൫. ഭത്തഗ്ഗവത്തകഥാ

൩൬൪. ഭത്തഗ്ഗവത്തേതി ഭത്തം ഗണ്ഹന്തി ഏത്ഥാതി ഭത്തഗ്ഗം, പരിവിസനട്ഠാനം. തസ്മിം കത്തബ്ബം വത്തം ഭത്തഗ്ഗവത്തം, തസ്മിം ഭത്തഗ്ഗവത്തേ ഏവം വിനിച്ഛയോ വേദിതബ്ബോതി യോജനാ. മനുസ്സാനം പരിവിസനട്ഠാനം നാമ യത്ഥ മനുസ്സാ സപുത്തദാരാ ആവസിത്വാ ഭിക്ഖൂഭോജേന്തി. ‘‘അതിഅല്ലീയിത്വാ’’തി ഇമിനാ അനുപഖജ്ജാതി ഏത്ഥ ഖദധാതുസ്സ ഹിംസനം നാമ അതിഅല്ലീയനന്തി ദസ്സേതി. ആസനേസു സതീതി ആസനേസു സന്തേസു. നിസീദന്തസ്സ നവകസ്സാതി സമ്ബന്ധോ. ആപജ്ജതീതി ആപത്തിം ആപജ്ജതി. ആപുച്ഛിതേ അനനുജാനന്തോ ഥേരോ ആപജ്ജതീതി യോജനാ. സങ്ഘാടിന്തി പാരുതസങ്ഘാടിം.

പത്തധോവനഉദകന്തി ഭുഞ്ജനത്ഥായ പത്താനം ധോവനഉദകം. ഗഹേതബ്ബന്തി ഹത്ഥേന ഗഹേതബ്ബം.

യഥാ ഗണ്ഹിയമാനേതി യോജനാ. മത്തായാതി പമാണായ. സബ്ബിആദീസു ഏവാതി ഏവസദ്ദോ അജ്ഝാഹരിതബ്ബോ. സബ്ബിആദീസൂതി സബ്ബിതേലഉത്തരിഭങ്ഗേസു, നിദ്ധാരണേ ഭുമ്മം. യന്തി സബ്ബിആദികം. അപ്പഹോതീതി സബ്ബേസം ഭിക്ഖൂനം നപ്പഹോതി. തന്തി സബ്ബിആദികം, സമ്പാദേഹീതി സമ്ബന്ധോ. താദിസം സബ്ബിആദികന്തി സമ്ബന്ധോ.

യം ഭത്തഗ്ഗന്തി യോജനാ. ഹത്ഥധോവനഉദകന്തി ഭുത്താവീനം ഹത്ഥസ്സ ധോവനഉദകം. അന്തരാതി ഭോജനസ്സ മജ്ഝേ. പിപാസിതേനാതി പിവിതും ഇച്ഛന്തേന. ഗലേതി കണ്ഠേ.

നിവത്തന്തേനാതി ഏത്ഥ കസ്മാ ഠാനാ നിവത്തന്തേനാതി ആഹ ‘‘ഭത്തഗ്ഗതോ’’തി. കഥം കേനാകാരേന നിവത്തിതബ്ബന്തി യോജനാ. കസ്മാ നവകേഹി ഭിക്ഖൂഹി പഠമതരം നിവത്തിതബ്ബന്തി ആഹ ‘‘സമ്ബാധേസു ഹീ’’തിആദി. നിക്ഖമനോകാസോതി പഠമതരം നിക്ഖന്തോകാസോ. പടിപാടിയാതി വുഡ്ഢപടിപാടിയാ. ധുരേതി ഗേഹദ്വാരസ്സ സമീപേ. ധുരസദ്ദോ ഹി ഇധ സമീപവാചകോ. നവകാ അന്തോഗേഹേ ചേ നിസിന്നാ ഹോന്തീതി യോജനാ. അന്തരേനാതി ഭിക്ഖൂനം വിവരേന, മജ്ഝേന വാ. വിരളായാതി തനുകായ.