൪. ഞാണകഥാവണ്ണനാ

൬൧൪-൬൧൫. ‘‘അന്ധകാ’’തി വുത്താ പുബ്ബസേലിയഅപരസേലിയരാജഗിരികസിദ്ധത്ഥികാപി യേഭുയ്യേന മഹാസങ്ഘികാ ഏവാതി വുത്തം ‘‘പുബ്ബേ…പേ… ഭവേയ്യു’’ന്തി. തത്ഥ അഞ്ഞേതി വചനം ദ്വിന്നം കഥാനം ഉജുവിപച്ചനീകഭാവതോ. പുരിമകാനഞ്ഹി ചക്ഖുവിഞ്ഞാണാദിസമങ്ഗീ ‘‘ഞാണീ’’തി വുച്ചതി, ഇമേസം സോ ഏവ ‘‘ഞാണീ’’തി ന വത്തബ്ബോതി വുത്തോ. രാഗവിഗമോ രാഗസ്സ സമുച്ഛിന്ദനം, തഥാ അഞ്ഞാണവിഗമോ. യഥാ സമുച്ഛിന്നാവിജ്ജോ ‘‘ഞാണീ’’തി, പടിപക്ഖതോ ‘‘അഞ്ഞാണീ’’തി, ഏവം അസമുച്ഛിന്നാവിജ്ജോ ‘‘അഞ്ഞാണീ’’തി, പടിപക്ഖതോ ‘‘ഞാണീ’’തി വുത്തോ. അഞ്ഞാണസ്സ വിഗതത്താ സോ ‘‘ഞാണീ’’തി വത്തബ്ബതം ആപജ്ജതി, ന പന സതതം സമിതം ഞാണസ്സ പവത്തനതോതി അധിപ്പായോ.

ഞാണകഥാവണ്ണനാ നിട്ഠിതാ.