൪൮. ഥേയ്യസംവാസകവത്ഥുകഥാ

൧൧൦. പാരിജഞ്ഞപത്തസ്സാതി പരിഹായതീതി പരിജാനി, ഇസ്സരിയഭോഗാദി, തസ്സ ഭാവോ പാരിജഞ്ഞം, ഇസ്സരിയഭോഗാദിക്ഖയോ, തം പത്തോതി പാരിജഞ്ഞപത്തോ, തസ്സ. ‘‘പാരിജുഞ്ഞപത്തസ്സാ’’തിപി ഉകാരേന സഹ പാഠോ അത്ഥി. ഖീണകോലഞ്ഞോതി ഏത്ഥ കുലേ ജാതാ കോലഞ്ഞാ, ണ്യപച്ചയോ, നകാരാഗമോ. ഖീണാ കോലഞ്ഞാ അസ്സാതി ഖീണകോലഞ്ഞോതി വചനത്ഥം ദസ്സേന്തോ ആഹ ‘‘മാതിപക്ഖപിതിപക്ഖതോ’’തിആദി. തത്ഥ മാതിപക്ഖപിതിപക്ഖതോതി മാതുയാ പക്ഖോ മാതിപക്ഖോ, പിതുനോ പക്ഖോ പിതിപക്ഖോ, മാതിപക്ഖോ ച പിതിപക്ഖോ ച മാതിപക്ഖപിതിപക്ഖാ. ഫാതിം കാതുന്തി ഏത്ഥ ഫാ-ധാതു വഡ്ഢനത്ഥോതി ആഹ ‘‘വഡ്ഢേതു’’ന്തി. ‘‘പുച്ഛിയമാനോ’’തി ഇമിനാ അനുയുഞ്ജിയമാനോതി ഏത്ഥ അനുത്യൂപസഗ്ഗവസേന യുജസദ്ദോ പുച്ഛനത്ഥോതി ദസ്സേതി.

ഥേയ്യസംവാസകോതി ഥേനനം ഥേയ്യം നകാരസ്സ യകാരം കത്വാ, ഥേയ്യായ സംവാസകോ ഇമസ്സാതി ഥേയ്യസംവാസകോ. ഏത്ഥ ച ന കേവലം വസ്സഗണനാദികോയേവ സംവാസോ നാമ ഹോതി, അഥ ഖോ ഥേയ്യായ ലിങ്ഗഗഹണമ്പി സംവാസോയേവ നാമ. തസ്മാ തസ്സ തിവിധഭാവം ദസ്സേന്തോ ആഹ ‘‘തയോ’’തിആദി. തത്ഥ ലിങ്ഗം ഥേനേതീതി ലിങ്ഗഥേനകോ, ഏസേവ നയോ ഇതരേസുപി. തമത്ഥം വിത്ഥാരേന്തോ ആഹ ‘‘തത്ഥാ’’തിആദി. തത്ഥ യോതി ഥേയ്യസംവാസകോ. ലിങ്ഗമത്തസ്സേവാതി ഏത്ഥ മത്തസദ്ദേന സംവാസാദയോ നിവത്തേതി.

വിദേസന്തി അത്തനോ ദേസതോ വിയോഗം ദേസം. വിസദ്ദോ ഹേത്ഥ വിയോഗത്ഥവാചകോ. അഥ വാ വി ദൂരം ദേസം. വിസദ്ദോ ഹേത്ഥ ദൂരത്ഥവാചകോ. മുസാതി അഭൂതത്ഥേ ദുതിയന്തനിപാതോ, അഭൂതം വചനന്തി അത്ഥോ. പടിബാഹതീതി അഞ്ഞേ നിവാരേതി. സംവാസഥേനകോ നാമാതി ഏത്ഥ കോ സംവാസോ നാമ, നനു ഏകകമ്മാദികോതി ആഹ ‘‘ഭിക്ഖുവസ്സഗണനാദികോ’’തിആദി. ഭിക്ഖുവസ്സഗണനാദികോതി ആദിസദ്ദേന യഥാവുഡ്ഢം വന്ദനസാദിയനം ആസനപടിബാഹനം ഉപോസഥപവാരണാദീസു സന്ദിസ്സനന്തി ഇമാനി സങ്ഗണ്ഹാതി. ‘‘കിരിയഭേദോ’’തി ഇമിനാ സം ഏകതോ വസിയതി അനേനാതി സംവാസോതി വചനത്ഥേന കിരിയഭേദോ സംവാസോ നാമാതി ദസ്സേതി. ഇമസ്മിം അത്ഥേതി ഇമസ്മിം വത്ഥുമ്ഹി, ഇമസ്മിം ഠാനേതി അത്ഥോ. ഇമിനാ പാരാജികാദിട്ഠാനേ പന ഏകകമ്മാദികോ സംവാസോ നാമാതി ദസ്സേതി.

‘‘ലിങ്ഗസ്സ ചേവ സംവാസസ്സ ചാ’’തി ഇമിനാ ഉഭയഥേനകോതി ഏത്ഥ ഉഭയസരൂപം ദസ്സേതി.

ഏത്ഥാതി ഥേയ്യസംവാസകട്ഠാനേ. രാജ…പേ… ഭയേഹി വാതി ഏത്ഥ ഭയസദ്ദോ പച്ചേകം യോജേതബ്ബോ. രാജഭയേന ച ദുബ്ഭിക്ഖഭയേന ച കന്താരഭയേന ച രോഗഭയേന ച വേരിഭയേന ചാതി ഹി അത്ഥോ. ചീവരഗഹണത്ഥന്തി ചീവരാഹരണത്ഥം, അയമേവ വാ പാഠോ. വാസദ്ദോ ഹേത്വത്ഥം വാ സമ്പദാനത്ഥം വാ സമ്പിണ്ഡേതി. അയം ഗാഥാ വിഭത്തിയാ ഉപ്പടിപാടിത്താ ഭഗ്ഗരീതിസങ്ഖാതാ അലങ്കാരദോസാ ന മുത്താ. ലിങ്ഗന്തി സമണലിങ്ഗം. ഇധാതി ഇമസ്മിം സാസനേ.

നാധിവാസേതീതി ന സമ്പടിച്ഛതി. യാവാതി യത്തകം കാലം, അയം പനേത്ഥ യോജനാ – ഇധ യോ രാജ…പേ… ഭയേന വാ ചീവരഗഹണത്ഥം വാ ലിങ്ഗം ആദിയതി, സോ സുദ്ധമാനസോ ഹുത്വാ യാവ സംവാസം നാധിവാസേതി, താവ ഏസോ ‘‘ഥേയ്യസംവാസകോ നാമാ’’തി ന വുച്ചതീതി.

തത്രാതി താസു ഗാഥാസു. ഇധാതി ഇമസ്മിം സാസനേ. ഏവന്തി ലിങ്ഗേ ഗഹിയമാനേ. തസ്മിന്തി ജനേ. അനോസരിത്വാവാതി അനോക്കമിത്വാവ. ലിങ്ഗം അപനേത്വാതി സയം ഗഹിതം സമണലിങ്ഗം വിനാസേത്വാ. പബ്ബജിതാലയന്തി പബ്ബജിതഛായം. പുബ്ബേതി സംവാസഥേനകേ.

സബ്ബപാസണ്ഡിയഭത്താനീതി സബ്ബാനി പാസണ്ഡം ഉദ്ദിസ്സ ദിന്നാനി ഭത്താനി.

സത്തേ വഹതീതി സത്തവാഹോ. വിരമിതബ്ബന്തി വേരം, തം പവത്തേതീതി വേരികോ. കായേന പരിഹരിതബ്ബാനീതി കായപരിഹാരിയാനി. തന്തി തുവം. ഹീനായാവത്തഭാവന്തി ഹീനായ ഗിഹിഭാവായ ആവത്തഭാവം.

ഉപ്പബ്ബജിത്വാതി പബ്ബജവിയോഗം കത്വാ. തമത്ഥന്തി ഉപ്പബ്ബജിതസങ്ഖാതമത്ഥം. അസ്സാതി മഹാസാമണേരസ്സ.

മഹന്തോ വാതി ഏത്ഥ വാസദ്ദോ ഗരഹത്ഥോ. പഗേവ ദഹരോതി ദസ്സേതി. അബ്യത്തോ ഹോതീതി യോജനാ. സോതി സാമണേരോ.

വച്ഛഗോരക്ഖാദീനീതി ഏത്ഥ വച്ഛോതി തരുണഗോണോ. സോ ഹി മാതുസന്തികേ വസതീതി വച്ഛോ. മാതുയാ വിയോഗകാലേ വാ വസ്സതീതി വച്ഛോതി വുച്ചതി. ഇമിനാ ദമ്മഗവജരഗ്ഗവാപി സാമഞ്ഞതോ ഗഹിതാ. ഗോ വുച്ചതി ഖേത്തഭൂമി. വച്ഛോ ച ഗോ ച വച്ഛഗവാ, തേസം രക്ഖനം വച്ഛഗോരക്ഖോ, സോ ആദി യേസം കസികമ്മാദീനന്തി വച്ഛഗോരക്ഖാദീനി. ‘‘സൂപസമ്പന്നോ’’തി ഇമിനാ ഗഹട്ഠമ്പി സചേ ഉപസമ്പാദേതി, സൂപസമ്പന്നോതി ദസ്സേതി. അനുപസമ്പന്നകാലേയേവാതി സാമണേരകാലേയേവ. വിനയവിനിച്ഛയേതി വിനയേ വുത്തസ്സ ഥേയ്യസംവാസകസ്സ വിനിച്ഛയേ. ഥേയ്യസംവാസകോ ഹോതി ലിങ്ഗസ്സ അപനീതത്താ.

ഥേയ്യസംവാസകോ ന ഹോതി സലിങ്ഗേ ഠിതത്താ. അയമ്പി ഥേയ്യസംവാസകോ ന ഹോതി കാസായേ സഉസ്സാഹത്താ. ഥേയ്യസംവാസകോ ഹോതി കാസായേ ധുരസ്സ നിക്ഖിത്തത്താ.

ഥേയ്യസംവാസകോ ന ഹോതി സലിങ്ഗേ ഠിതത്താ. നേവ ഥേയ്യസംവാസകോ ഹോതി കാസായേ സഉസ്സാഹത്താ. മേഥുനസേവനാദീഹീതിആദിസദ്ദേന പാണാതിപാതാദയോ സങ്ഗണ്ഹാതി. ഥേയ്യസംവാസകോ ഹോതി കാസായേ ധുരസ്സ നിക്ഖിത്തത്താ. ഓവട്ടികന്തി അധോവട്ടേന കരണം. രക്ഖതി താവാതി താവ രക്ഖതി വീമംസനേന നിവാസിതത്താ. ലിങ്ഗന്തി സമണലിങ്ഗം. ഥേയ്യസംവാസകോ ഹോതി ഗിഹിലിങ്ഗസ്സ സമ്പടിച്ഛിതത്താ.

വീമംസതി വാ സമ്പടിച്ഛതി വാ രക്ഖതിയേവ ഓദാതവത്ഥസ്സ അന്തോകാസായഭാവതോ. ‘‘ഭിക്ഖുനിയാപി ഏസേവ നയോ’’തി വുത്തമേവത്ഥം വിഭാവേന്തോ ആഹ ‘‘സാപീ’’തിആദി.

വുഡ്ഢപബ്ബജിതോ സാമണേരോതി സമ്ബന്ധോ. പാളിയമ്പീതി പന്തിയമ്പി. സേനോ മംസപേസിം ഗഹേത്വാ ഗച്ഛതി വിയ ഭത്തപിണ്ഡേ പത്തം ഉപനാമേത്വാ ഗഹേത്വാ ഗച്ഛതി. ഥേയ്യസംവാസകോ ന ഹോതി വസ്സാനം അഗണനത്താ.