൭. ഇദ്ധിബലകഥാവണ്ണനാ

൬൨൧-൬൨൪. യസ്മിം ആയുകപ്പേ കമ്മക്ഖയേന മരണം ഹോതി, തം സന്ധായ വുത്തം ‘‘കമ്മസ്സ വിപാകവസേനാ’’തി, യസ്മിം പന ആയുക്ഖയേന മരണം ഹോതി, തം സന്ധായ ‘‘വസ്സഗണനായാ’’തി. തത്ഥ ‘‘ന ച താവ കാലം കരോതി, യാവ ന തം പാപകമ്മം ബ്യന്തീ ഹോതീ’’തി (മ. നി. ൩.൨൫൦; അ. നി. ൩.൩൬) വചനതോ യേഭുയ്യേന നിരയേ കമ്മക്ഖയേന മരണം ഹോതീതി ആഹ ‘‘കമ്മസ്സ വിപാകവസേന വാതി നിരയംവ സന്ധായ വുത്ത’’ന്തി. ‘‘വസ്സസതം വസ്സസഹസ്സം വസ്സസതസഹസ്സാനീ’’തിആദിനാ മനുസ്സാനം ദേവാനഞ്ച ആയുപരിച്ഛേദവചനതോ യേഭുയ്യേന തേസം ആയുക്ഖയേന മരണം ഹോതീതി വുത്തം ‘‘വസ്സഗണനായ വാതി മനുസ്സേ ചാതുമഹാരാജികാദിദേവേ ച സന്ധായാ’’തി. ‘‘വുത്ത’’ന്തി ആനേത്വാ യോജേതബ്ബം.

ഇദ്ധിബലകഥാവണ്ണനാ നിട്ഠിതാ.