൨൬. പഞ്ചാബാധവത്ഥുകഥാ

൮൮. മഗധേസൂതി ഏത്ഥ ബഹുവചനപദേന വുത്തത്താ ജനപദസ്സ നാമന്തി ആഹ ‘‘മഗധനാമകേ ജനപദേ’’തി. അമനുസ്സാനഞ്ചാതി മനുസ്സേഹി അഞ്ഞസത്താനഞ്ച. ഉസ്സന്നസദ്ദോ ച ഉസ്സദസദ്ദോ ച വുഡ്ഢിപ്പത്തപരിയായോതി ആഹ ‘‘ഉസ്സന്നാ വുഡ്ഢിപ്പത്താ’’തി. ‘‘ഫാതിപ്പത്താ’’തി ഇമിനാ തമേവത്ഥം ദസ്സേതി. തേഹീതി കുട്ഠാദീഹി പഞ്ചഹി ആബാധേഹി.

തത്ഥാതി കുട്ഠാദീസു പഞ്ചസു ആബാധേസു. ആബാധികം ആഭുസോ ബാധതി പീളേതീതി ആബാധോ, അങ്ഗപച്ചങ്ഗം കുടതി ഛിന്ദതീതി കുട്ഠം. ‘‘രത്തകുട്ഠം വാ’’തിആദീസു വാസദ്ദേന സേതകുട്ഠാദീനിപി സങ്ഗണ്ഹാതി. കീടിഭ ദദ്ദു ഖജ്ജു ആദിപ്പഭേദമ്പീതി കീടിഭോ ച ദദ്ദു ച ഖജ്ജു ച കീടിഭദദ്ദുഖജ്ജുയോ, താ ആദയോ യേസം കുട്ഠാനന്തി കീടിഭദദ്ദുഖജ്ജുആദയോ, തേസം പഭേദോ കീടിഭദദ്ദു ഖജ്ജുആദിപ്പഭേദോ, തമ്പി. തത്ഥ കീടിഭോതി കീട ഇഭോതി പദവിഭാഗോ കാതബ്ബോ. തത്ഥ കീടോതി കിമി. ഇമിനാ കീടകുലാവകം ‘‘കീടോ’’തി ഗഹേതബ്ബം, കീടോ വിയാതി കീടോ, കുട്ഠവിസേസോ. ഇഭോതി ഗജോ. ഇമിനാ ഗജസ്സ സബലം ‘‘ഇഭോ’’തി ഗഹേതബ്ബം. ഇഭോ വിയാതി ഇഭോ, കുട്ഠവിസേസോ. കീടോയേവ ഇഭോ കീടിഭോ, കുട്ഠാബാധവിസേസോ, യം ലോകേ ‘‘കുട്ടാബാധ വിസേസോ’’ഇതി വോഹരന്തി. ദദ്ദൂതി കച്ഛു. സാ ഹി സരീരം ദംസതി വിദംസതി, ഹിംസതീതി വാ ദദ്ദുതി വുച്ചതി. ഏകസ്സ ദകാരസ്സ രകാരം കത്വാ ‘‘ദദ്ദു’’തിപി പാഠോ. യം ലോകേ ‘‘പ്വേ:’’ഇതി വോഹരന്തി. ഖജ്ജൂതി കണ്ഡുവനം. തഞ്ഹി സരീരം ഖജ്ജതി ബ്യഥതി ഖദതി, ഹിംസതീതി വാ ഖജ്ജൂതി വുച്ചതി. യം ലോകേ ‘‘ഖജ്ജ’’ഇതി വോഹരന്തി. ‘‘കച്ഛൂ’’തിപി പാഠോ, സോ അപാഠോ ദദ്ദുസദ്ദേന തസ്സ ഗഹിതത്താ. തന്തി കുട്ഠം. പകതിപടിച്ഛന്നട്ഠാനേതി പകതിയാ പടിച്ഛന്നട്ഠാനേ, യഥാനിവത്ഥപാരുതട്ഠാനേതി അത്ഥോ. ഇമിനാ വിസേസതോ പടിച്ഛന്നം നിവത്തേതി. അവഡ്ഢനകപക്ഖേ ഠിതം സചേ ഹോതീതി യോജനാ. പകതിവണ്ണേതി =൦൭ പകതിഛവിയം. യഥാ അവണാ ഛവി ഹോതി, തഥാതി അത്ഥോ. ഇദം വണവത്ഥും സന്ധായ ന വുത്തം.

മേദഗണ്ഡോതി മേദോ അസ്മിം അത്ഥീതി മേദോ, ഗണ്ഡതി ഫോടോ ഭവതീതി ഗണ്ഡോ, മേദോയേവ ഗണ്ഡോ മേദഗണ്ഡോ. യം ലോകേ ‘‘മേദഗണ്ഡോഇതി വോഹരന്തി. കോലട്ഠീതി കോലം വുച്ചതി ബദരഫലം, തസ്സ അട്ഠി കോലട്ഠി. അവഡ്ഢനകപക്ഖേ ഠിതേ സതീതി യോജനാ. സഞ്ഛവിന്തി സംവിജ്ജമാനഛവിം, സഞ്ജാതഛവിം വാ. ഉണ്ണിഗണ്ഡാതി ഉദ്ധം നമന്തീതി ഉണ്ണിയോ, തായേവ ഗണ്ഡാ ഉണ്ണിഗണ്ഡാ. യേ ലോകേ ‘‘ഉണ്ണിഗണ്ഡാ’’ ഇതി വോഹരന്തി. തത്ഥ തത്ഥാതി തസ്മിം തസ്മിം സരീരപദേസേ. ഖീരപീളകാതി ഖീരം ഏത്ഥ അത്ഥീതി ഖീരാ, താ ഏവ പീളകാ ഖീരപീളകാ. യാ ലോകേ ‘‘ഖീരപീളകാ’’ ഇതി ച ഇതി ച വോഹരന്തി. താസൂതി പീളകാസു. ഖീരപീളകാ നാമ ഗണ്ഡാ ഹോന്തീതി സമ്ബന്ധോ. ഖരപീളകാതി ഖരസഭാവാ പീളകാ. ഖരസഭാവത്താ തേന സത്താ മരണമ്പി ഗച്ഛന്തി, മരണമത്തമ്പി ദുക്ഖം. യാ ലോകേ ഇതി ‘‘ഖീരപീളകാ’’ വോഹരന്തി. പദുമകണ്ണികാ നാമ ഗണ്ഡാ ഹോന്തീതി സമ്ബന്ധോ. പദുമസ്സ കണ്ണികാ വിയ പദുമകണ്ണികാ. യാ ലോകേ ‘‘പദുമകണ്ണികാ’’ഇതി വോഹരന്തി. സാസപബീജകാ നാമ ഗണ്ഡാതി സമ്ബന്ധോ. സാസപസ്സ ബീജം പമാണമേതാസന്തി സാസപബീജകാ. യാ ലോകേ ‘‘സാസപബീജകാ’’ ഇതി വോഹരന്തി. താ സബ്ബാതി സബ്ബാ താ പീളകാ, ഗണ്ഡജാതിയോ വാ. താസൂതി പീളകാസു, ഗണ്ഡജാതീസു വാ.

പദുമപുണ്ഡരീകപത്തവണ്ണന്തി പദുമം നാമ രത്തം, പുണ്ഡരീകം നാമ സേതം, തേസം പുപ്ഫപത്തസ്സ വണ്ണം വിയ വണ്ണമേതസ്സാതി പദുമപുണ്ഡരീകപത്തവണ്ണം, സങ്ഖകുട്ഠം. യം ലോകേ ‘‘പദുമപുണ്ഡരീകപത്തവണ്ണം, സങ്ഖകുട്ഠം’’ ഇതി വോഹരന്തി. യേനാതി കുട്ഠേന. ഗുന്നം സരീരം സബലം വിയ മനുസ്സാനം സരീരം സബലം ഹോതീതി യോജനാ. തസ്മിന്തി കിലാസേ. സോസബ്യാധീതി ഖയരോഗോ. സോ ഹി യസ്മാ മംസലോഹിതാദീനി സോസാപേതി, തസ്മാ സോസോതി വുച്ചതി. യം ലോകേ ‘‘സാംസ’’ ഇതി ച ‘‘സോസബ്യാധി’’ ഇതി ച വോഹരന്തി. തസ്മിന്തി സോസബ്യാധിമ്ഹി. അപമാരോതി അപസ്മാരോ. സോ ഹി സാരതോ അപഗതത്താ ‘‘അപമാരോ’’തി വുച്ചതി സകാരസ്സ മകാരം കത്വാ. യം ലോകേ ‘‘അപമാര’’ ഇതി ച ‘‘അരൂ?’’ഇതി ച വോഹരന്തി. തത്ഥാതി ദ്വീസു ഉമ്മാദേസു. ആധാരേ ചേതം ഭുമ്മവചനം. ദുത്തികിച്ഛോ ഹോതീതി സമ്ബന്ധോ.