൪൮. തിത്ഥിയപക്കന്തകകഥാ

൧൧൦. പക്കമതീതി പക്കന്തോ, ‘‘പവിട്ഠോ’’തി ഇമിനാ കമുധാതുയാ പദവിക്ഖേപത്ഥം ദസ്സേതി, ഇച്ഛാകന്തിഅത്ഥേ നിവത്തേതി. സോതി തിത്ഥിയപക്കന്തകോ. തത്രാതി തിത്ഥിയപക്കന്തകേ. ഉപസമ്പന്നോ ഭിക്ഖു ഗച്ഛതീതി സമ്ബന്ധോ. തേസന്തി തിത്ഥിയാനം. ‘‘തിത്ഥിയോ ഭവിസ്സാമീ’’തി പുബ്ബേവ ലദ്ധിഗഹിതത്താ വുത്തം ‘‘ലിങ്ഗേ ആദിന്നമത്തേ’’തി. കുസചീരാദീനീതി ഏത്ഥ കുസോ വുച്ചതി സലാകാ. ചീരോതി പന്തി, ആവലീതി അത്ഥോ. കുസേ രജ്ജുനാ ആവുനിത്വാ കതോ ചീരോ കുസചീരോ, സോ ആദി യേസം താനീതി കുസചീരാദീനി. ആദിസദ്ദേന ഫലകചീരാദയോ സങ്ഗണ്ഹാതി. കുസതിണേഹി കതോ ചീരോ കുസചീരോതിപി വദന്തി. നഗ്ഗോതി അചേലകോ. ആജീവകോതി അചേലകവതമാദായ ജീവതീതി ആജീവകോ. തേസന്തി ആജീവകാനം. ഓവദിതോ ഹുത്വാതി സമ്ബന്ധോ.

കിന്തി കിം വതം. ലുഞ്ചാപേതീതി അപനയാപേതി. മോരപിഞ്ഛാദീനീതി ഏത്ഥ പിഞ്ഛം വുച്ചതി പക്ഖോ. സോ ഹി പിഞ്ഛതി ആകാസേ ഗച്ഛതി അനേനാതി പിഞ്ഛന്തി വുച്ചതി. പിഛി ഗതിയന്തി ധാതുപാഠോ. മോരസ്സ പിഞ്ഛം മോരപിഞ്ഛം, തം ആദി യേസം താനീതി മോരപിഞ്ഛാദീനി. ആദിസദ്ദേന ഉലൂകപിഞ്ഛാദയോ സങ്ഗണ്ഹാതി. യാവ ന സമ്പടിച്ഛതീതി യാവ ലദ്ധിം ന സമ്പടിച്ഛതി. നന്തി വീമംസമാനം ഭിക്ഖും. ലദ്ധീതി തിത്ഥിയലദ്ധി. രക്ഖതീതി തിത്ഥിയപക്കന്തകതോ രക്ഖതി. ലദ്ധിയാ അഭാവേന തിത്ഥിയപക്കന്തകോ ന ഹോതീതി അധിപ്പായോ. അച്ഛിദ്ദചീവരോതി ഏത്ഥ ആകാരോ കോധത്ഥോ, അഡ്ഡത്ഥോ വാ ഹോതി, ഛിദ്ദസദ്ദോ ദൂസനത്ഥോ ഹോതി. തസ്മാ ആകോധേന അഡ്ഡേന വാ ഛിദ്ദോ ദൂസിതോതി അച്ഛിദ്ദോതി അത്ഥോ ദട്ഠബ്ബോ. ‘‘അച്ഛിന്നോ’’തിപി പാഠോ. അച്ഛിദ്ദം ചീവരമേതസ്സാതി അച്ഛിദ്ദചീവരോ. തിത്ഥായതനന്തി തിത്ഥീനം നിവാസട്ഠാനം, തിത്ഥിയാനം ഉപസ്സയന്തി അത്ഥോ.