൬. ചീവരസിബ്ബാപനസിക്ഖാപദവണ്ണനാ

൧൭൫. ഛട്ഠേ സചേ സാ ഭിക്ഖുനീ തം ചീവരം ആദിതോവ പാരുപേയ്യ, അഞ്ഞാ ഭിക്ഖുനിയോ ദിസ്വാ ഉജ്ഝാപേയ്യും, തതോ മഹാജനോ പസ്സിതും ന ലഭതീതി മഞ്ഞമാനോ ‘‘യഥാസംഹടം ഹരിത്വാ നിക്ഖിപിത്വാ’’തിആദിമാഹ.

൧൭൬. നീഹരതീതി സകിം നീഹരതി. യേപി തേസം നിസ്സിതകാതി സമ്ബന്ധോ. കഥിനവത്തന്തി ‘‘സബ്രഹ്മചാരീനം കാതും വട്ടതീ’’തി ഇതികത്തബ്ബതാവസേന സൂചികമ്മകരണം. ആചരിയുപജ്ഝായാനം ദുക്കടന്തി അകപ്പിയസമാദാനവസേന ദുക്കടം. വഞ്ചേത്വാതി ‘‘തവ ഞാതികായാ’’തി അവത്വാ ‘‘ഏകിസ്സാ ഭിക്ഖുനിയാ’’തി ഏത്തകമേവ വത്വാ. ‘‘ഏകിസ്സാ ഭിക്ഖുനിയാ’’തി സുത്വാ തേ അഞ്ഞാതികസഞ്ഞിനോ ഭവേയ്യുന്തി ആഹ ‘‘അകപ്പിയേ നിയോജിതത്താ’’തി. ‘‘ഇദം തേ മാതു ചീവര’’ന്തിആദീനി അവത്വാപി ‘‘ഇദം ചീവരം സിബ്ബേഹീ’’തി സുദ്ധചിത്തേന സിബ്ബാപേന്തസ്സപി അനാപത്തി.

൧൭൯. ഉപാഹനത്ഥവികാദിന്തി ആദി-സദ്ദേന യം ചീവരം നിവാസേതും വാ പാരുപിതും വാ ന സക്കാ ഹോതി, തമ്പി സങ്ഗണ്ഹാതി. സേസമേത്ഥ ഉത്താനമേവ. അഞ്ഞാതികായ ഭിക്ഖുനിയാ സന്തകതാ, നിവാസനപാരുപനൂപഗതാ, വുത്തനയേന സിബ്ബനം വാ സിബ്ബാപനം വാതി ഇമാനി പനേത്ഥ തീണി അങ്ഗാനി.

ചീവരസിബ്ബാപനസിക്ഖാപദവണ്ണനാ നിട്ഠിതാ.