൭. നതുമ്ഹസുത്തവണ്ണനാ

൩൭. ന തുമ്ഹാകന്തി കായസ്സ അനത്തനിയഭാവദസ്സനമേവ പനേതന്തി യാ തസ്സ അനത്തനിയതാ, തം ദസ്സേതും ‘‘അത്തനി ഹീ’’തിആദി വുത്തം. യദി ന അത്തനിയം, പരകിയം നാമ സിയാതി, തമ്പി നത്ഥീതി ദസ്സേന്തോ ‘‘നാപി അഞ്ഞേസ’’ന്തി ആഹ. നയിദം പുരാണകമ്മമേവാതി ‘‘ഇദം കായോ’’തി വുത്തസരീരം പുരാണകമ്മമേവ ന ഹോതി. ന ഹി കായോ വേദനാസഭാവോ. പച്ചയവോഹാരേനാതി കാരണോപചാരേന. അഭിസങ്ഖതന്തിആദി നപുംസകലിങ്ഗവചനം. പുരിമലിങ്ഗസഭാഗതായാതി ‘‘പുരാണമിദം കമ്മ’’ന്തി ഏവം വുത്തപുരിമനപുംസകലിങ്ഗസഭാഗതായ. അഞ്ഞമഞ്ഞാഭിമുഖേഹി സമേച്ച പച്ചയേഹി കതോ അഭിസങ്ഖതോതി ആഹ ‘‘പച്ചയേഹി കതോതി ദട്ഠബ്ബോ’’തി. അഭിസഞ്ചേതയിതന്തി തഥാ അഭിസങ്ഖതത്തസങ്ഖാതേന അഭിമുഖഭാവേന ചേതയിതം പകപ്പിതം, പവത്തിതന്തി അത്ഥോ. ചേതനാവത്ഥുകോതി ചേതനാഹേതുകോ. വേദനിയന്തി വേദനായ ഹിതം വത്ഥാരമ്മണഭാവേന വേദനായ പച്ചയഭാവതോ. തേനാഹ ‘‘വേദനിയവത്ഥൂ’’തി.

നതുമ്ഹസുത്തവണ്ണനാ നിട്ഠിതാ.