൪. ദുതിയഞാണവത്ഥുസുത്തവണ്ണനാ

൩൪. സത്തരീതി ത-കാരസ്സ ര-കാരാദേസം വുത്തം. സത്തതിസദ്ദേന വാ സമാനത്ഥോ സത്തരിസദ്ദോ. ബ്യഞ്ജനരുചിവസേന ബ്യഞ്ജനം ഭണന്തീതി ബ്യഞ്ജനഭാണകാ. തേനാഹ ‘‘ബഹുബ്യഞ്ജനം കത്വാ’’തിആദി. തിട്ഠതി തത്ഥ ഫലം തദായത്തവുത്തിതായാതി ഠിതി, പച്ചുപ്പന്നലക്ഖണസ്സ ധമ്മസ്സ ഠിതി ധമ്മട്ഠിതി. അഥ വാ ധമ്മോതി കാരണം, പച്ചയോതി അത്ഥോ. ധമ്മസ്സ യോ ഠിതിസഭാവോ, സോവ ധമ്മതോ അഞ്ഞോ നത്ഥീതി ധമ്മട്ഠിതി, പച്ചയോ. തത്ഥ ഞാണം ധമ്മട്ഠിതിഞാണം. തേനാഹ ആയസ്മാ ധമ്മസേനാപതി – ‘‘പച്ചയപരിഗ്ഗഹേ പഞ്ഞാ ധമ്മട്ഠിതിഞാണ’’ന്തി (പടി. മ. മാതികാ ൪). തഥാ ചാഹ ‘‘പച്ചയാകാരേ ഞാണ’’ന്തിആദി. തത്ഥ ധമ്മാനന്തി പച്ചയുപ്പന്നധമ്മാനം. പവത്തിട്ഠിതികാരണത്താതി പവത്തിസങ്ഖാതായ ഠിതിയാ കാരണത്താ. ‘‘ജാതിപച്ചയാ ജരാമരണ’’ന്തിആദിനാ അദ്ധത്തയേ അന്വയബ്യതിരേകവസേന പവത്തിയാ ഛബ്ബിധസ്സ ഞാണസ്സ. ഖയോ നാമ വിനാസോ, സോവ ഭേദോതി. വിരജ്ജനം പലുജ്ജനം. നിരുജ്ഝനം അന്തരധാനം. ഏകേകസ്മിന്തി ജരാമരണാദീസു ഏകേകസ്മിം. പുബ്ബേ ‘‘യഥാഭൂതഞാണ’’ന്തി തരുണവിപസ്സനം ആഹ. തസ്മാ ഇധാപി ധമ്മട്ഠിതിഞാണം വിപസ്സനാതി ഗഹേത്വാ ‘‘വിപസ്സനാപടിവിപസ്സനാ കഥിതാ’’തി വുത്തം.

ദുതിയഞാണവത്ഥുസുത്തവണ്ണനാ നിട്ഠിതാ.