൫. അചേലകവഗ്ഗോ

൧. അചേലകസിക്ഖാപദവണ്ണനാ

൨൬൯. വിഘാസാദാനം അന്തരാ പൂവലാഭേന അഞ്ഞതരാ പരിബ്ബാജികാ പവിസിത്വാ ഠിതാ. ദാപേതീതി അനുപസമ്പന്നേന.

അചേലകസിക്ഖാപദവണ്ണനാ നിട്ഠിതാ.

൨. ഉയ്യോജനസിക്ഖാപദവണ്ണനാ

൨൭൬. വിജഹന്തസ്സാതി അനാദരത്ഥേ സാമിവചനം. ഉയ്യോജകസ്സ വിജഹന്തസ്സ സതോ ആപത്തി ദുക്കടസ്സാതിപി അത്ഥോ. ഇധ അനുപസമ്പന്നോ നാമ സാമണേരോവാധിപ്പേതോ.

ഉയ്യോജനസിക്ഖാപദവണ്ണനാ നിട്ഠിതാ.

൩. സഭോജനസിക്ഖാപദവണ്ണനാ

൨൮൦. സഭോജനേതി ഏത്ഥ പഠമവികപ്പോ ‘‘ഇത്ഥീ ച പുരിസോ ചാ’’തി ഇമിനാ തതിയപദേന യുജ്ജതി, ദുതിയവികപ്പോ പഠമേഹി ദ്വീഹി. കുലേതി ഘരേ. അനുപവിസിത്വാ നിസീദനചിത്തേന സചിത്തകം.

സഭോജനസിക്ഖാപദവണ്ണനാ നിട്ഠിതാ.

൪. രഹോപടിച്ഛന്നസിക്ഖാപദവണ്ണനാ

൨൮൪. ഇധ പഞ്ചമം ഉപനന്ദസ്സ ചതുത്ഥം ഹോതി, തസ്മാ ഭിക്ഖുനിവഗ്ഗസ്സ ദസമട്ഠകഥായം ഉപരി ഉപനന്ദസ്സ ‘‘തതിയസിക്ഖാപദേനാ’’തി ന പാഠോ, ‘‘ചതുത്ഥേനാ’’തി പാഠോതി വേദിതബ്ബോ.

രഹോപടിച്ഛന്നസിക്ഖാപദവണ്ണനാ നിട്ഠിതാ.

൫. രഹോനിസജ്ജസിക്ഖാപദവണ്ണനാ

൨൮൯. രഹോനിസജ്ജസിക്ഖാപദം ഉത്താനത്ഥമേവ.

൬. ചാരിത്തസിക്ഖാപദവണ്ണനാ

൨൯൪. സഭത്തോതി നിമന്തനഭത്തോതി പോരാണാ.

പുരേഭത്തഞ്ച പിണ്ഡായ, ചരിത്വാ യദി ഭുഞ്ജതി;

സിയാ പരമ്പരാപത്തി, പച്ഛാഭത്തം ന സാ സിയാ.

പച്ഛാഭത്തഞ്ച ഗമികോ, പുബ്ബഗേഹം യദി ഗച്ഛേ;

ഏകേ ആപത്തിയേവാതി, അനാപത്തീതി ഏകച്ചേ.

കുലന്തരസ്സോക്കമനേ, ആപത്തിമതയോ ഹി തേ;

സമാനഭത്തപച്ചാസാ, ഇതി ആഹു ഇധാപരേ.

മതാ ഗണികഭത്തേന, സമേന്തി നം നിമന്തനേ;

വിസ്സജ്ജനം സമാനന്തി, ഏകേ സമ്മുഖതാപരേ.

സന്നിട്ഠാനത്ഥികേഹേവ, വിചാരേതബ്ബഭേദതോ;

വിഞ്ഞൂ ചാരിത്തമിച്ചേവ, സിക്ഖാപദമിദം വിദൂതി.

ചാരിത്തസിക്ഖാപദവണ്ണനാ നിട്ഠിതാ.

൭. മഹാനാമസിക്ഖാപദവണ്ണനാ

൩൧൦. കാലന്തി സോ. യസ്മാ സങ്ഘപവാരണായമേവായം വിധി, തസ്മാ ‘‘ഞാതകാനം പവാരിതാന’’ന്തി വുത്തം. ‘‘ഇമിനാ ഹി തയാ പവാരിതമ്ഹ, അമ്ഹാകഞ്ച ഇമിനാ ച ഇമിനാ ച അത്ഥോ’’തി യഥാഭൂതം ആചിക്ഖിത്വാ വിഞ്ഞാപേതും ഗിലാനോവ ലഭതി. യം പന വുത്തം പണീതഭോജനസിക്ഖാപദേ ‘‘മഹാനാമസിക്ഖാപദേന കാരേതബ്ബോ’’തി, തം സങ്ഘവസേന പവാരിതം, ഭേസജ്ജത്ഥായ സപ്പിആദിഭേസജ്ജപഞ്ചകം വിഞ്ഞാപേതി ചേ, ‘‘ന ഭേസജ്ജേന കരണീയേന ഭേസജ്ജം വിഞ്ഞാപേതീ’തി വചനേന പാചിത്തിയന്തി അത്ഥോ’’തി (പാചി. ൩൦൯) ലിഖിതം.

മഹാനാമസിക്ഖാപദവണ്ണനാ നിട്ഠിതാ.

൮. ഉയ്യുത്തസേനാസിക്ഖാപദവണ്ണനാ

൩൧൧-൫. മം ദിട്ഠേനാതി മയാ ദിട്ഠേന, മമ ദസ്സനേന വാ. ഏകമ്പി സരഹത്ഥം പുരിസന്തി അങ്ഗപരിയാപന്നം.

ഉയ്യുത്തസേനാസിക്ഖാപദവണ്ണനാ നിട്ഠിതാ.

൯. സേനാവാസസിക്ഖാപദവണ്ണനാ

൩൧൯. നവമേ സേനാപരിക്ഖേപേന വാ പരിക്ഖേപാരഹട്ഠാനേന വാ സഞ്ചരണട്ഠാനപരിയന്തേന വാ പരിച്ഛിന്ദിതബ്ബാ.

സേനാവാസസിക്ഖാപദവണ്ണനാ നിട്ഠിതാ.

൧൦. ഉയ്യോധികസിക്ഖാപദവണ്ണനാ

൩൨൪. ദസമേ ഏകമേകം ദസ്സനായ ഗച്ഛതി, ആപത്തി ദുക്കടസ്സ. യത്ഥ ഠിതോ പസ്സതി, ആപത്തി പാചിത്തിയസ്സാതിആദി. അട്ഠമേ പന ഏകമേകം ദസ്സനായ ഗച്ഛതി, ആപത്തി ദുക്കടസ്സ. യത്ഥ ഠിതോ പസ്സതി, ആപത്തി ദുക്കടസ്സാതി പാളി. കസ്മാ? അങ്ഗപ്പമാണാഭേദേപി അനീകവിസേസതോ. ദസമേ പന അട്ഠമങ്ഗസ്സ ദസ്സനേന ദുക്കടം സിയാതി.

ഉയ്യോധികസിക്ഖാപദവണ്ണനാ നിട്ഠിതാ.

സമത്തോ വണ്ണനാക്കമേന അചേലകവഗ്ഗോ പഞ്ചമോ.