൮. വത്തക്ഖന്ധകവണ്ണനാ

ആഗന്തുകവത്തകഥാവണ്ണനാ

൩൫൭. ഏകസ്മിം ഗാമേ അഞ്ഞവിഹാരതോ ആഗതോപി ആഗന്തുകോവ. തത്ഥ കേചി ഏവം വദന്തി ‘‘ആവാസികോ കത്ഥചി ഗന്ത്വാ സചേ ആഗതോ, ‘തേനാപി ആഗന്തുകഭത്തം ഭുഞ്ജിതബ്ബ’ന്തി വുത്തത്താ ദൂരാഗമനം വുത്തം ഹോതി, ന ഗാമേ, തസ്മാ ന യുത്ത’’ന്തി. തേ വത്തബ്ബാ ‘‘ആഗന്തുകഭത്തം നാമ ഗഹട്ഠേഹി ഠപിതം. യസ്മിം നിബദ്ധം, തതോ അഞ്ഞഗാമതോതി ആപന്നം. തഥാ വിഹാരാധികാരത്താ അഞ്ഞവിഹാരതോ ആഗതോപി ആഗന്തുകോ വാ’’തി ആചരിയാനം സന്നിട്ഠാനം. പാനീയം പുച്ഛിതബ്ബം, പരിഭോജനീയം പുച്ഛിതബ്ബന്തി ഉദ്ധരിത്വാ ഘടസരാവാദിഗതം സന്ധായ പഠമം, ദുതിയം കൂപതളാകാദിഗതന്തി ആചരിയോ. ദുതിയവാരേ അത്തനോ വസനട്ഠാനത്താ വിസും പുച്ഛിതബ്ബമേവ, തസ്മാ വുത്തം ഏതം ‘‘പരിച്ഛിന്നഭിക്ഖോ വാ ഗാമോ’’തി. ബഹൂസു പോത്ഥകേസു ദുവിധാപി യുജ്ജതി.

അനുമോദനവത്തകഥാവണ്ണനാ

൩൬൨-൪. പഞ്ചമേ അനുമോദനത്ഥായ നിസിന്നേ. ‘‘മനുസ്സാനം പരിവിസനട്ഠാനന്തി യത്ഥ മനുസ്സാ സപുത്തദാരാ ആവസിത്വാ ദേന്തീ’’തി ലിഖിതം. ഇമസ്മിം ഖന്ധകേ ആഗന്തുകാവാസികഗമികാനുമോദനഭത്തഗ്ഗപിണ്ഡചാരികാരഞ്ഞകസേനാസനജന്താഘരവച്ചകുടിഉപജ്ഝാചരിയസദ്ധിവിഹാരികന്തേവാസികവത്താനി ചുദ്ദസ മഹാവത്താനി നാമ. അഗ്ഗഹിതഗ്ഗഹണേന ഗണിയമാനാനി അസീതി ഖന്ധകവത്താനി നാമ ഹോന്തി.

വത്തക്ഖന്ധകവണ്ണനാ നിട്ഠിതാ.