൬-൭. അന്തേവാസികസുത്താദിവണ്ണനാ

൧൫൧-൧൫൨. അന്ത-സദ്ദോ സമീപത്ഥേ വത്തതി ‘‘ഉദകന്തം വനന്ത’’ന്തിആദീസു, കിലേസോ പന അതിആസന്നേ വസതി അബ്ഭന്തരവുത്തിതായാതി ‘‘അന്തേവാസിക’’ന്തി വുത്തോ വിഭത്തിഅലോപേന യഥാ ‘‘വനേകുസലോ, കൂലേരുക്ഖാ’’തി. തേനാഹ – ‘‘അനന്തേവാസികന്തി അന്തോവസനകിലേസവിരഹിത’’ന്തി. ആചരണകകിലേസവിരഹിതന്തി സമുദാചരണകിലേസരഹിതം. അന്തോ അസ്സ വസന്തീതി അസ്സ പുഗ്ഗലസ്സ അന്തോ അബ്ഭന്തരേ ചിത്തേ വസന്തി പവത്തന്തി. തേ ഏതം അധിഭവന്തീതി തേ കിലേസാ ഏതം പുഗ്ഗലം അഭിഭവിത്വാ അത്തനോ വസേ വത്തേന്തി. തേനാഹ – ‘‘അജ്ഝോത്ഥരന്തി സിക്ഖാപേന്തി വാ’’തി. തേഹി ആചരിയേഹീതി തേഹി കിലേസസങ്ഖാതേഹി സത്തേ അത്തനോ ഗതിയം ഠപേന്തേഹി ആചരിയേഹി. സത്തമം ഹേട്ഠാ കഥിതനയമേവാതി യസ്മാ ഹേട്ഠാ ഖന്ധവസേന ദേസനാ ആഗതാ, ഇധ ആയതനവസേനാതി അയമേവ വിസേസോ.

അന്തേവാസികസുത്താദിവണ്ണനാ നിട്ഠിതാ.