൨൭. രാജഭടവത്ഥുകഥാ

൯൦. ഉച്ചിനഥാതി ഏത്ഥ ചിധാതുയാ വഡ്ഢനത്ഥം ദസ്സേന്തോ ആഹ ‘‘വഡ്ഢേഥാ’’തി. സോതാപന്നത്താതി ബിമ്ബിസാരരഞ്ഞോ =൦൮ സോതാപന്നഭാവതോ. ഘാതേഥാതി ജീവിതാ വോരോപേഥ. ഹനഥാതി പഹരഥ. തതോതി ഉപജ്ഝായതോ. ആചരിയോ സേട്ഠോതി സമ്ബന്ധോ. തതോതി ആചരിയതോ. ഇദന്തി വചനം, ആഗതന്തി സമ്ബന്ധോ. ആഹംസു വോഹാരികാ മഹാമത്താ മുസാവാദേനാതി യോജനാ. അമച്ചോതി സബ്ബരാജകിച്ചേസു അമാ സഹ രഞ്ഞാ ഭവതീതി അമച്ചോ. അമാസദ്ദോ സഹത്ഥേ നിപാതോ. ‘‘അമാ’’തി നിപാതതോ ഭവത്ഥേ അച്ചപച്ചയോ (മോഗ്ഗല്ലാനേ ൪.൨൩ സുത്തേ). മഹാമത്തോതി മഹന്തോ മത്താ ഇസ്സരിയാ ഏതസ്സാതി മഹാമത്തോ. മത്താസദ്ദോ ഹേത്ഥ ഇസ്സരിയവാചകോ. സേവകോതി രാജാനം സേവതി ഭജതീതി സേവകോ. ഭത്തവേതനഭടോതി ഭത്തവേതനാനമത്ഥായ ഭടോ. തസ്സാതി രാജഭടസ്സ. പുത്തനത്തഭാതുകാദയോതിആദിസദ്ദേന ഭാഗിനേയ്യാദയോ സങ്ഗണ്ഹാതി. യോ പനാതി രാജഭടോ പന. നിയ്യാതേതീതി അപ്പേതി. തം ഠാനന്തി തം രാജഭടട്ഠാനം. യേന വാതി കമ്മകാരേന വാ. യംകമ്മകാരണാതി യസ്സ കമ്മസ്സ കാരണാ. യോ വാതി രാജഭടോ വാ. പബ്ബജസ്സൂതി പബ്ബാജേഹി.