൨. ദുതിയപാരാജികസിക്ഖാപദം

൬൬൪. ദുതിയേ കച്ചി നോ സാതി ഏത്ഥ നോസദ്ദോ നുസദ്ദത്ഥോതി ആഹ ‘‘കച്ചി നു സാ’’തി. പരിവാരവിപത്തീതി പരിജനസ്സ വിനാസനം. ‘‘അകിത്തീ’’തി ഏത്ഥ സമ്മുഖാ നിന്ദം ഗഹേത്വാ ‘‘അയസോ’’തിഇമിനാ പരമ്മുഖാ നിന്ദാ ഗഹേതബ്ബാതി ദസ്സേതും വുത്തം ‘‘പരമ്മുഖഗരഹാ വാ’’തി.

൬൬൬. ‘‘യാ പാരാജികം ആപന്നാ’’തിഇമിനാ ‘‘സാ വാ’’തി ഏത്ഥ തസദ്ദസ്സ വിസയം ദസ്സേതി. ചതുന്നന്തി നിദ്ധാരണത്ഥേ ചേതം സാമിവചനം, ചതൂസൂതി അത്ഥോ. പച്ഛാതി സബ്ബപാരാജികാനം പച്ഛാ. ഇമസ്മിം ഓകാസേതി പഠമതതിയപാരാജികാനമന്തരേ ഠാനേ. ഠപിതന്തി സങ്ഗീതികാരേഹി നിക്ഖിത്തം. ഏത്ഥാതി ഇമസ്മിം സിക്ഖാപദേ. തത്രാതി ദുട്ഠുല്ലസിക്ഖാപദേതി. ദുതിയം.