൨. അഞ്ഞവാദകസിക്ഖാപദവണ്ണനാ

൯൮-൯. അഞ്ഞം വദതീതി അഞ്ഞവാദകം, ‘‘വചനം കരേയ്യാ’’തി ലിഖിതം. ‘‘തുണ്ഹീഭൂതസ്സേതം നാമ’’ന്തി പാഠോ. ഉഗ്ഘാതേതുകാമോതി സമോഹനിതുകാമോ, അന്തരായം കത്തുകാമോതി പോരാണാ.

൧൦൦. ‘‘സുദിട്ഠോ ഭന്തേ, ന പനേസോ കഹാപണോതിആദീസു അനാരോപിതേ ദുക്കടേന മുസാവാദപാചിത്തിയം, അരോപിതേ പാചിത്തിയദ്വയം ഹോതീ’’തി വദന്തി, വീമംസിതബ്ബം.

൧൦൨. അധമ്മേന വാ വഗ്ഗേന വാ ന കമ്മാരഹസ്സ വാതി ഏത്ഥ ‘‘മയി വുത്തേ മം വാ അഞ്ഞം വാ സങ്ഘോ അധമ്മേന വാ കമ്മം, വഗ്ഗേന വാ കമ്മം കരിസ്സതി, ന കമ്മാരഹസ്സ വാ മേ, അഞ്ഞസ്സ വാ കമ്മം കരിസ്സതീ’’തി ന കഥേതീതി യോജേതബ്ബം.

അഞ്ഞവാദകസിക്ഖാപദവണ്ണനാ നിട്ഠിതാ.