൫. ദുതിയസേനാസനസിക്ഖാപദവണ്ണനാ

൧൧൬-൭. ഏത്തകമേവ വുത്തമട്ഠകഥാസു, തഥാപി പദട്ഠാദയോപി ലബ്ഭന്തി ഏവ. അനുഗണ്ഠിപദേ ‘‘അഞ്ഞം അത്ഥരണാദി അകപ്പിയത്താ ന വുത്ത’’ന്തി വുത്തം. ‘‘മഞ്ചം വാ പീഠം വാ വിഹാരേ വാ വിഹാരൂപചാരേ വാ’തി ഇമിനാപി സംസന്ദനത്ഥം ‘കിഞ്ചാപി വുത്തോ, അഥ ഖോ’തിആദി ആരദ്ധ’’ന്തി ച വുത്തം. ഉപചാരമത്തഞ്ചേതം ‘‘രുക്ഖമൂലേ’’തി, തത്ഥ വത്തബ്ബം നത്ഥി.

൧൧൮. അനാപുച്ഛിത്വാപി ഗന്തും വട്ടതീതി അസതിയാ ഗച്ഛതോപി അനാപത്തി, ആപുച്ഛനം പന വത്തം സഞ്ചിച്ച അനാപുച്ഛതോ വത്തഭേദദുക്കടത്താ. പുഗ്ഗലികസേനാസനേ സങ്ഘികസേയ്യം, സങ്ഘികസേനാസനേ വാ പുഗ്ഗലികസേയ്യം അത്ഥരിത്വാ ഗച്ഛന്തസ്സ ദുക്കടം യുത്തം വിയ. കസ്മാ? ‘‘സേയ്യാമത്തമേവ നസ്സേയ്യാ’’തി വുത്തത്താ. ഇധ പന ‘‘പലിബുദ്ധം പലിബുദ്ധോ’’തി ദുവിധമ്പി അത്ഥി.

ദുതിയസേനാസനസിക്ഖാപദവണ്ണനാ നിട്ഠിതാ.