൫. ചീവരപടിഗ്ഗഹണസിക്ഖാപദവണ്ണനാ

൫൦൮. പഞ്ചമേ അപഞ്ഞത്തേ സിക്ഖാപദേതി ഗണമ്ഹാ ഓഹീയനസിക്ഖാപദേ അപഞ്ഞത്തേ. വിഹാരവാരന്തി വിഹാരപടിജഗ്ഗനവാരം. കോട്ഠാസസമ്പത്തീതി സകലാ അങ്ഗപച്ചങ്ഗസമ്പത്തി. സബ്ബപരിയന്തന്തി ഛട്ഠസ്സ അഞ്ഞചീവരസ്സ അഭാവാ പഞ്ചന്നം ചീവരാനം ഏകമേകം സബ്ബേസം പരിയന്തന്തി സബ്ബപരിയന്തം. അന്തരവാസകാദീസു ഹി പഞ്ചസു ഏകമേകം അഞ്ഞസ്സ ഛട്ഠസ്സ അഭാവാ പഞ്ചന്നം അന്തമേവ ഹോതി. അഥവാ പഞ്ചസു ചീവരേസു ഏകമേകം അത്തനോ അഞ്ഞസ്സ ദുതിയസ്സ അഭാവാ അന്തമേവ ഹോതീതി സബ്ബമേവ പരിയന്തന്തി സബ്ബപരിയന്തം, സബ്ബസോ വാ പരിയന്തന്തി സബ്ബപരിയന്തം. തേനാഹ – ‘‘അഞ്ഞം…പേ… നത്ഥീ’’തി. യഥാ തസ്സ മനോരഥോ ന പൂരതീതി ‘‘സരീരപാരിപൂരിം പസ്സിസ്സാമീ’’തി തസ്സ ഉപ്പന്നോ മനോരഥോ യഥാ ന പൂരതി. ഏവം ഹത്ഥതലേയേവ ദസ്സേത്വാതി സരീരം അദസ്സേത്വാവ ദാതബ്ബചീവരം ഹത്ഥതലേ ‘‘ഹന്ദാ’’തി ദസ്സേത്വാ.

൫൧൦. വിഹത്ഥതായാതി വിഹതഹത്ഥതായ, അഗണതായ അപ്പച്ചയതായ അപ്പടിസരണതായാതി വുത്തം ഹോതി. സമഭിതുന്നത്താതി പീളിതത്താ. പരിവത്തേതബ്ബം പരിവത്തം, പരിവത്തമേവ പാരിവത്തകം, പരിവത്തേത്വാ ദീയമാനന്തി അത്ഥോ.

൫൧൨. ഉപചാരേതി ദ്വാദസഹത്ഥൂപചാരം സന്ധായ വദതി. ഉപചാരം വാ മുഞ്ചിത്വാ ഖിപന്തീതി ദ്വാദസഹത്ഥം മുഞ്ചിത്വാ ഓരതോ ഠപേന്തി, ന പുരിമസിക്ഖാപദേ വിയ ദ്വാദസഹത്ഥബ്ഭന്തരേയേവാതി അധിപ്പായോ. അഞ്ഞത്ര പാരിവത്തകാതി യം അന്തമസോ ഹരീതകഖണ്ഡമ്പി ദത്വാ വാ ദസ്സാമീതി ആഭോഗം കത്വാ വാ പാരിവത്തകം ഗണ്ഹാതി, തം ഠപേത്വാ. അചിത്തകഭാവേന ന സമേതീതി യഥാ അഞ്ഞാതികായ ഞാതികസഞ്ഞിസ്സ വേമതികസ്സ ച ഗണ്ഹതോ അചിത്തകത്താ ആപത്തി, ഏവമിധാപി ‘‘ഭിക്ഖുനിയാ സന്തകം ഇദ’’ന്തി അജാനിത്വാ ഗണ്ഹതോപി ആപത്തിയേവാതി അധിപ്പായോ. വസ്സാവാസികം ദേതീതി പുഗ്ഗലികം കത്വാ ദേതി. പംസുകൂലം അത്തനോ അത്ഥായ ഠപിതഭാവം ജാനിത്വാ ഗണ്ഹന്തേനപി അഞ്ഞസ്സ സന്തകം ഗഹിതം നാമ ന ഹോതീതി ആഹ – ‘‘സചേ പന സങ്കാരകൂടാദീസൂ’’തിആദി. അസാമികഞ്ഹി പംസുകൂലന്തി വുച്ചതി. പംസുകൂലം അധിട്ഠഹിത്വാതി ‘‘അസാമികം ഇദ’’ന്തി സഞ്ഞം ഉപ്പാദേത്വാ. ഏവം പന പംസുകൂലസഞ്ഞം അനുപ്പാദേത്വാ ഗണ്ഹിതും ന വട്ടതി.

൫൧൩. അഞ്ഞാതികായ അഞ്ഞാതികസഞ്ഞീതി തികപാചിത്തിയന്തി ഏത്ഥ ഇതി-സദ്ദോ ആദിഅത്ഥോ. തീണി പരിമാണമസ്സാതി തികം, തികഞ്ച തം പാചിത്തിയഞ്ചാതി തികപാചിത്തിയം, തീണി പാചിത്തിയാനീതി അത്ഥോ.

൫൧൪. പത്തത്ഥവികാദിം യംകിഞ്ചീതി അനധിട്ഠാനുപഗം സന്ധായ വദതി. ‘‘ചീവരം നാമ ഛന്നം ചീവരാനം അഞ്ഞതരം ചീവരം വികപ്പനുപഗം പച്ഛിമ’’ന്തി ഹി വുത്തത്താ അധിട്ഠാനുപഗം യംകിഞ്ചി ന വട്ടതി. തേനേവാഹ – ‘‘വികപ്പനുപഗപച്ഛിമചീവരപ്പമാണ’’ന്തിആദി. യസ്മാ ഭിസിച്ഛവി മഹന്താപി സേനാസനസങ്ഗഹിതത്താ ചീവരസങ്ഖ്യം ന ഗച്ഛതീതി നേവ അധിട്ഠാനുപഗാ ന വികപ്പനുപഗാ ച, തസ്മാ അനധിട്ഠാനുപഗസാമഞ്ഞതോ വുത്തം. സചേപി മഞ്ചപ്പമാണാ ഭിസിച്ഛവി ഹോതി, വട്ടതിയേവാതി. കോ പന വാദോ പത്തത്ഥവികാദീസൂതി മഹതിയാപി താവ ഭിസിച്ഛവിയാ അനധിട്ഠാനുപഗത്താ അനാപത്തി, തതോ ഖുദ്ദകതരേസു അനധിട്ഠാനുപഗേസു പത്തത്ഥവികാദീസു കിമേവ വത്തബ്ബന്തി അധിപ്പായോ. പടിഗ്ഗഹണം കിരിയാ, അപരിവത്തനം അകിരിയാ. വികപ്പനുപഗചീവരതാ, പാരിവത്തകാഭാവോ, അഞ്ഞാതികായ ഹത്ഥതോ ഗഹണന്തി ഇമാനേത്ഥ തീണി അങ്ഗാനി.

ചീവരപടിഗ്ഗഹണസിക്ഖാപദവണ്ണനാ നിട്ഠിതാ.