൭. സത്തമസിക്ഖാപദം

൮൨൨. സത്തമേ ‘‘പയോഗദുക്കടം നാമാ’’തി ഇമിനാ ഹേട്ഠാ വുത്തേസു അട്ഠസു ദുക്കടേസു പുബ്ബപയോഗദുക്കടം ദസ്സേതി. ന കേവലം പുബ്ബപയോഗദുക്കടം ഏത്തകമേവ, അഥ ഖോ അഞ്ഞമ്പി ബഹു ഹോതീതി ദസ്സേന്തോ ആഹ ‘‘തസ്മാ’’തിആദി. സങ്ഘട്ടനേസുപീതി വിലോളനേസുപി. ദന്തേഹി സങ്ഖാദതീതി ദന്തേഹി ചുണ്ണവിചുണ്ണം കരോതി. ഏത്ഥാതി ഇമസ്മിം സിക്ഖാപദേ, അഞ്ഞായ ഭിക്ഖുനിയാ കാരാപേത്വാതി സമ്ബന്ധോ. ‘‘അഞ്ഞായാ’’തിപദം ‘‘വിഞ്ഞാപേത്വാ’’തി പദേ കാരിതകമ്മം. മാതരമ്പീതി ഏത്ഥ പിസദ്ദോ അഞ്ഞം വിഞ്ഞാപേത്വാ ഭുഞ്ജന്തിയാ പഗേവാതി ദസ്സേതി. തായ വാതി വിഞ്ഞാപിതഭിക്ഖുനിയാ വാ. തന്തി ആമകധഞ്ഞം. തന്തി മഹാപച്ചരിയം വുത്തവചനം. പുബ്ബാപരവിരുദ്ധന്തി പുബ്ബാപരതോ വിരുദ്ധം. ‘‘അഞ്ഞായ…പേ… ദുക്കടമേവാ’’തി പുബ്ബവചനേ ദുക്കടമേവ വുത്തം, പുന ‘‘അഞ്ഞായ…പേ… ദുക്കട’’ന്തി ച പച്ഛിമവചനേ പാചിത്തിയഞ്ച ദുക്കടഞ്ച വുത്തം, തസ്മാ പുബ്ബാപരവിരുദ്ധന്തി വുത്തം ഹോതി. ഹീതി സച്ചം, യസ്മാ വാ.

൮൨൩. ലബ്ഭമാനം ആമകധഞ്ഞന്തി സമ്ബന്ധോ. അഞ്ഞം വാ യംകിഞ്ചീതി മുഗ്ഗമാസാദീഹി വാ ലാബുകുമ്ഭണ്ഡാദീഹി വാ അഞ്ഞം യംകിഞ്ചി തിലാദിം വാതി. സത്തമം.