൬. ദുതിയപവാരണസിക്ഖാപദം

൨൪൨. ഛട്ഠേ ന ആചരിതബ്ബോതി അനാചാരോതി വുത്തേ പണ്ണത്തിവീതിക്കമോതി ആഹ ‘‘പണ്ണത്തിവീതിക്കമ’’ന്തി. ‘‘കരോതീ’’തിഇമിനാ ‘‘അത്താനമാചരതീ’’തിആദീസു വിയ ചരസദ്ദോ കരസദ്ദത്ഥോതി ദസ്സേതി. ഉപനന്ധീതി ഏത്ഥ ഉപസദ്ദോ ഉപനാഹത്ഥോ, നഹധാതു ബന്ധനത്ഥോതി ദസ്സേന്തോ ആഹ ‘‘ഉപനാഹ’’ന്തിആദി. ജനിതോ ഉപനാഹോ യേനാതി ജനിതഉപനാഹോ. ഇമിനാ ‘‘ഉപനന്ധോ’’തി പദസ്സ ഉപനഹതീതി ഉപനന്ധോതി കത്ഥുത്ഥം ദസ്സേതി.

൨൪൩. അഭിഹട്ഠുന്തി ഏത്ഥ തുംപച്ചയോ ത്വാപച്ചയത്ഥോതി ആഹ ‘‘അഭിഹരിത്വാ’’തി. പദഭാജനേ പന വുത്തന്തി സമ്ബന്ധോ. സാധാരണമേവ അത്ഥന്തി യോജനാ. അസ്സാതി ഭിക്ഖുസ്സ. തീഹാകാരേഹീതി സാമം ജാനനേന ച അഞ്ഞേസമാരോചനേന ച തസ്സാരോചനേന ചാതി തീഹി കാരണേഹി. ആസാദീയതേ മങ്കും കരീയതേ ആസാദനം, തം അപേക്ഖോ ആസാദനാപേക്ഖോതി ദസ്സേന്തോ ആഹ ‘‘ആസാദന’’ന്തിആദി.

യസ്സ അത്ഥായ അഭിഹടന്തി സമ്ബന്ധോ. ഇതരസ്സാതി അഭിഹാരകതോ അഞ്ഞസ്സ ഭുത്തസ്സാതി. ഛട്ഠം.