൫. ദുതിയഅപരിജാനനസുത്തവണ്ണനാ

൨൭. ചക്ഖുവിഞ്ഞാണവിഞ്ഞാതബ്ബധമ്മോ നാമ രൂപായതനമേവാതി ആഹ ‘‘ഹേട്ഠാ ഗഹിതരൂപമേവാ’’തി. ഇധ അനാപാഥഗതം ‘‘ചക്ഖുവിഞ്ഞാണവിഞ്ഞാതബ്ബാ ധമ്മാ’’തി വുത്തത്താ. ഹേട്ഠാ ആപാഥഗതമ്പി അനാപാഥഗതമ്പി ഗഹിതമേവ ‘‘യേ ച രൂപാ’’തി അനവസേസതോ വുത്തത്താ. തേ ഹി വേദനാസഞ്ഞാസങ്ഖാരക്ഖന്ധാ സഹ ചക്ഖുവിഞ്ഞാണേന വിഞ്ഞാതബ്ബത്താ. തഥാ ഹി ചക്ഖുവിഞ്ഞാണം തേഹി ഏകുപ്പാദം ഏകവത്ഥുകം ഏകനിരോധം ഏകാരമ്മണമേവ. സേസപദേസൂതി സേസേസു ‘‘യഞ്ച സോതം യേ ച സദ്ദാ’’തിആദിനാ ആഗതേസു കണ്ഹപക്ഖേ പഞ്ചസു, സുക്കപക്ഖേ ഛസുപി പദേസു. ഏസേവ നയോതി യ്വായം ‘‘ഹേട്ഠാ ഗഹിതരൂപമേവ ഗണ്ഹിത്വാ’’തി അത്ഥോ വുത്തോ. ഏസോ ഏവ തത്ഥപി അത്ഥവണ്ണനാനയോ.

ദുതിയഅപരിജാനനസുത്തവണ്ണനാ നിട്ഠിതാ.