൫൮. അലജ്ജീനിസ്സയവത്ഥുകഥാ

൧൨൦. ‘‘അലജ്ജീനം ഓവാദ’’ന്തി പാഠസേസേന യോജിതേ സാമ്യത്ഥേ സാമിവചനമ്പി യുജ്ജതേവ. തം നയം അദസ്സേത്വാ ‘‘ഉപയോഗത്ഥേ സാമിവചന’’ന്തി വുത്തം. ‘‘ഭിക്ഖൂഹി സഭാഗത’’ന്തി ഇമിനാ ഭിക്ഖൂഹി സമാനോ സീലാദിഗുണസങ്ഖാതോ ഭാഗോ ഇമസ്സാതി ഭിക്ഖുസഭാഗോ, തസ്സ ഭാവോ ഭിക്ഖുസഭാഗതന്തി വചനത്ഥം ദസ്സേതി. ‘‘ലജ്ജിഭാവ’’ന്തി ഇമിനാ ഭാവപച്ചയസ്സ സരൂപം ദസ്സേതി. നവട്ഠാനന്തി അഭിനവട്ഠാനം. ഗതേന ഭിക്ഖുനാതി സമ്ബന്ധോ.

ഥേരോതി നിസ്സയദായകോ ഥേരോ. ഗഹേതുകാമോതി നിസ്സയം ഗഹേതുകാമോ. ആചാരന്തി നിസ്സയപടിപന്നസ്സ ആചാരം. തദഹേവാതി തസ്മിം ഗതഅഹനി ഏവ. ആഭോഗസ്സ കതത്താ, അരുണുഗ്ഗമനസ്സ ച അജാനനത്താ വുത്തം ‘‘അനാപത്തീ’’തി. അരുണുഗ്ഗമനം അജാനന്തോപി ആഭോഗസ്സ അകതത്താ വുത്തം ‘‘അരുണുഗ്ഗമനേ ദുക്കട’’ന്തി. ‘‘ദ്വേ തീണി ദിവസാനീ’’തി പദേന ചതു പഞ്ച ഛ ദിവസാനിപി ഗഹേതബ്ബാനി ലക്ഖണഹാരനയേന അനിസ്സിതേന വസിതബ്ബഭാവേന സമാനഫലത്താ. തേനാഹ ‘‘സത്താഹം വസിസ്സാമീ’’തി. ലദ്ധപരിഹാരോതി ലദ്ധോ പരിഹാരോ ആപത്തിഅപനയനം യേനാതി ലദ്ധപരിഹാരോ.