൬. ചീവരസിബ്ബനസിക്ഖാപദം

൧൭൫. ഛട്ഠേ ഉദായീതി ഏത്ഥ മഹാഉദായീ, കാളുദായീ, ലാളുദായീതി തയോ ഉദായീ ഹോന്തി. തേസു തതിയോവാധിപ്പേതോതി ആഹ ‘‘ലാളുദായീ’’തി. പഭാവേന ഠാതി പവത്തതീതി പട്ഠോതി കതേ പടിബലോവ ലബ്ഭതി. തേനാഹ ‘‘പടിബലോ’’തി. നിപുണോതി കുസലോ. ‘‘പടിഭാനേന കതചിത്ത’’ന്തിഇമിനാ ‘‘പടിഭാനചിത്ത’’ന്തി പദസ്സ മജ്ഝേ പദലോപം ദസ്സേതി. സോതി ലാളുദായീ അകാസീതി സമ്ബന്ധോ. തസ്സാതി ചീവരസ്സ. ‘‘യഥാസംഹട’’ന്തി ഏത്ഥ ഏവസദ്ദോ അജ്ഝാഹരിതബ്ബോതി ആഹ ‘‘യഥാസംഹടമേവാ’’തി.

൧൭൬. യം ചീവരം നിവാസിതും വാ പാരുപിതും വാ സക്കാ ഹോതി, തം ചീവരം നാമാതി യോജനാ. ഏവം ഹീതി ഏവമേവ. ‘‘ദുക്കട’’ന്തിഇമിനാ ‘‘സയം സിബ്ബതി, ആപത്തി പാചിത്തിയസ്സാ’’തി ഏത്ഥ അന്തരാപത്തിം ദസ്സേതി. ആരാതി സൂചി. സാ ഹി അരതി നിസ്സങ്ഗവസേന ഗച്ഛതി പവിസതീതി ‘‘ആരാ’’തി വുച്ചതി, തസ്സാ പഥോ ഗമനം ആരാപഥോ, തസ്മിം, ആരാപഥസ്സ നീഹരണാവസാനത്താ ‘‘നീഹരണേ’’തി വുത്തം. സതക്ഖത്തുമ്പീതി അനേകക്ഖത്തുമ്പി. ആണത്തോതി ആണാപീയതീതി ആണത്തോ. ‘‘ആണാപിതോ’’തി വത്തബ്ബേ ണാപേസദ്ദസ്സ ലോപം, ഇകാരസ്സ ച അകാരം കത്വാ, ‘‘ആദത്തേ’’തി ആഖ്യാതപദേ തേവിഭത്തിയാ വിയ തപച്ചയസ്സ ച ദ്വിഭാവം കത്വാ ഏവം വുത്തം. തേനാഹ ‘‘സകിം ചീവരം സിബ്ബാതി വുത്തോ’’തി. അഥ പനാതി തതോ അഞ്ഞഥാ പന. ആണത്തസ്സാതി ആണാപിതസ്സ. സമ്ബഹുലാനിപി പാചിത്തിയാനി ഹോന്തീതി സമ്ബന്ധോ.

യേപി നിസ്സിതകാ സിബ്ബന്തീതി യോജനാ, ആചരിയുപജ്ഝായേസു സിബ്ബന്തേസൂതി സമ്ബന്ധോ. തേസന്തി ആചരിയുപജ്ഝായാനം. തേസമ്പീതി നിസ്സിതകാനമ്പി. ഞാതികാനം ഭിക്ഖുനീനം ചീവരന്തി സമ്ബന്ധോ. ‘‘അന്തേവാസികേഹീ’’തിപദം ‘‘സിബ്ബാപേന്തീ’’തിപദേ കാരിതകമ്മം. തത്രാപീതി ആചരിയുപജ്ഝായേഹി സിബ്ബാപനേപി. ‘‘അന്തേവാസികേ’’തിപദം ‘‘വഞ്ചേത്വാ’’തിപദേ സുദ്ധകമ്മം, ‘‘സിബ്ബാപേന്തീ’’തിപദേ കാരിതകമ്മം. ഇതരേസന്തി ആചരിയുപജ്ഝായാനന്തി. ഛട്ഠം.