൭. നിസീദനസിക്ഖാപദം

൫൩൧. സത്തമേ കത്ഥാതി കിസ്മിം ഖന്ധകേ, കിസ്മിം വത്ഥുസ്മിം വാ. ഹീതി സച്ചം. തത്ഥാതി ചീവരക്ഖന്ധകേ, പണീതഭോജനവത്ഥുസ്മിം വാ. ‘‘യഥാ നാമാ’’തി ഇമിനാ ‘‘സേയ്യഥാപീ’’തി പദസ്സ അത്ഥം ദസ്സേതി, ‘‘പുരാണോ ചമ്മകാരോ’’തി ഇമിനാ ‘‘പുരാണാസികോട്ഠോ’’തി പദസ്സ. ചമ്മകാരോ ഹി അസിനാ ചമ്മം കുടതി ഛിന്ദതീതി ‘‘അസികോട്ഠോ’’തി വുച്ചതി. വത്ഥുപ്പന്നകാലമുപനിധായ വുത്തം ‘‘പുരാണോ’’തി. തമേവൂപമം പാകടം കരോന്തോ ആഹ ‘‘യഥാ ഹീ’’തി. ഹീതി തപ്പാകടീകരണം, തം പാകടം കരിസ്സാമീതി ഹി അത്ഥോ. ചമ്മകാരോ കഡ്ഢതീതി സമ്ബന്ധോ. വിത്ഥതന്തി വിസാലം. സോപീതി ഉദായീപി. തം നിസീദനം കഡ്ഢതീതി യോജനാ. തേനാതി കഡ്ഢനഹേതുനാ. തന്തി ഉദായിം. സന്ഥതസദിസന്തി സന്ഥതേന സദിസം. ഏകസ്മിം അന്തേതി ഏകസ്മിം കോട്ഠാസേ, ഫാലേത്വാതി സമ്ബന്ധോതി. സത്തമം.