൧. പഠമനിസ്സഗ്ഗിയപാചിത്തിയസിക്ഖാപദ-അത്ഥയോജനാ

തിംസ നിസ്സഗ്ഗിയാ യേ ധമ്മാ ഭിക്ഖുനീനം ഭഗവതാ പകാസിതാ, തേസം ധമ്മാനം ദാനി ഇമസ്മിം കാലേ അയം സംവണ്ണനാക്കമോ ഭവതീതി യോജനാ.

൭൩൩. പഠമേ ആമത്തികാപണന്തി ഏത്ഥ ആമത്തസദ്ദോ ഭാജനപരിയായോതി ആഹ ‘‘ഭാജനാനീ’’തി. ഭാജനാനി ഹി അമന്തി പരിഭുഞ്ജിതബ്ബഭാവം ഗച്ഛന്തീതി ‘‘അമത്താനീ’’തി വുച്ചന്തി. അമത്താനി വിക്കിണന്തീതി ‘‘ആമത്തികാ’’തി വചനത്ഥം ദസ്സേന്തോ ആഹ ‘‘താനീ’’തിആദി. തേസന്തി ആമത്തികാനം. തം വാതി ആമത്തികാപണം വാ.

൭൩൪. ‘‘സന്നിധി’’ന്തി ഇമിനാ സംനിപുബ്ബോ ചിസദ്ദോ ഉചിനനത്ഥോതി ദസ്സേതി. ഹിസദ്ദോ വിസേസജോതകോ. തത്ഥാതി മഹാവിഭങ്ഗേ. ഇധാതി ഭിക്ഖുനിവിഭങ്ഗേ.

ഇദമ്പീതി ഇദം സിക്ഖാപദമ്പി. പിസദ്ദോ മഹാവിഭങ്ഗസിക്ഖാപദം അപേക്ഖതീതി. പഠമം.