൪. അനാദരിയസിക്ഖാപദവണ്ണനാ

൩൪൪. ‘‘ലോകവജ്ജം അതിക്കമിത്വാ ‘ഇദം അമ്ഹാകം ആചരിയുഗ്ഗഹോ’തി വദന്തസ്സ ന വട്ടതീ’’തി ലിഖിതം. യം സംകിലിട്ഠേനേവ ചിത്തേന ആപജ്ജതി, യം വാ അരിയപുഗ്ഗലോ അപഞ്ഞത്തേ സിക്ഖാപദേ അജ്ഝാചരതി, ഇദം ലോകവജ്ജന്തി സബ്ബത്ഥികവാദീആദീനി ആചരിയകുലാനി. തത്ഥ ദുതിയതതിയവികപ്പോ ഇധ ന അധിപ്പേതോ സേഖിയാനം ലോകവജ്ജത്താ.

ഗാരയ്ഹോ ആചരിയുഗ്ഗഹോതി ഏത്ഥ ‘‘യസ്മാ ഉച്ഛുരസോ സത്താഹകാലികോ, തസ്സ കസടോ യാവജീവികോ, ദ്വിന്നംയേവ സമവായോ ഉച്ഛുയട്ഠി, തസ്മാ വികാലേ ഉച്ഛുയട്ഠിം ഖാദിതും വട്ടതി ഗുളഹരീടകം വിയാ’തി ഏവമാദികോ സമ്പതി നിബ്ബത്തോ ഗാരയ്ഹാചരിയവാദോ ന ഗഹേതബ്ബോ’’തി ച, പണ്ണത്തിവജ്ജേ പന വട്ടതീതി ‘‘ന പത്തഹത്ഥേന കവാടോ പണാമേതബ്ബോ’തി ഇമസ്സ ‘യേന ഹത്ഥേന പത്തോ ഗഹിതോ, തേന ഹത്ഥേന ന പണാമേതബ്ബോ, ഇതരേന പണാമേതബ്ബോ’തി അത്ഥം ഗഹേത്വാ തഥാ ആചരന്തോ ന ആപത്തിയാ കാരേതബ്ബോ. ‘തഥാ ബുദ്ധബോധിചേതിയാനം പുപ്ഫം ഗണ്ഹിതും വട്ടതീതി തഥാ ആചരന്തോ’’തി ച. തഥാ ആചരതി അഭയഗിരിവാസികോ. മഹാവിഹാരവാസിനോ ചേ ഏവം വദന്തി, ‘‘മാ ഏവം വദാ’’തി അപസാദേതബ്ബോ. തേന വുത്തം ‘‘സുത്തം സുത്താനുലോമഞ്ച ഉഗ്ഗഹിതകാനംയേവാ’’തിആദി. ‘‘ഇദം സബ്ബം ഉപതിസ്സത്ഥേരോ ആഹാ’’തി ച വുത്തം. ‘‘സുത്താനുലോമം അട്ഠകഥാ’’തി ലിഖിതം.

അനാദരിയസിക്ഖാപദവണ്ണനാ നിട്ഠിതാ.