൭. സംവിദഹനസിക്ഖാപദവണ്ണനാ

൧൮൧. സത്തമേ ‘‘പച്ഛാ ഗച്ഛന്തീനം ചോരാ അച്ഛിന്ദിംസൂ’’തി ഏത്ഥ ‘‘പത്തചീവര’’ന്തി പാഠസേസോതി ആഹ ‘‘പച്ഛാ ഗച്ഛന്തീനം പത്തചീവര’’ന്തി. താ ഭിക്ഖുനിയോതി പച്ഛാ ഗച്ഛന്തിയോ ഭിക്ഖുനിയോ. ‘‘പച്ഛാ ഗച്ഛന്തീന’’ന്തി ച വിഭത്തിവിപരിണാമേനേത്ഥ സമ്ബന്ധോ വേദിതബ്ബോ. പാളിയം ‘‘ഗച്ഛാമ ഭഗിനി, ഗച്ഛാമ അയ്യാ’’തി ഭിക്ഖുപുബ്ബകം സംവിധാനം വുത്തം, ‘‘ഗച്ഛാമ അയ്യ, ഗച്ഛാമ ഭഗിനീ’’തി ഭിക്ഖുനീപുബ്ബകം. ഏകദ്ധാനമഗ്ഗന്തി ഏകം അദ്ധാനസങ്ഖാതം മഗ്ഗം, ഏകതോ വാ അദ്ധാനമഗ്ഗം. ഹിയ്യോതി സുവേ. പരേതി തതിയദിവസേ.

൧൮൨-൧൮൩. ദ്വിധാ വുത്തപ്പകാരോതി പാദഗമനവസേന പക്ഖഗമനവസേന വാതി ദ്വിധാ വുത്തപ്പഭേദോ. ചതുന്നം മഗ്ഗാനം സമ്ബന്ധട്ഠാനം ചതുക്കം, തിണ്ണം മഗ്ഗാനം സമ്ബന്ധട്ഠാനം സിങ്ഘാടകം. ‘‘ഗാമന്തരേ ഗാമന്തരേ’’തി ഏത്ഥ അഞ്ഞോ ഗാമോ ഗാമന്തരന്തി ആഹ ‘‘നിക്ഖമനേ അനാപത്തി…പേ… ഭിക്ഖുനോ പാചിത്തിയ’’ന്തി. ‘‘സംവിധായാ’’തി പാളിയം അവിസേസേന വുത്തത്താ ‘‘നേവ പാളിയാ സമേതീ’’തി വുത്തം, ‘‘ഏത്ഥന്തരേ സംവിദഹിതേപി ഭിക്ഖുനോ ദുക്കട’’ന്തി വുത്തത്താ ‘‘ന സേസഅട്ഠകഥായ സമേതീ’’തി വുത്തം. അദ്ധയോജനം അതിക്കമന്തസ്സാതി അസതി ഗാമേ അദ്ധയോജനം അതിക്കമന്തസ്സ. യത്ഥ ഹി അദ്ധയോജനബ്ഭന്തരേ അഞ്ഞോ ഗാമോ ന ഹോതി, തം ഇധ അഗാമകം അരഞ്ഞന്തി അധിപ്പേതം, അദ്ധയോജനബ്ഭന്തരേ പന ഗാമേ സതി ഗാമന്തരഗണനായ ഏവ ആപത്തി.

൧൮൫. രട്ഠഭേദേതി രട്ഠവിലോപേ. ചക്കസമാരുള്ഹാതി ഇരിയാപഥചക്കം സകടചക്കം വാ സമാരുള്ഹാ. സേസം ഉത്താനമേവ. ദ്വിന്നമ്പി സംവിദഹിത്വാ മഗ്ഗപ്പടിപത്തി, അവിസങ്കേതം, സമയാഭാവോ, അനാപദാ, ഗാമന്തരോക്കമനം വാ അദ്ധയോജനാതിക്കമോ വാതി ഇമാനി പനേത്ഥ പഞ്ച അങ്ഗാനി. ഏകതോഉപസമ്പന്നാദീഹി സദ്ധിം ഗച്ഛന്തസ്സ പന മാതുഗാമസിക്ഖാപദേന ആപത്തി.

സംവിദഹനസിക്ഖാപദവണ്ണനാ നിട്ഠിതാ.