൪൬. സംവരനിദ്ദേസവണ്ണനാ

൪൫൩. സംവരണം ചക്ഖുദ്വാരാദീനം സതികവാടേന പിദഹനം സംവരോ. തത്ഥ കിഞ്ചാപി ചക്ഖുന്ദ്രിയേ സംവരോ നത്ഥി, ന ഹി ചക്ഖുപസാദം നിസ്സായ സതി ഉപ്പജ്ജതി, നേവ ഭവങ്ഗസമയേ ആവജ്ജനാദീനം അഞ്ഞതരസമയേ, ജവനക്ഖണേ പന ഉപ്പജ്ജതീതി തദാ സംവരോ ഹോതി, ഏവം ഹോന്തേ പന സോ ചക്ഖുദ്വാരാദീനം സംവരോതി വുച്ചതി. ചക്ഖുസോതാദിഭേദേഹീതി ചക്ഖു ച സോതഞ്ച, താനി ആദി യേസം, തേവ ഭേദാ ചാതി സമാസോ, തേഹി ദ്വാരേഹി. അഭിജ്ഝാദിപ്പവത്തിയാ അച്ചന്തോപകാരകത്താ കരണത്ഥേ ചേത്ഥ തതിയാ. ഏതേന ചക്ഖുസോതഘാനജിവ്ഹാകായമനസങ്ഖാതാനി ദ്വാരാനി വുത്താനി. രൂപസദ്ദാദിഗോചരേതി രൂപസദ്ദഗന്ധരസഫോട്ഠബ്ബധമ്മസങ്ഖാതേ വിസയേ. അഭിജ്ഝാദോമനസ്സാദിപ്പവത്തിന്തി ഏത്ഥ പരസമ്പത്തിം അഭിമുഖം ഝായതീതി അഭിജ്ഝാ, ബലവതണ്ഹാ. ആദി-സദ്ദേന മിച്ഛാദിട്ഠിആദയോ അനേകേ അകുസലാ ധമ്മാ സങ്ഗഹിതാ.

൪൫൪. സകം ചിത്തം കിട്ഠാദിം ദുപ്പസും വിയ നിഗ്ഗണ്ഹേയ്യാതി സമ്ബന്ധോ. കിട്ഠന്തി കിട്ഠട്ഠാനേ ഉപ്പന്നം സസ്സം ഗഹിതം. കിട്ഠം അദതീതി കിട്ഠാദി, തം. സമ്പജാനോതി സാത്ഥകസപ്പായഗോചരഅസമ്മോഹസങ്ഖാതേന ചതുസമ്പജഞ്ഞേന സമ്മാ പജാനോ. ഇമിനാ ഇന്ദ്രിയസംവരസീലം കഥിതം.

സംവരനിദ്ദേസവണ്ണനാ നിട്ഠിതാ.