൭. ആരഞ്ഞികവത്തകഥാ

൩൬൮. ആരഞ്ഞികവത്തേ ഏവം വിനിച്ഛയോ വേദിതബ്ബോതി യോജനാ. സേനാസനാ ഓതരിതബ്ബന്തി ഏത്ഥ അരഞ്ഞേ രുക്ഖമൂലാദീസു നിസിന്നസ്സ വിഹാരാഭാവതോ സേനാസനം നാമ വസനട്ഠാനം സന്ധായ വുത്തന്തി ആഹ ‘‘വസനട്ഠാനതോ നിക്ഖമിതബ്ബ’’ന്തി.

പത്തം ഥവികായ പക്ഖിപിത്വാതി ഏത്ഥ കഥം പത്തോ ഥവികായ പക്ഖിപിതബ്ബോതി ആഹ ‘‘സചേ ബഹീ’’തിആദി. തത്ഥ പത്തോ പക്ഖിപിതബ്ബോതി സമ്ബന്ധോ. ധോവിത്വാ കത്വാതി പദേസു ‘‘പത്തം വോദക’’ന്തി വിഭത്തിപരിണാമം കത്വാ സമ്ബന്ധിതബ്ബം. തമ്പീതി വേളുനാളികമ്പി. സമീപേതി ആരഞ്ഞകസ്സ സേനാസനസ്സ സമീപേ. യഥാ ച ആരഞ്ഞകസ്സ അരണിസഹിതം ഇച്ഛിതബ്ബം, ഏവം കന്താരം പടിപന്നസ്സാപി അരണിസഹിതം ഇച്ഛിതബ്ബന്തി യോജനാ. ഗണവാസിനോതി ഗണേന സഹ വാസിനോ, ആരഞ്ഞകസ്സാതി സമ്ബന്ധോ. തേനാതി അരണിസഹിതേന. ‘‘നക്ഖത്താനേവ നക്ഖത്തപദാനീ’’തി ഇമിനാ അസ്സയുജാദിനക്ഖത്താനേവ (അഭിധാനപ്പദീപികായം ൫൮-൬൦ ഗാഥാസു) ദിസാഭാഗജാനനസ്സ, ച സമയജാനനസ്സ ച കാരണത്താ നക്ഖത്തപദാനി നാമാതി ദസ്സേതി.