൫. ദട്ഠബ്ബസുത്തവണ്ണനാ

൨൫൩. വിപരിണാമനവസേന ദുക്ഖതോ ദട്ഠബ്ബാതി കിഞ്ചാപി സുഖാ, പരിണാമദുക്ഖതാ പന സുഖവേദനായ ഏകന്തികാതി. വിനിവിജ്ഝനട്ഠേനാതി പീളനവസേന അത്തഭാവസ്സ വിജ്ഝനട്ഠേന. ഹുത്വാതി പച്ചയസമാഗമേന ഉപ്പജ്ജിത്വാ. തേന പാകഭാവപുബ്ബകോ അത്തലാഭോ വുത്തോ. അഭാവാകാരേനാതി ഭങ്ഗുപഗമനാകാരേന. തേന വിദ്ധംസഭാവോ വുത്തോ. ഉഭയേന ഉദയബ്ബയപരിച്ഛിന്നതായ സിഖപ്പത്തം അനിച്ചതം ദസ്സേതി. സ്വായം ഹുത്വാ അഭാവാകാരോ ഇതരാസുപി വേദനാസു ലബ്ഭതേവ, അധികോ ച പന ദ്വിന്നം ദുക്ഖസഭാവോ. ദുക്ഖതാവസേന പുരിമാനം വേദനാനം ദട്ഠബ്ബതായ ദസ്സിതത്താ പച്ഛിമായ വേദനായ ഏവം ദട്ഠബ്ബതാ ദസ്സിതാ. അദ്ദാതി ഞാണഗതിയാ സച്ഛികത്വാ അദക്ഖി. ഞാണഗമനഞ്ഹേതം, യദിദം ദുക്ഖതോ ദസ്സനം. സന്തസഭാവം സുഖദുക്ഖതോ ഉപസന്തരൂപത്താ.

ദട്ഠബ്ബസുത്തവണ്ണനാ നിട്ഠിതാ.