൩. പരമ്പരഭോജനസിക്ഖാപദവണ്ണനാ

൨൨൧. തതിയേ കുലപടിപാടിയാ അബ്ബോച്ഛിന്നം കത്വാ നിരന്തരം ദിയ്യമാനത്താ ‘‘ഭത്തപടിപാടി അട്ഠിതാ ഹോതീ’’തി പാളിയം വുത്തം, അന്തരാ അട്ഠത്വാ നിരന്തരം പവത്താതി വുത്തം ഹോതി. ഉപചാരവസേനാതി വോഹാരവസേന. ന ഹി സോ ബദരമത്തമേവ ദേതി, ഉപചാരവസേന പന ഏവം വദതി. ബദരചുണ്ണസക്ഖരാദീഹി പയോജിതം ‘‘ബദരസാളവ’’ന്തി വുച്ചതി.

൨൨൬. വികപ്പനാവസേനേവ തം ഭത്തം അസന്തം നാമ ഹോതീതി അനുപഞ്ഞത്തിവസേന വികപ്പനം അട്ഠപേത്വാ യഥാപഞ്ഞത്തം സിക്ഖാപദമേവ ഠപിതം. പരിവാരേ പന വികപ്പനായ അനുജാനനമ്പി അനുപഞ്ഞത്തിസമാനന്തി കത്വാ ‘‘ചതസ്സോ അനുപഞ്ഞത്തിയോ’’തി വുത്തം. മഹാപച്ചരിആദീസു വുത്തനയം പച്ഛാ വദന്തോ പാളിയാ സംസന്ദനതോ പരമ്മുഖാവികപ്പനമേവ പതിട്ഠാപേസി. കേചി പന ‘‘തദാ അത്തനോ സന്തികേ ഠപേത്വാ ഭഗവന്തം അഞ്ഞസ്സ അഭാവതോ ഥേരോ സമ്മുഖാവികപ്പനം നാകാസി, ഭഗവതാ ച വിസും സമ്മുഖാവികപ്പനാ ന വുത്താ, തഥാപി സമ്മുഖാവികപ്പനാപി വട്ടതീ’’തി വദന്തി. തേനേവ മാതികാഅട്ഠകഥായമ്പി (കങ്ഖാ. അട്ഠ. പരമ്പരഭോജനസിക്ഖാപദവണ്ണനാ) ‘‘യോ ഭിക്ഖു പഞ്ചസു സഹധമ്മികേസു അഞ്ഞതരസ്സ ‘മയ്ഹം ഭത്തപച്ചാസം തുയ്ഹം ദമ്മീ’തി വാ ‘വികപ്പേമീ’തി വാ ഏവം സമ്മുഖാ വാ ‘ഇത്ഥന്നാമസ്സ ദമ്മീ’തി വാ ‘വികപ്പേമീ’തി വാ ഏവം പരമ്മുഖാ വാ പഠമനിമന്തനം അവികപ്പേത്വാ പച്ഛാ നിമന്തിതകുലേ ലദ്ധഭിക്ഖതോ ഏകസിത്ഥമ്പി അജ്ഝോഹരതി, പാചിത്തിയ’’ന്തി വുത്തം.

൨൨൯. പഞ്ചഹി ഭോജനേഹി നിമന്തിതസ്സ യേന യേന പഠമം നിമന്തിതോ, തസ്സ തസ്സ ഭോജനതോ ഉപ്പടിപാടിയാ അവികപ്പേത്വാ വാ പരസ്സ പരസ്സ ഭോജനം പരമ്പരഭോജനന്തി ആഹ ‘‘സചേ പന മൂലനിമന്തനം ഹേട്ഠാ ഹോതി, പച്ഛിമം പച്ഛിമം ഉപരി, തം ഉപരിതോ പട്ഠായ ഭുഞ്ജന്തസ്സ ആപത്തീ’’തി. ഹത്ഥം അന്തോ പവേസേത്വാ സബ്ബഹേട്ഠിമം ഗണ്ഹന്തസ്സ മജ്ഝേ ഠിതമ്പി അന്തോഹത്ഥഗതം ഹോതീതി ആഹ ‘‘ഹത്ഥം പന…പേ… യഥാ തഥാ വാ ഭുഞ്ജന്തസ്സ അനാപത്തീ’’തി. ഖീരസ്സ രസസ്സ ച ഭത്തേന അമിസ്സം ഹുത്വാ ഉപരി ഠിതത്താ ‘‘ഖീരം വാ രസം വാ പിവതോ അനാപത്തീ’’തി വുത്തം.

മഹാഉപാസകോതി ഗേഹസാമികോ. ‘‘മഹാഅട്ഠകഥായം ‘ആപത്തീ’തി വചനേന കുരുന്ദിയം ‘വട്ടതീ’തി വചനം വിരുദ്ധം വിയ ദിസ്സതി, ദ്വിന്നമ്പി അധിപ്പായോ മഹാപച്ചരിയം വിഭാവിതോ’’തി മഹാഗണ്ഠിപദേസു വുത്തം. സബ്ബേ നിമന്തേന്തീതി അകപ്പിയനിമന്തനേന നിമന്തേന്തി. ‘‘പരമ്പരഭോജനം നാമ പഞ്ചന്നം ഭോജനാനം അഞ്ഞതരേന ഭോജനേന നിമന്തിതോ, തം ഠപേത്വാ അഞ്ഞം പഞ്ചന്നം ഭോജനാനം അഞ്ഞതരം ഭോജനം ഭുഞ്ജതി, ഏതം പരമ്പരഭോജനം നാമാ’’തി വുത്തത്താ സതിപി ഭിക്ഖാചരിയായ പഠമം ലദ്ധഭാവേ ‘‘പിണ്ഡായ ചരിത്വാ ലദ്ധഭത്തം ഭുഞ്ജതി, ആപത്തീ’’തി വുത്തം. അവികപ്പവസേന ‘‘വചീകമ്മ’’ന്തി വുത്തം. സേസമേത്ഥ ഉത്താനമേവ. പരമ്പരഭോജനതാ, സമയാഭാവോ, അജ്ഝോഹരണന്തി ഇമാനി പനേത്ഥ തീണി അങ്ഗാനി.

പരമ്പരഭോജനസിക്ഖാപദവണ്ണനാ നിട്ഠിതാ.