൪൭. സുദ്ധിനിദ്ദേസവണ്ണനാ

൪൫൫. ദേസനാ സംവരോ ഏട്ഠി പച്ചവേക്ഖണന്തി ഭേദതോ സുദ്ധി ചതുബ്ബിധാതി സമ്ബന്ധോ. ‘‘പച്ചവേക്ഖണം ഭേദതോ’’തി വത്തബ്ബേ നിഗ്ഗഹിതലോപോ ദട്ഠബ്ബോ, ദേസനാസുദ്ധി സംവരസുദ്ധി പരിയേട്ഠിസുദ്ധി പച്ചവേക്ഖണസുദ്ധീതി ചതുബ്ബിധാതി വുത്തം ഹോതി. തത്ഥ സുജ്ഝതീതി സുദ്ധി, യഥാധമ്മം ദേസനായ സുദ്ധി ദേസനാസുദ്ധി. വുട്ഠാനസ്സാപി ചേത്ഥ ദേസനായ ഏവ സങ്ഗഹോ ദട്ഠബ്ബോ. മൂലാപത്തീനം പന അഭിക്ഖുതാപടിഞ്ഞാവ ദേസനാതി ഹേട്ഠാ വുത്താ, സാവസ്സ പാരാജികാപന്നസ്സ വിസുദ്ധി നാമ ഹോതി. അയഞ്ഹി യസ്മാ പാരാജികം ആപന്നോ, തസ്മാ ഭിക്ഖുഭാവേ ഠത്വാ അഭബ്ബോ ഝാനാദീനി അധിഗന്തും. ഭിക്ഖുഭാവോ ഹിസ്സ സഗ്ഗന്തരായോ ചേവ ഹോതി, മഗ്ഗന്തരായോ ച. വുത്തഞ്ഹേതം –

‘‘സാമഞ്ഞം ദുപ്പരാമട്ഠം, നിരയായൂപകഡ്ഢതീ’’തി. (ധ. പ. ൩൧൧);

അപരമ്പി വുത്തം –

‘‘സിഥിലോ ഹി പരിബ്ബജോ, ഭിയ്യോ ആകിരതേ രജ’’ന്തി. (ധ. പ. ൩൧൩);

ഇച്ചസ്സ ഭിക്ഖുഭാവോ വിസുദ്ധി നാമ ന ഹോതി. യസ്മാ പന ഗിഹിആദികോ ഹുത്വാ ദാനസരണസീലസംവരാദീഹി സഗ്ഗമഗ്ഗം വാ ഝാനവിമോക്ഖമഗ്ഗം വാ ആരാധേതും ഭബ്ബോ ഹോതി, തസ്മാസ്സ ഗിഹിആദിഭാവോ വിസുദ്ധി നാമ ഹോതി. അധിട്ഠാനവിസിട്ഠേന സംവരേന വിസുദ്ധി സംവരവിസുദ്ധി. ധമ്മേന സമേന പച്ചയാനം ഏട്ഠിയാ സുദ്ധി ഏട്ഠിസുദ്ധി. ചതൂസു പച്ചയേസു പച്ചവേക്ഖണേന സുദ്ധി പച്ചവേക്ഖണസുദ്ധി. ‘‘ചതുബ്ബിധാ പാതീ’’തിആദീസു പാതിമോക്ഖസംവരസമ്മതന്തി ‘‘പാതിമോക്ഖസംവരോ’’തി സമ്മതം സീലം.

൪൫൬. ചിത്താധിട്ഠാനസംവരാ സുജ്ഝതീതി ഇന്ദ്രിയസംവരോ സംവരസുദ്ധീതി വുത്തോതി യോജനാ.

൪൫൭. അനേസനം പഹായ ധമ്മേന ഉപ്പാദേന്തസ്സ ഏട്ഠിയാ സുദ്ധത്താ ആജീവനിസ്സിതം ഏട്ഠിസുദ്ധീതി വുത്തന്തി സമ്ബന്ധോ. ഉപ്പാദേന്തസ്സാതി പച്ചയേ ഉപ്പാദേന്തസ്സ.

൪൫൮. പച്ചവേക്ഖണസുജ്ഝനാതി ഹേതുമ്ഹി പഞ്ചമീതി.

സുദ്ധിനിദ്ദേസവണ്ണനാ നിട്ഠിതാ.

൪൮. സന്തോസനിദ്ദേസവണ്ണനാ

൪൫൯. പംസുകൂലം പിണ്ഡിയാലോപോ രുക്ഖമൂലം പൂതിമുത്തഭേസജ്ജന്തി ഇമേ ചത്താരോ പച്ചയാ അപ്പഗ്ഘനകതായ അപ്പാ ചേവ കസ്സചിപി ആലയാഭാവേന അനവജ്ജാ ച ഗതഗതട്ഠാനേ ലബ്ഭമാനതായ സുലഭാ ചാതി വുച്ചന്തി, തേനാഹ ‘‘അപ്പേനാ’’തിആദി. മത്തഞ്ഞൂതി പരിയേസനപ്പടിഗ്ഗഹണപരിഭോഗവിസ്സജ്ജനേസു ചതൂസു മത്തഞ്ഞുതാവസേന പമാണഞ്ഞൂ.

൪൬൦. കഥം സന്തുട്ഠോതി ആഹ ‘‘അതീത’’ന്തിആദി. പച്ചുപ്പന്നേന യാപേന്തോതി യഥാലാഭയഥാബലയഥാസാരുപ്പവസേന പച്ചുപ്പന്നേന യഥാവുത്തചതുബ്ബിധപച്ചയേന യാപേന്തോതി.

സന്തോസനിദ്ദേസവണ്ണനാ നിട്ഠിതാ.