൪. പുഞ്ഞാഭിസന്ദവഗ്ഗോ

൧. പഠമപുഞ്ഞാഭിസന്ദസുത്തവണ്ണനാ

൧൦൨൭. അവിച്ഛേദേന നിച്ചപ്പവത്തിയമാനാനി പുഞ്ഞാനി അഭിസന്ദനട്ഠേന ‘‘പുഞ്ഞാഭിസന്ദാ’’തി വുത്താ, തേന പുഞ്ഞനദിയോതി അത്ഥോ വുത്തോ. സുഖസ്സ ആഹരണതോ ആനയനതോ സുഖസ്സാഹാരോ.

൪. പഠമദേവപദസുത്തവണ്ണനാ

൧൦൩൦. ദേവാനന്തി വിസുദ്ധിദേവാനം. ദേവപദാനീതി തേസം പദാനി ദേവപദാനി, ദേവോതി വാ സമ്മാസമ്ബുദ്ധോ. ദേവസ്സ ഞാണേന അക്കന്തപദാനീതി പടിവേധഞാണേന ചേവ ദേസനാഞാണേന ച അക്കന്തപദാനി. ദേവാ നാമ ജാതിദേവാ. തേസമ്പി ദേവട്ഠേന ദേവോതി ദേവദേവോ, സമ്ബുദ്ധോ.

൮. വസ്സസുത്തവണ്ണനാ

൧൦൩൪. പാരം വുച്ചതി നിബ്ബാനം സംസാരമഹോഘസ്സ പരതീരഭാവതോ. തേനാഹ – ‘‘തിണ്ണോ പാരങ്ഗതോ, ഥലേ തിട്ഠതി ബ്രാഹ്മണോ (സം. നി. ൪.൨൩൮; ഇതിവു. ൬൯; പു. പ. ൧൮൮), യേ ജനാ പാരഗാമിനോ’’തി (ധ. പ. ൮൫) ച. അഥ വാ പാതി രക്ഖതീതി പാരം, നിബ്ബാനം. യോ പടിവിജ്ഝതി, തം വട്ടദുക്ഖതോ പാതി രക്ഖതി, അച്ചന്തഹിതേന ച വിമുത്തിസുഖേന ച രമേതി, തസ്മാ പാരന്തി വുച്ചതി. ഗച്ഛമാനാ ഏവാതി പാരം നിബ്ബാനം ഗച്ഛമാനാ ഏവ. തേ ധമ്മാ ആസവാനം ഖയായ സംവത്തന്തി സച്ഛികിരിയാപഹാനപടിവേധാനം സമകാലത്താ.

൧൦. നന്ദിയസക്കസുത്തവണ്ണനാ

൧൦൩൬. പവിവേകത്ഥായാതി പവിവേകസുഖത്ഥായ. പടിസല്ലാനത്ഥായാതി ബഹിദ്ധാ നാനാരമ്മണതോ ചിത്തം പടിനിവത്തേത്വാ കമ്മട്ഠാനേ സമ്മദേവ ലീനത്ഥായ.

പുഞ്ഞാഭിസന്ദവഗ്ഗവണ്ണനാ നിട്ഠിതാ.