദസ്സേത്വാ സകവാദിസ്സ ഉത്തരമാഹ.

൧൧൫. ‘‘രൂപം രൂപവാ’’തിആദിനയപ്പവത്തം പരവാദിവാദം ഭിന്ദിതും ‘‘യഥാ ന നിഗളോ നേഗളികോ’’തിആദിനാ സകവാദിവാദോ ആരദ്ധോതി ആഹ ‘‘യസ്സ രൂപം സോ രൂപവാതി ഉത്തരപക്ഖേ വുത്തം വചനം ഉദ്ധരിത്വാ’’തി.

൧൧൮. വിഞ്ഞാണനിസ്സയഭാവൂപഗമനന്തി ചക്ഖുവിഞ്ഞാണസ്സ നിസ്സയഭാവൂപഗമനം. തയിദം വിസേസനം ചക്ഖുസ്സാതി ഇമിനാവ സിദ്ധന്തി ന കതം ദട്ഠബ്ബം.

ഉപാദാപഞ്ഞത്താനുയോഗവണ്ണനാ നിട്ഠിതാ.