൮. കണ്ഡുപടിച്ഛാദിസിക്ഖാപദം

൫൩൭. അട്ഠമേ ‘‘കത്ഥാ’’തിആദീനി വുത്തനയാനേവ.

൫൩൯. ‘‘യസ്സാ’’തി പദസ്സ വിസയം ദസ്സേതും വുത്തം ‘‘ഭിക്ഖുനോ’’തി. ‘‘നാഭിയാ ഹേട്ഠാ’’തി ഇമിനാ നാഭിയാ അധോ അധോനാഭീതി വചനത്ഥം ദസ്സേതി, ‘‘ജാണുമണ്ഡലാനം ഉപരീ’’തി ഇമിനാ ജാണുമണ്ഡലാനം ഉബ്ഭ ഉബ്ഭജാണുമണ്ഡലന്തി. ഉബ്ഭസദ്ദോ ഹി ഉപരിപരിയായോ സത്തമ്യന്തനിപാതോ. കണ്ഡുഖജ്ജുസദ്ദാനം വേവചനത്താ വുത്തം ‘‘കണ്ഡൂതി ഖജ്ജൂ’’തി. കണ്ഡതി ഭേദനം കരോതീതി കണ്ഡു. ഖജ്ജതി ബ്യധനം കരോതീതി ഖജ്ജു. കേസുചി പോത്ഥകേസു ‘‘കച്ഛൂ’’തി പാഠോ അത്ഥി, സോ അയുത്തോ.

ലോഹിതം തുണ്ഡം ഏതിസ്സാതി ലോഹിതതുണ്ഡികാ. പിളയതി വിബാധയതീതി പിളകാ. ആ ഭുസോ അസുചിം സവതി പഗ്ഘരാപേതീതി അസ്സാവോതി വചനത്ഥം ദസ്സേന്തോ ആഹ ‘‘അസുചിപഗ്ഘരണ’’ന്തി. അരിസഞ്ച ഭഗന്ദരാ ച മധുമേഹോ ച. ആദിസദ്ദേന ദുന്നാമകാദയോ സങ്ഗണ്ഹാതി. തത്ഥ അരി വിയ ഈസതി അഭിഭവതീതി അരിസം. ഭഗം വുച്ചതി വച്ചമഗ്ഗം, തം ദരതി ഫാലേതീതി ഭഗന്ദരാ, ഗൂഥസമീപേ ജാതോ വണവിസേസോ. മധു വിയ മുത്താദിം മിഹതി സേചതീതി മധുമേഹോ, സോ ആബാധോ മുത്തമേഹോ സുക്കമേഹോ രത്തമേഹോതി അനേകവിധോ. ഥുല്ലസദ്ദോ മഹന്തപരിയായോതി ആഹ ‘‘മഹാ’’തി. അട്ഠമം.