൫. സഗാഥകപുഞ്ഞാഭിസന്ദവഗ്ഗോ

൧. പഠമഅഭിസന്ദസുത്തവണ്ണനാ

൧൦൩൭. സങ്ഖ്യാ അത്ഥി ഹേട്ഠാ മഹാപഥവിയാ, ഉപരി ആകാസേന, പരിതോ ചക്കവാളപബ്ബതേന, മജ്ഝേ തത്ഥ തത്ഥ ഠിതേഹി ദീപപബ്ബതപരിയന്തേഹി പരിച്ഛിന്നത്താ. ജാനന്തേന യോജനതോ സങ്ഖാതും സക്കാതി അധിപ്പായോ. മഹാസരീരമച്ഛ-കുമ്ഭീല-യക്ഖ-രക്ഖസ-മഹാനാഗദാനവാദീനം സവിഞ്ഞാണകാനം, ബളവാമുഖപാതാലാദീനം അവിഞ്ഞാണകാനം ഭേരവാരമ്മണാനം വസേന ബഹുഭേരവം.

൨. ദുതിയഅഭിസന്ദസുത്തവണ്ണനാ

൧൦൩൮. സമ്ഭേദേതി സമ്ഭേദം സമോധാനം ഗതട്ഠാനേ. യത്ഥിമാ മഹാനദിയോ സംസന്ദന്തി സമേന്തീതി പരികപ്പവചനമേതം. താദിസാസു ഹി മഹാനദീസു കാചി പുരത്ഥിമസമുദ്ദം പവിട്ഠാ, കാചി പച്ഛിമം.

൩. തതിയഅഭിസന്ദസുത്തവണ്ണനാ

൧൦൩൯. ‘‘കുസലേ പതിട്ഠിതോ’’തി ഏത്ഥ യം അച്ചന്തികം കുസലേ പതിട്ഠാനം. തം ദസ്സേന്തോ ‘‘മഗ്ഗകുസലേ പതിട്ഠിതോ’’തി ആഹ, ഹേട്ഠിമമഗ്ഗകുസലേതി അധിപ്പായോ. തേനാഹ ‘‘ഭാവേതി മഗ്ഗ’’ന്തി. അരിയഫലംയേവ ധമ്മസാരോ. കിലേസാ ഖീയന്തി ഏത്ഥാതി കിലേസക്ഖയോ, നിബ്ബാനം, തസ്മിം കിലേസക്ഖയേ രതോ.

൪. പഠമമഹദ്ധനസുത്തവണ്ണനാ

൧൦൪൦. അരിയാനം ബുദ്ധാനം ധനന്തിപി അരിയധനം, നിബ്ബാനന്തി കേചി. അനയതോപി വിസുദ്ധട്ഠേന അരിയഞ്ച തം ധനഞ്ച ധനായിതട്ഠേനാതി അരിയധനം, തേന അരിയധനേന. തേനേവ ഭോഗേനാതി അരിയധനഭോഗേന.

സഗാഥകപുഞ്ഞാഭിസന്ദവഗ്ഗവണ്ണനാ നിട്ഠിതാ.