൯. കമ്മപടിബാഹനസിക്ഖാപദവണ്ണനാ

൪൭൪. ‘‘ധമ്മികാനം കമ്മാന’’ന്തി (പാചി. ൪൭൫) വചനതോ ഏകച്ചേ ഭിക്ഖൂ ധമ്മികാനം കമ്മാനം ‘‘ഛന്ദം ദമ്മീ’’തി ഛന്ദം ദേന്തി, തം തേസം മതിമത്തമേവ, ന പടിപത്തി. അധമ്മം നിസ്സായ ഖിയ്യതി, തം വാ ഉക്കോടേതി, അനാപത്തി നേവ ഹോതീതി? ന, തഥാ ഛന്ദദാനകാലേ അകത്വാ പച്ഛാ അധമ്മകമ്മഖിയ്യനാദിപച്ചയാ അനാപത്തിവാരേ വുത്തത്താ. അധമ്മേന വാ വഗ്ഗേന വാ ന കമ്മാരഹസ്സ വാ കമ്മകരണപച്ചയാ ആപത്തിമോക്ഖകരണതോ അവിസേസമേവ തഥാവചനന്തി ചേ? ന, ഛന്ദദാനകാലേ അധമ്മകമ്മകരണാനുമതിയാ അഭാവതോ, കാരകസ്സേവ വജ്ജപ്പസങ്ഗതോ ച. ഗണസ്സ ദുക്കടന്തി ചേ? പാരിസുദ്ധിഛന്ദദായകാവ തേ, ന ഗണോ അകമ്മപ്പത്തത്താ, പരിവാരേപി (പരി. ൪൮൨ ആദയോ) കമ്മവഗ്ഗേ കമ്മപ്പത്തഛന്ദദായകാ വിസും വുത്താ. തഥാപി അധമ്മകമ്മസ്സ ഛന്ദോ ന ദാതബ്ബോ ദേന്തേ അകപ്പിയാനുമതിദുക്കടതോ. തത്ഥ ഹി യോജനദുക്കടതോ ന മുച്ചന്തീതി നോ തക്കോതി ആചരിയോ.

കമ്മപടിബാഹനസിക്ഖാപദവണ്ണനാ നിട്ഠിതാ.