൭. നഹാനസിക്ഖാപദവണ്ണനാ

‘‘ദിയഡ്ഢോ മാസോ സേസോ ഗിമ്ഹാന’’ന്തി ‘‘വസ്സാനസ്സ പഠമോ മാസോ’’ഇച്ചേതേ അഡ്ഢതേയ്യമാസാ ഉണ്ഹസമയോ, പരിളാഹസമയോതി ഗിമ്ഹാനം സേസോ ദിയഡ്ഢോ മാസോ ഉണ്ഹസമയോ, വസ്സാനസ്സ പഠമോ മാസോ പരിളാഹസമയോതി ഏവം ഏതേ അഡ്ഢതേയ്യമാസാ കമേന ഉണ്ഹസമയോ, പരിളാഹസമയോ നാമ ഹോതീതി അത്ഥോ തേനേവ പദഭാജനിയം ‘‘ഉണ്ഹസമയോ നാമ ദിയഡ്ഢോ മാസോ സേസോ ഗിമ്ഹാന’’ന്തി, ‘‘പരിളാഹസമയോ നാമ വസ്സാനസ്സ പഠമോ മാസോ’’തി വുത്തം. യദാ വിനാ നഹാനേന ന ഫാസു ഹോതി, അയം ഗിലാനസമയോ. പദഭാജനിയം (പാചി. ൩൬൪) പന ഗിലാനേ നിച്ഛിതേ ഗിലാനകാലോ നിച്ഛിതോവ ഹോതീതി ‘‘യസ്സ വിനാ നഹാനേന ന ഫാസു ഹോതി, ‘ഗിലാനസമയോ’തി നഹായിതബ്ബ’’ന്തി വുത്തം. പരിവേണസമ്മജ്ജനമത്തമ്പീതി അന്തമസോ പരിവേണസമ്മജ്ജനമത്തമ്പി.

വാലുകം ഉക്കിരിത്വാതി സുക്ഖായ നദിയാ വാലികം ഉത്തിരിത്വാ. ആവാടേസുപീതി പി-സദ്ദേന നദിയം വത്തബ്ബമേവ നത്ഥീതി ദസ്സേതി. ആപദാസൂതി ഭമരാദീഹി അനുബന്ധേസു.

നഹാനസിക്ഖാപദവണ്ണനാ നിട്ഠിതാ.