൪. കാണമാതാസിക്ഖാപദവണ്ണനാ

ദ്വത്തിപത്തപൂരാ പടിഗ്ഗഹേതബ്ബാതി തഥാനീതപൂവേഹി അത്ഥികേന ഉക്കട്ഠപത്തപ്പമാണവസേന ഗഹേതബ്ബാ. ‘‘മാ ഖോ ത്വം ഏത്ഥ പടിഗ്ഗണ്ഹീ’’തി അപാഥേയ്യാദിഅത്ഥായ സജ്ജിതസഞ്ഞായ അതിരേകപ്പടിഗ്ഗഹണേന ആരോചനേ, അസംവിഭാഗേ ച ന മുച്ചതി അചിത്തകത്താ സിക്ഖാപദസ്സ. അഥ ഉഗ്ഗഹിതകം ഗണ്ഹാതി, ന മുച്ചതി ഏവ. അസംവിഭാഗേ പന അനാപത്തി അകപ്പിയത്താ. അചിത്തകതാ പണ്ണത്തിജാനനാഭാവേനേവ, ന വത്ഥുജാനനാഭാവേനാതി ഏകേ. ‘‘ന പാഥേയ്യാദിഅത്ഥായ സജ്ജിതഭാവജാനന’’ന്തി അങ്ഗേസു അവുത്തത്താ സചേ സഞ്ചിച്ച ന വദതി, പാചിത്തിയന്തി പോരാണാ വദന്തി. അതിരേകപ്പടിഗ്ഗഹണന്തി തത്ഥ പഞ്ചമംവ അങ്ഗം വുത്തം, തസ്മാ അപ്പടിഗ്ഗഹിതത്താ ന പാചിത്തിയം, കത്തബ്ബാകരണതോ പന ദുക്കടം. അഞ്ഞഥാ കിരിയാകിരിയം ഇദം ആപജ്ജതി. അനിവാരണം, അനാരോചനം വാ ഛട്ഠമങ്ഗം വത്തബ്ബം സിയാ.

കാണമാതാസിക്ഖാപദവണ്ണനാ നിട്ഠിതാ.