൧൫൧. അജ്ഝാരാമേ ഉപാഹനപടിക്ഖേപകഥാ

൨൪൮. ‘‘യേന സിപ്പേനാ’’തിആദിനാ അഭി അധികം ജീവന്തി അനേനാതി അഭിജീവനം, കിംതം? സിപ്പന്തി അത്ഥം ദസ്സേതി. തസ്സാതി സിപ്പസ്സ. ഇധാതി ഇമസ്മിം സാസനേ. യംസദ്ദോ വചനവിപല്ലാസോതി ആഹ ‘‘യേ തുമ്ഹേ’’തി. ഹീതി സച്ചം. യംനിപാതോതി യംഇതി നിപാതോ യദിസദ്ദസ്സ അത്ഥേ പവത്തതീതി യോജനാ. ആചരിയാ ഏവാതി ഏവസദ്ദേന ആചരിയമത്തഭാവം പടിക്ഖിപതി. ഹീതി സച്ചം. സോതി അവസ്സികോ. തന്തി ഛബ്ബസ്സം. നിസ്സായ വച്ഛതീതി അവസ്സികസ്സ ചതുവസ്സകാലേ ഛബ്ബസ്സസ്സ ദസവസ്സികത്താ തം നിസ്സായ വസതി. ഉപജ്ഝായമത്തം ദസ്സേന്തോ ആഹ ‘‘ഉപജ്ഝായസ്സാ’’തിആദി. മഹന്തതരാതി അത്തനോ വുഡ്ഢതരാ. ഉപജ്ഝായസ്സ മത്തം പമാണമേതേസന്തി ഉപജ്ഝായമത്താ.

൨൪൯. പാദതോ നിക്ഖന്തേന ഖീലസദിസേന മംസേന പവത്തോ ആബാധോ പാദഖീലാബാധോതി വചനത്ഥം ദസ്സേന്തോ ആഹ ‘‘പാദതോ’’തിആദി. പാദതോ നിക്ഖന്തന്തി സമ്ബന്ധോ.

൨൫൧. തിണപാദുകാതിആദീസു തിണേന കതാ പാദുകാ തിണപാദുകാതി വചനത്ഥാദിം ദസ്സേന്തോ ആഹ ‘‘യേന കേനചി തിണേനാ’’തിആദി. തം സുവിഞ്ഞേയ്യമേവ. ‘‘ഭൂമിയം സുപ്പതിട്ഠിതാതി’’ആദിനാ ന സങ്കമിതബ്ബാതി അസങ്കമനീയാതി അത്ഥം ദസ്സേതി.

൨൫൨. അങ്ഗജാതേനേവാതി അത്തനോ അങ്ഗജാതേന ഏവ. അങ്ഗജാതന്തി ഗാവീനം അങ്ഗജാതം. ഓഗാഹേത്വാതി ഏത്ഥ ഓത്യൂപസഗ്ഗോ ദള്ഹത്ഥോതി ആഹ ‘‘ദള്ഹം ഗഹേത്വാ’’തി.