൩. പേസുഞ്ഞസിക്ഖാപദം

൩൬. തതിയേ ‘‘ജാതഭണ്ഡനാന’’ന്തി വത്തബ്ബേ അഗ്യാഹിതോതിആദീസു വിയ വിസേസനപരനിപാതവസേന ‘‘ഭണ്ഡനജാതാന’’ന്തി വുത്തന്തി ആഹ ‘‘സഞ്ജാതഭണ്ഡനാന’’ന്തി. ‘‘പുബ്ബഭാഗോ’’തി വത്വാ തസ്സ സരൂപം ദസ്സേതി ‘‘ഇമിനാ ച ഇമിനാ ചാ’’തിആദിനാ. വിരുദ്ധം വദതി ഏതേനാതി വിവാദോ, വിഗ്ഗാഹികകഥാ, തം ആപന്നാതി വിവാദാപന്നാ, തേസം. പിസതി സഞ്ചുണ്ണേതീതി പിസുണോ, പുഗ്ഗലോ, തസ്സ ഇദന്തി പേസുഞ്ഞം, വചനന്തി അത്ഥം ദസ്സേന്തോ ആഹ ‘‘പേസുഞ്ഞന്തി പിസുണവാച’’ന്തി.

൩൭. ഭിക്ഖുപേസുഞ്ഞേതി ഭിക്ഖൂനം സന്തികം ഉപസംഹടേ പേസുഞ്ഞവചനേതി ഛട്ഠീസമാസോ.

൩൮. ‘‘ദിസ്വാ’’തി പദം ‘‘ഭണന്തസ്സാ’’തി പദേ പുബ്ബകാലകിരിയാ, ദസ്സനം ഹുത്വാതി അത്ഥോ. തതിയം.