൩. നഗ്ഗവഗ്ഗവണ്ണനാ

൧-൨. പഠമദുതിയസിക്ഖാപദവണ്ണനാ

൮൮൩. നഗ്ഗവഗ്ഗസ്സ പഠമദുതിയാനി ഉത്താനാനി. പഠമേ അയം വിസേസോ – ഭിക്ഖുസ്സ തഥാ ന്ഹായന്തസ്സ ദുക്കടം അഞ്ഞത്ര ജന്താഘരഉദകപടിച്ഛാദീഹി. ന ച വിഗരഹി തത്ഥ ഭഗവാ അത്തനാവ അനനുഞ്ഞാതത്താ ഉദകസാടികായാതി പോരാണാ. ‘‘ഏകമേവ നിവാസേത്വാ, പാരുപിത്വാ ച നഹായിതും ന വട്ടതീ’’തി പോരാണഗണ്ഠിപദേ വുത്തം.

പഠമദുതിയസിക്ഖാപദവണ്ണനാ നിട്ഠിതാ.

൩. തതിയസിക്ഖാപദവണ്ണനാ

൮൯൪. തതിയേ അന്തോചതൂഹപഞ്ചാഹം ധുരം നിക്ഖിപന്തിയാപി ആപത്തി ഏവ. ലിങ്ഗപരിവത്തേ ധുരം നിക്ഖിപന്തിയാ ദുക്കടം തികദുക്കടത്താ. ‘‘സമ്ബഹുലാഹി ഭിക്ഖുനീഹി സദ്ധിന്തി ഏത്ഥ ചതസ്സോപി സമ്ബഹുലാ’’തി പോരാണഗണ്ഠിപദേ വുത്തം.

തതിയസിക്ഖാപദവണ്ണനാ നിട്ഠിതാ.

൪. ചതുത്ഥസിക്ഖാപദവണ്ണനാ

൮൯൮. ചതുത്ഥേ സങ്ഘാടിചാരന്തി ഏത്ഥ സങ്ഘാടിആദിവസേന അധിട്ഠിതാനംയേവായം വിധി, നേതരാസം കിര. തത്ഥ തിചീവരേ ഏവ വിപ്പവാസപച്ചയാ നിസ്സഗ്ഗിയം. അന്തോചീവരകാലേപി പഞ്ചാഹികം സങ്ഘാടിചാരം അതിക്കാമേന്തിയാ ആപത്തിയേവ. ‘‘വിനാ ഏതേഹി ചീവരേഹി ഉപസമ്പദം കാതും ന വട്ടതീ’’തി പോരാണഗണ്ഠിപദേ വുത്തം.

ചതുത്ഥസിക്ഖാപദവണ്ണനാ നിട്ഠിതാ.

൫. പഞ്ചമസിക്ഖാപദവണ്ണനാ

൯൦൬. പഞ്ചമസ്സ അനാപത്തിവാരേ തായ വാ അവിപ്പവാസായാതി അത്ഥതോ ലബ്ഭതി.

പഞ്ചമസിക്ഖാപദവണ്ണനാ നിട്ഠിതാ.

൯൦൭-൯൧൧. ഛട്ഠസത്തമാനി ഉത്താനാനി.

൮. അട്ഠമസിക്ഖാപദവണ്ണനാ

൯൧൬. സോകജ്ഝായികാ നാമ കിര മായാകാരാ. വിലുമ്പകാ ഭണ്ഡകാതി ച പോരാണാ.

അട്ഠമസിക്ഖാപദവണ്ണനാ നിട്ഠിതാ.

൯. നവമസിക്ഖാപദവണ്ണനാ

൯൨൦. ‘‘കഥഞ്ഹി നാമ അതിക്കാമേസ്സതീ’’തി വുത്തത്താ ഥുല്ലനന്ദാ ചീവരകാലസമയം ആഗമേഥാതി അതിക്കമാപേസീതി സിദ്ധം ഹോതി.

നവമസിക്ഖാപദവണ്ണനാ നിട്ഠിതാ.

൧൦. ദസമസിക്ഖാപദവണ്ണനാ

൯൨൭. ദസമേ ഏകകുലം ഏതദവോചുന്തി ഏത്ഥ കുലം നാമ തസ്മിം മനുസ്സാ, തസ്മാ ബഹുവചനം.

ദസമസിക്ഖാപദവണ്ണനാ നിട്ഠിതാ.

നഗ്ഗവഗ്ഗവണ്ണനാ നിട്ഠിതാ.