൧. പഠമസിക്ഖാപദ-അത്ഥയോജനാ

തിംസകാനന്തരം തിംസകാനം അനന്തരേ കാലേ ഛസട്ഠിസതസങ്ഗഹാ ഛഉത്തരസട്ഠിഅധികസതേഹി സിക്ഖാപദേഹി സങ്ഗഹിതാ യേ ധമ്മാ സങ്ഗീതികാരേഹി സങ്ഗീതാ, ദാനി ഇമസ്മിം കാലേ തേസമ്പി ധമ്മാനം അയം വണ്ണനാ ഹോതീതി യോജനാ.

൭൯൩. തത്ഥാതി തേസു ഛസട്ഠിസതസങ്ഗഹേസു സിക്ഖാപദേസു, പഠമസിക്ഖാപദേതി സമ്ബന്ധോ. ‘‘ദ്വേ തയോ’’തി ഏത്ഥ വാസദ്ദോ ലുത്തനിദ്ദിട്ഠോതി ആഹ ‘‘ദ്വേ വാ തയോ വാ’’തി. ഫോടലകേതി കന്ദേ, മിഞ്ജേ വാ. ഏതന്തി ‘‘ഗണ്ഡികേ’’തി ഏതം നാമം. ‘‘പമാണ’’ന്തിഇമിനാ മത്തസദ്ദോ പമാണത്ഥോവ, ന അപ്പത്ഥോ, നാപി അവധാരണത്ഥോതി ദസ്സേതി. ലസുണന്തി സേതവണ്ണമൂലം മഹാകന്ദം. മഹാകന്ദോ ഹി ബ്യഞ്ജനസമ്പാകാദീസു ആമഗന്ധാനം അഭിഭവനത്താ ലസീയതി കന്തീയതീതി ലസുണന്തി വുച്ചതി.

സുവണ്ണഹംസയോനിന്തി സുവണ്ണമയേന പത്തേന യുത്തം ഹംസയോനിം. ജാതിസ്സരോതി ജാതിം ഭവം സരതി ജാനാതീതി ജാതിസ്സരോ. അഥാതി ജാതിസ്സരസ്സ നിപ്ഫന്നത്താ. നിപ്ഫന്നത്ഥോ ഹി അഥസദ്ദോ. പുബ്ബസിനേഹേനാതി പുബ്ബേ മനുസ്സഭവേ ഭാവിതേന സിനേഹേന. താസന്തി പജാപതിയാ ച തിസ്സന്നം ധീതരാനഞ്ച. തം പനാതി പത്തം പന.

൭൯൫. മഗധേസൂതി മഗധരട്ഠേ ഠിതേസു ജനപദേസു. ഹീതി സച്ചം, യസ്മാ വാ. ഇധാതി ‘‘ലസുണം ഖാദേയ്യാ’’തിപദേ. തമ്പീതി മാഗധകമ്പി. ഗണ്ഡികലസുണമേവാതി ഗണ്ഡോ ഫോടോ ഏതസ്സത്ഥീതി ഗണ്ഡികം. ഗണ്ഡസദ്ദോ ഹി ഫോടപരിയായോ, ബഹുത്ഥേ ഇകപച്ചയോ. ബഹുഗണ്ഡികലസുണന്തി ഹി വുത്തം ഹോതി. ഗണ്ഡസദ്ദോ ഹി ഫോടേ ച കപോലേ ചാതി ദ്വീസു അത്ഥേസു വത്തതി, ഇധ പന ഫോടേ വത്തതീതി ദട്ഠബ്ബം. പോത്ഥകേസു പന ഓട്ഠജേന ചതുത്ഥക്ഖരേന പാഠോ അത്ഥി, സോ വീമംസിത്വാ ഗഹേതബ്ബോ. ബഹൂസു ഹി പുബ്ബപോത്ഥകേസു കണ്ഠജോ തതിയക്ഖരോ ച ഓട്ഠജോ ചതുത്ഥക്ഖരോ ചാതി ദ്വേ അക്ഖരാ അഞ്ഞമഞ്ഞം പരിവത്തിത്വാ തിട്ഠന്തി. ന ഏകദ്വിതിമിഞ്ജകന്തി ഏകമിഞ്ജോ പലണ്ഡുകോ ന ഹോതി, ദ്വിമിഞ്ജോ ഭഞ്ജനകോ ന ഹോതി, തിമിഞ്ജോ ഹരിതകോ ന ഹോതീതി അത്ഥോ. കുരുന്ദിയം പന വുത്തന്തി സമ്ബന്ധോ. സങ്ഖാദിത്വാതി ദന്തേഹി ചുണ്ണവിചുണ്ണം കത്വാ.

൭൯൭. പലണ്ഡുകോതി സുകന്ദകോ ഏകോ ലസുണവിസേസോ. ഭഞ്ജനകാദീനി ലോകസങ്കേതോപദേസതോ ദട്ഠബ്ബാനി. ഹീതി സച്ചം. തസ്സാതി ചാപലസുണസ്സ. സഭാവേനേവാതി സൂപസമ്പാകാദിം വിനാ അത്തനോ സഭാവതോ ഏവ. തന്തി മാഗധകം, പക്ഖിപിതുന്തി സമ്ബന്ധോ. ഹീതി സച്ചം. യത്ഥ കത്ഥചീതി യേസു കേസുചീതി. പഠമം.