൨൩൭. ചതുവഗ്ഗകരണാദികഥാ

൩൮൮. യദിദം കമ്മന്തി യോജനാ. തേസന്തി സങ്ഘാനം. കമ്മപ്പത്തോതി ഏത്ഥ കമ്മേന, കമ്മസ്സ വാ പത്തോതി അത്ഥം പടിക്ഖിപന്തോ ആഹ ‘‘കമ്മം പത്തോ’’തി. ‘‘സബ്ബകമ്മേസു കമ്മപത്തോ’’തി പാളിനയേന ‘‘കമ്മേസു പത്തോ’’തി അത്ഥോപി യുജ്ജതി. ലോകവോഹാരവസേന ‘‘കമ്മേന കമ്മസ്സ വാ പത്തോ’’തി അത്ഥോപി യുജ്ജതേവ.

൩൮൯. പരിസതോതി പരിസകാരണാ. തത്ഥാതി ‘‘ചതുവഗ്ഗകരണഞ്ചേ ഭിക്ഖവേ’’തിആദിപാഠേ, ചതുവീസതിപുഗ്ഗലേസു വാ. കമ്മനാനാസംവാസകോതി ഉക്ഖേപനീയകമ്മകതോ. ലദ്ധിനാനാസംവാസകോതി ഉക്ഖിത്താനുവത്തകോ. ‘‘ഹുത്വാ’’തി ഇമിനാ ‘‘ഭിക്ഖുനീചതുത്ഥോ’’തിആദീസു ചതുവീസതിയാ ഠാനേസു കിരിയാവിസേസനഭാവം ദസ്സേതി. ഭിക്ഖുനീ ചതുത്ഥീ ഏതസ്സാതി ഭിക്ഖുനീചതുത്ഥോ, ചതുവഗ്ഗോ സങ്ഘോതിആദിനാ വചനത്ഥോ കാതബ്ബോ.

൩൯൩. പരിവാസാദീതിആദിസദ്ദേന മൂലായകസ്സനമാനത്തഅബ്ഭാനാനി സങ്ഗണ്ഹാതി. തേസന്തി പരിവാസാദികമ്മാനം. പരതോതി പരസ്മിം ചൂളവഗ്ഗേ (ചൂളവ. അട്ഠ. ൭൫ ആദയോ).

൩൯൪. പടികുട്ഠകതകമ്മസ്സാതി പടികുട്ഠസ്സ ഹുത്വാ കതസ്സ കമ്മസ്സ. പകതത്തസ്സാതി ഏത്ഥ പകതിസീലസങ്ഖാതോ അത്താ സഭാവോ ഏതസ്സാതി പകതത്തോതി അത്ഥം ദസ്സേന്തോ ആഹ ‘‘അവിപന്നസീലസ്സാ’’തി. സങ്ഘാദിസേസം അനാപജ്ജന്തസ്സാപി അവിപന്നസീലത്താ വുത്തം ‘‘പാരാജികം അനജ്ഝാപന്നസ്സാ’’തി. ഇമിനാ സങ്ഘാദിസേസം ആപജ്ജന്തോപി പകതത്തോയേവാതി ദസ്സേതി. സോപി ഹി ഇധ അവിപന്നസീലോ നാമ, അഞ്ഞത്ഥ പന സങ്ഘാദിസേസസ്സ സീലവിപത്തിഭാവതോ തം ആപജ്ജന്തോപി വിപന്നസീലോയേവ നാമ. ആനന്തരികസ്സാതി ഏത്ഥ അനന്തരസദ്ദസ്സ സമ്ബന്ധഞ്ച ണികപച്ചയസ്സ അത്ഥഞ്ച ദസ്സേന്തോ ആഹ ‘‘അത്തനോ അനന്തരം നിസിന്നസ്സാ’’തി. തത്ഥ ‘‘അത്തനോ’’തി ഇമിനാ അനന്തരസദ്ദസ്സ സമ്ബന്ധം ദസ്സേതി. ‘‘നിസിന്നസ്സാ’’തി ഇമിനാ ണികപച്ചയസ്സ അത്ഥം ദസ്സേതി.