൧. ആവസഥപിണ്ഡസിക്ഖാപദവണ്ണനാ

൨൦൬. ഭോജനവഗ്ഗസ്സ പഠമസിക്ഖാപദേ അദ്ധയോജനം വാ യോജനം വാ ഗന്തും സക്കോതീതി ഏത്ഥ തത്തകം ഗന്തും സക്കോന്തസ്സപി താവതകം ഗന്ത്വാ അലദ്ധഭിക്ഖസ്സ ഇതോ ഭുഞ്ജിതും വട്ടതി. ഇമേസംയേവാതി ഇമേസം പാസണ്ഡാനംയേവ. ഏത്തകാനന്തി ഇമസ്മിം പാസണ്ഡേ ഏത്തകാനം. ഏകദിവസം ഭുഞ്ജിതബ്ബന്തി ഏകദിവസം സകിംയേവ ഭുഞ്ജിതബ്ബം. ‘‘ഏകദിവസം ഭുഞ്ജിതബ്ബ’’ന്തി വചനതോ പന ഏകസ്മിം ദിവസേ പുനപ്പുനം ഭുഞ്ജിതും വട്ടതീതി ന ഗഹേതബ്ബം. പുന ആദിതോ പട്ഠായ ഭുഞ്ജിതും ന വട്ടതീതി ഇമിനാ പഠമം ഭുത്തട്ഠാനേസു പുന ഏകസ്മിമ്പി ഠാനേ ഭുഞ്ജിതും ന വട്ടതീതി ദസ്സേതി.

൨൦൮. ‘‘ഗച്ഛന്തോ വാ ആഗച്ഛന്തോ വാതി ഇദം അദ്ധയോജനവസേന ഗഹേതബ്ബ’’ന്തി വദന്തി. അന്തരാമഗ്ഗേ ഗതട്ഠാനേതി ഏകസ്സേവ സന്തകം സന്ധായ വുത്തം. ‘‘ആഗച്ഛന്തേപി ഏസേവ നയോ’’തി സങ്ഖേപേന വുത്തമേവത്ഥം വിഭാവേന്തോ ‘‘ഗന്ത്വാ പച്ചാഗച്ഛന്തോ’’തിആദിമാഹ. ആപത്തിട്ഠാനേയേവ പുന ഭുഞ്ജന്തസ്സ അനാപത്തി വത്തബ്ബാതി ഗമനേ ആഗമനേ ച പഠമം ഭോജനം അവത്വാ അന്തരാമഗ്ഗേ ഏകദിവസം ഗതട്ഠാനേ ച ഏകദിവസന്തി പുനപ്പുനം ഭോജനമേവ ദസ്സിതം, ഗമനദിവസേ പന ആഗമനദിവസേ ച ‘‘ഗമിസ്സാമി ആഗമിസ്സാമീ’’തി ഭുഞ്ജിതും വട്ടതിയേവ. സുദ്ധചിത്തേന പുനപ്പുനം ഭുഞ്ജന്തസ്സപി പുനപ്പുനം ഭോജനേ അനാപത്തി. അഞ്ഞസ്സത്ഥായ ഉദ്ദിസിത്വാ പഞ്ഞത്തം ഭിക്ഖുനോ ഗഹേതുമേവ ന വട്ടതീതി ആഹ ‘‘ഭിക്ഖൂനംയേവ അത്ഥായാ’’തി. സേസമേത്ഥ ഉത്താനമേവ. ആവസഥപിണ്ഡതാ, അഗിലാനതാ, അനുവസിത്വാ ഭോജനന്തി ഇമാനി പനേത്ഥ തീണി അങ്ഗാനി.

ആവസഥപിണ്ഡസിക്ഖാപദവണ്ണനാ നിട്ഠിതാ.